¡Kalbetik ti lek chʼambilike!
1. ¿Bu xuʼ xkakʼtik ta ojtikinel lek li mantale xchiʼuk kʼu yuʼun?
1 Li ta yorail Snaʼobil slajel Cristo ta jpastik jujun jabile, jaʼo me xuʼ xkakʼtik lek ta ojtikinel li mantale. Li jabil liʼe chichʼ malael ti xkʼotik mas ta lajuneb miyon krixchanoetik li ta Snaʼobil slajel Cristoe, te chchanik ti oy chaʼvoʼ buchʼu laj yakʼik ta ilel ti kʼanvanemik tajek kʼalal laj yichʼ akʼel li matanale (Juan 3:16; 15:13). Te chchanbeik skʼoplal ti kʼusitik sbalil chichʼ tabel li matanal laj yakʼ Jeovae (Is. 65:21-23). Akʼo mi jech, maʼuk noʼox me stuk chakʼ ta ojtikinel mantal li buchʼu tsjelubtas mantal li ta Snaʼobil slajel Cristoe. Yuʼun xuʼ xkalbetik ti lek chʼambilik skotol li buchʼutik chkʼotike, mi jech ta jpastike chkakʼtik ta ojtikinel li mantale (Rom. 15:7).
2. ¿Kʼuxi xuʼ lek jchʼamtik li buchʼutik jaʼ to chkʼotike?
2 Kʼalal skʼan toʼox xlik li tsobajele jaʼ lek ti xavakʼ aba ta ojtikinel ta stojolal li buchʼutik te nopol chotolike ti mu teuk noʼox tsʼijil xakome. Li buchʼutik jaʼ to chkʼotike xuʼ van chiʼik jutuk ta skoj ti mu snaʼik kʼusi chichʼ pasele. Sventa lek chʼambil xchiʼuk lek xaʼi sbaike, skʼan me lek xijkʼopoj xchiʼuk stseʼetuk noʼox jsatik. Jech xtok, sventa jnaʼtik mi jaʼ ta skoj ti laj yichʼ akʼbel jun uni vun ti kʼotik ta tsobajele, jakʼbetik mi oy xa onoʼox ayemik ta junuk tsobajel o mi oy buchʼu xojtikinik li ta tsobobbaile. Xuʼ van xavalbe ti koʼol xachotiik sventa koʼol xakʼelik Vivlia xchiʼuk li slivroal kʼejimole. Mi te ta Salon sventa Tsobobbail ch-echʼ avuʼunike, xuʼ van xavakʼbe yojtikin jlikeluk li salone. Mi tsuts xaʼox li mantale xuʼ xajakʼbe mi oy kʼusitik tsjakʼ yaʼi. Mi anil noʼox skʼan xalokʼik li ta Salon ta skoj ti ch-och yan tsobobbaile, xuʼ xi xavalbee: «Ta jkʼan chkaʼi kʼuyelan laj avaʼi li kʼusi echʼe. ¿Mi oy kʼuxi xuʼ jkʼoponot?». Chapo akʼopik sventa xaloʼilajik ta yan kʼakʼal. Li moletik ta tsobobbaile skʼan oyuk ta yoʼontonik sventa tspatbeik yoʼonton mi kʼot li buchʼutik yiktaoj sbaik ta mantale.
3. ¿Kʼu yuʼun tsots skʼoplal ti lekuk jchʼamtik ta Snaʼobil slajel Cristo li buchʼutik jaʼ to chkʼotike?
3 Ep li buchʼutik jaʼ to chkʼotike sba velta to chilik ti oy muyubajel, lekilal xchiʼuk ti lek tsobolutike, ti ta jkʼupintik ti oyutik ta jun paraiso yaʼeluk li ta steklumal Jeovae (Sal. 29:11; Is. 11:6-9; 65:13, 14). ¿Kʼusi van te chkom ta sjolik mi echʼ xaʼox Snaʼobil slajel Cristo li buchʼutik jaʼ to chkʼotike? Jaʼ mas chvul ta sjolik mi chkakʼtik persa lek ta jchʼamtike.