Jchapan jbatik ta sventa li Snaʼobil slajel Cristoe

Jaʼo ta 13 yuʼun Nisán ta sjabilal 33. Li Jesuse snaʼoj ti slajeb xa akʼobal te xchiʼuk li yamigotak ti solel lek xil sba xchiʼuke, yuʼun chichʼ xa milel. Jmoj ta spasik li slajeb kʼin Koltaele, yuʼun jaʼ xa chlik yichʼ pasel li Veʼlil ta bat kʼakʼal yuʼun Kajvaltike. Ta skoj ti toj tsots skʼoplal li vaʼ kʼakʼale skʼan lek xchapan sbaik, jaʼ yuʼun li Jesuse la stak batel Pedro xchiʼuk Juan sventa xbat xchapanik (Luc. 22:7-13). Ta skoj taje, li yajtsʼaklomtak Cristo avie toj tsots skʼoplal chaʼiik ti lek xchapan sbaik ta sventa li snaʼobil Jesuse (Luc. 22:19). Jkʼeltik batel kʼusitik skʼan jpastik sventa lek chapalukutik kʼalal mi kʼot yorail li Snaʼobil slajel Cristo ti jaʼ ta 3 yuʼun avrile.

Li kʼusitik skʼan spasik li moletik ta tsobobbaile:

Skʼan snopik mi jaʼ te chetʼesik ta Salon sventa Tsobobbail o ta saʼik yan ti bu mas ep x-och yuʼun krixchanoetike, ti lekuk sakjaman xvinaje xchiʼuk ti x-ochuk lek li ikʼe. Skʼan baʼyel xchapanik sventa xichʼ chʼubael lek ti bu chichʼ jelubtasel li Snaʼobil slajel Cristoe.
Skʼan saʼik li buchʼu lek xtojob ta sjelubtasel mantale, li buchʼu tslikes tsobajele xchiʼuk li buchʼu tspas orasion ta sventa pan xchiʼuk vino kʼalal muʼyuk toʼox chichʼ jelubtasele.
Mi oy jayib tsobajel chichʼ pasel ti bu ch-echʼ avuʼunike skʼan me xichʼ chapel lek li yoraile, jech kʼuchaʼal ta sventa jayib ora ch-och o chlokʼ li jujun tsobobbaile xchiʼuk ta sventa li skotleb karoe.
Skʼan stʼujik li buchʼutik chtunik ta jcholvanejetik xchiʼuk li buchʼutik tsjelubtasik li pan xchiʼuk vinoe.
Ti akʼo skʼelik ti lekuk li vino xchiʼuk li pane, ti oyuk platoetik, kopaetik sventa vino, jkotuk mexa xchiʼuk jlikuk smantail ti lek xvinaje.

Li kʼusitik skʼan spasik li jcholmantaletike:

Jaʼ ti skolta sbaik ti bu kʼalal xuʼ yuʼunik li ta kampanya sventa jtaktik ta ikʼel krixchanoetik li ta Snaʼobil slajel Cristoe.
Akʼo spasik junuk lista sventa li buchʼutik tskʼan tstaik ta ikʼel li ta Snaʼobil slajel Cristoe, jech kʼuchaʼal yutsʼ yalalik, li buchʼutik chakʼbeik chanubtasel ta Vivliae, xchiʼilik ta chanun o ta abtel xchiʼuk yantik ti buchʼutik xojtikinike.
Ti skʼelik li Vivlia sventa li Snaʼobil slajel Cristoe xchiʼuk ti snopbeik skʼoplale.
Ti lekuk xchʼamik li buchʼutik chkʼotik ta Snaʼobil slajel Cristoe.