Ichʼbiluk ta mukʼ li sbi Diose

1. ¿Kʼusi sbi li Mukʼta Tsobajel ta chib kʼakʼale, xchiʼuk bu laj yichʼ lokʼesel?

¹ Li ta sjabilal 1931, jaʼ te lik kichʼtik tal akʼbel jbitik kʼuchaʼal yajrextiko Jeova, jaʼ jun mukʼta matanal ti kichʼojbetik sbi li Mukʼul Jpasmantal ta vinajelbalumile. Yuʼun jaʼ stuk Jeova ti laj yakʼbutik li matanal taje (Isa. 43:10). Li Jesús eke toj echʼ noʼox laj yichʼ ta mukʼ li sbi Stote, jaʼ yuʼun jaʼ baʼyel laj yalbe skʼoplal li ta orasion Padrenuestro sbie (Mat. 6:9). Li ta Mukʼta Tsobajel ta chib kʼakʼal li ta kabteltik chlik ta septiembre yuʼun 2011 kʼalal ta agosto yuʼun 2012, jaʼ sbi: «Ichʼbiluk ta mukʼ li sbi Diose», te yichʼoj lokʼesel li ta orasion taje.

2. ¿Kʼusi mantaletik ta xichʼ albel skʼoplal li ta mukʼta tsobajele?

² Kʼusi mantaletik ch-echʼ. Li ta sabado, ti jaʼ sbi li mantal: «Kakʼtik ta ojtikinel sbi Dios ti chijtun ta tsʼakal orae», jaʼ te chichʼ albel skʼoplal ti kʼu yuʼun xijmuyubaj ti jech chij-abteje. Li ta mantaletik ti jaʼ sbi: «Mu xkikʼubtasbetik sbi li Jeovae», oy jayvokʼ ch-echʼ, jaʼ tskoltautik sventa mu xijtsʼujutik li ta chantos petsʼetik ti lek ojtikinbile. Li ta mantal ti jaʼ sbi: «Kʼu yuʼun skʼan xkichʼtik ta mukʼ li sbi Diose», te chkiltik kʼuxi xuʼ stij koʼontontik sventa jcholtik batel mantal ti bu kʼalal xuʼ kuʼuntike xchiʼuk ti jechuk-o jpastik ta sjunul koʼontontik akʼo mi mu masuk oy ta yoʼontonik mantal li krixchanoetike. Li ta domingoe te chichʼ albel skʼoplal ta chanvokʼ mantaletik ti kʼuxi xuʼ xkichʼtik ta mukʼ li sbi Diose, ta jnopbentik, ta jkʼopojeltik, ta kʼusi ta jnop ta jpastik xchiʼuk ta jtalelaltik. Ta van xmuyubajik li buchʼu achʼik to kʼalal chaʼiik li mantal ti jaʼ sbi: «Li Jeovae ta xichʼ ta mukʼ li smukʼta bi ta Armagedone».

3. ¿Kʼusi matanal jtaojtik, xchiʼuk kʼuxi tskoltautik li kʼusi ch-echʼ ta mukʼta tsobajele?

³ Li Jeovae poʼot xa xakʼ ti akʼo xichʼ ichʼel ta mukʼ li sbie (Eze. 36:23). Pe akʼo mi jech, akʼbilutik jun mukʼta matanal: jaʼ ti jpakbetik skʼoplal ti bu kʼalal smakoj li chʼul biil taje. Ta melel, li mantaletik ta Mukʼta Tsobajel ta chib kʼakʼale, jaʼ chiskoltautik ta yaʼibel smelolal li kʼusi oy ta jbatik ti kichʼojbetik li sbi Jeovae.