Ta slekiluk koʼonton jchʼamtik

¿Buchʼu ti skʼan lek jchʼamtike? Skotol li buchʼutik ta xkʼotik ta tsobajeletike, akʼo mi jaʼ to chkʼotik o mi jaʼ li buchʼutik voʼne xa onoʼox xkojtikintike (Ro 15:7; Evr 13:2). Xuʼ van jaʼ junuk ermano ti tal svulaʼanutik ti likem tal ta yan lume o junuk yajtsʼaklom Kristo ti jal xa yiktaoj sba ta mantale. ¿Kʼu van yelan chavaʼi aba ti jechuk chkʼot ta atojolale? ¿Mi mu jechuk ti chatoj ta vokol kʼalal ta slekil yoʼontonik chaxchʼamoxuke? (Mt 7:12). Jaʼ yuʼun kʼalal chijbat ta Salon sventa Tsobobbaile tsots skʼoplal ti xkakʼ kipaltik sventa jchiʼintik ta loʼil li ermanoetik kʼalal mu toʼox xlik li tsobajele xchiʼuk kʼalal mi laj xa oxe. Mi jech ta jpastike mas me oy jun oʼontonal xchiʼuk muyubajel (Mt 5:16). Pe yikʼaluk van mu xlaj jkʼopontik skotol li buchʼutik te oyike. Mi chkakʼ kipaltike, xuʼ me komon jkolta jbatik sventa junuk yoʼontonik li buchʼutik chkʼotik ta tsobajele.a

Xuʼ me xkakʼtik ta ilel ta skotol ora ti lek jnaʼ xijchʼamvane, maʼuk noʼox kʼalal oy kʼusi tsots skʼoplal ta xichʼ pasele, jech kʼuchaʼal li ta Snaʼobil slajel Kristoe. Kʼalal lek kʼanbil chaʼiik li buchʼutik jaʼ to chkʼotike, xuʼ xtijbat yoʼontonik sventa xichʼik ta mukʼ li Diose xchiʼuk ti x-ayan ta yoʼonton li melel yichʼel ta mukʼ Jeovae (Jn 13:35).