Lek chkʼopojik ta stojolal steklumal Dios li krixchanoetike
1. Li buchʼutik chbatik ta sNaʼobil slajel Cristoe, ¿kʼusi to yan xuʼ labal sba xilik, ti maʼuk noʼox li mantal chjelave?
1 ¿Bakʼin chkʼot ta pasel taje? Jaʼo li ta sNaʼobil slajel Cristoe. Jaʼ yuʼun yakalutik spasel persa ta stakel ta ikʼel li krixchanoetike. Oy ta koʼontontik ti maʼuk noʼox labal sba xaʼiik li mantal chjelave, moʼoj, ta jkʼantik xtok ti chʼayaluk to xkʼot yoʼontonik ta sventa li kʼusi chilike. Jun ants ti i-ay ta sNaʼobil slajel Cristoe, jamal laj yal ti toj lek yoʼonton laj yil li buchʼutik te ta tsobajele xchiʼuk toj lek sak o chʼubabil laj yil li kʼupil sba na taje, akʼo mi muʼyuk tojbil li buchʼutik la smeltsanik xchiʼuk tskʼelike. ¿Kʼusi chakʼ jchantik taje? Jaʼ ti jkotoltik oy kʼusitik xuʼ jpastik sventa lek xkʼopojik ta stojolal steklumal Dios li krixchanoetike, maʼuk noʼox li buchʼu tsjelubtas mantale (Efe. 4:16).
2. ¿Kʼusitik xuʼ jpastik sventa lek xkʼopojik ta stojolal steklumal Dios li krixchanoetik ti sba to velta chkʼotike?
2 Jchʼamtik lek li buchʼutik sba to velta chkʼotike. Mi xijtseʼin noʼox xchiʼuk lek ta jchʼamtik li buchʼutik sba to velta chkʼotike, xuʼ me lek xkʼopojik ta stojolal li steklumal Diose (Juan 13:34, 35). Akʼo mi mu xuʼ avuʼun xachiʼin ta loʼil skotol li krixchanoetike, xuʼ xbat avakʼ aba ta ojtikinel ta stojolal li buchʼutik te nopol chotol ta atsʼele (Heb. 13:1, 2). Teuk me asat mi oy buchʼu ikʼot ta sba velta xchiʼuk muʼyuk buchʼu xojtikin yileluke, yuʼun xuʼ van ikʼot ta tsobajel ta skoj ti la xchʼam li uni vun ta yorail kampanyae. Xuʼ xi xajakʼbee: «¿Mi sba to velta la tal?». Mi jeche, xuʼ xavalbe mi skʼan koʼol xachotiik xchiʼuk ti xatakʼbe mi oy kʼusitik tsjakʼe. Mi ta stsob to sba yan tsobobbail li ta salone xchiʼuk ti skʼan xalokʼik noʼoxe, xuʼ xi xavalbee: «Ta jkʼan ta jnaʼ kʼuyelan avil li tsobajele. ¿Bu xuʼ xbat jkʼelot?».
3. ¿Kʼusitik xuʼ jpastik sventa lekuk chʼambil xaʼiik li buchʼutik yiktaoj sbaik ta mantale?
3 Jchʼamtik lek li buchʼutik yiktaoj sbaik ta mantale. Jnaʼojtik ti ta onoʼox xkʼotik li jcholmantaletik ti yiktaoj sbaik ta mantale, xchiʼuk li buchʼutik jaʼ noʼox chkʼotilanik li ta sNaʼobil slajel Cristoe. Lek me jchʼamtik xchiʼuk kakʼbetik me yil ti xijmuyubaj ti kʼotike (Rom. 15:7). Jech xtok, li moletike xuʼ me xbat svulaʼanik ta sna sventa stijbeik yoʼonton yoʼ xbatilanik-o li ta tsobajeletike. Ta jkʼanbetik Jeova ta orasion ti xtijbatik yoʼontonik sventa skʼupil kʼoptaik Dios li buchʼutik ayik ta tsobajel taje, maʼuk noʼox ta skoj li kʼusi laj yaʼiike, moʼoj, yuʼun jaʼuk ta skoj xtok ti kʼalal laj yilik ti lek kʼusitik la jpastike (1 Ped. 2:12).