Li Jeovae chchapanutik sventa jpas li kabteltike
1. ¿Kʼusi tspas onoʼox Jeova kʼalal chakʼbe yabtel li yajtuneltake?
1 Kʼalal chakʼbe yabtel yajtuneltak li Jeovae, chalbe kʼuyelan xuʼ spasik xtok. Jech kʼuchaʼal liʼe, kʼalal akʼbat spas arka li Noee albat kʼuyelan tspas, yuʼun muʼyuk toʼox jech spasoj (Gén. 6:14-16). Jech xtok, kʼalal jaʼ toʼox uni jchabichij li Moisese albat yuʼun Dios ti skʼan xbat skʼopon li moletik ta Israele xchiʼuk li Faraone, xi albat ta melel yuʼun li Jeovae: «Vuʼun chajchiʼinot ti cʼalal chaloʼilaje; vuʼun ta jchanubtasot li cʼusi xuʼ chavale» (Éxo. 4:12). Li avi eke, li Jeovae muʼyuk yiktaojutik jtuktik ta spasel li kabteltik ta xcholel lekil aʼyeje. Moʼoj, yuʼun chchapanutik ta spasel li abtelal taje, jaʼ tstunes li Chanobvun sventa Kabteltik yuʼun Dios xchiʼuk li Tsobajel sventa Tunelale. ¿Kʼuxi xuʼ jtabetik sbalil li chapanel taje?
2. ¿Kʼuxi xuʼ jtabetik lek sbalil li Chanobvun sventa Kabteltik yuʼun Diose?
2 Chanobvun sventa Kabteltik yuʼun Dios. Kak xachan li vunetik chichʼ chanel ta jujun tsobajele. Kʼalal chakʼel kʼuyelan chetʼes sparteik li jujun jchanunetike xuʼ jaʼ te xachan kʼuxi xuʼ xachanubtasvan lek (Pro. 27:17). Jech noxtok, ichʼo batel li alivro Benefíciese li ta tsobajele vaʼun xuʼ xatunes sventa xatsʼibaj te. Kʼalal chalbe skʼoplal junuk pajina ta livro li buchʼu sbainoj li chanobvune ti jaʼ sventa li buchʼu yetʼesoj xaʼox spartee bono li kʼusi mas tsotsik skʼoplal ti chakʼan jech chapase, xchiʼuk tuneso li stiʼiltak vun sventa xatsʼiba li kʼusi mas tsotsik skʼoplale. Pe sventa jtabetik lek sbalil li mantaletik ta chanobvune, jaʼ ti xketʼes jpartetik eke. ¿Mi laj xa atsak abi ta Chanobvun sventa Kabteltik yuʼun Dios? Kʼalal cha-akʼbat apartee chapano lek xchiʼuk paso li kʼusi cha-albate. Laje, tuneso ta cholmantal li kʼusi la achane.
3. ¿Kʼusi xuʼ skoltautik sventa jtabetik sbalil li Tsobajel sventa Tunelale?
3 Tsobajel sventa Tunelal. Sventa teuk-o ta joltik li mantaletik chakʼik li ta tsobajele, skʼan jchantik lek baʼyel xchiʼuk jchapan jbatik sventa xkakʼ jloʼiltik. Mi jaypʼel noʼox chkakʼ li jloʼiltike xuʼ me xakʼ sloʼilik li yantik eke. Kʼelo lek li skʼelobil cholmantale xchiʼuk paso li tojobtaseletik chakʼik ti xuʼ xtun avuʼun sventa xlekub ti kʼuyelan chacholmantale. Mi oy junuk Kabteltik sventa Dios ti bu chalbe smelolal ti kʼuyelan xuʼ jcholtik mantale, kʼejo sventa xatunes ta mas tsʼakal.
4. ¿Kʼu yuʼun skʼan jtabetik sbalil li chapanel chakʼbutik Jeovae?
4 Jech kʼuchaʼal li abtelal akʼbatik li Noé xchiʼuk Moisese, li abtelal akʼbilutik sventa xcholel li lekil aʼyejetik ta spʼejel Balumile mu kʼunuk ta pasel (Mat. 24:14). Akʼo mi jech, xuʼ me lek xkʼot ta pasel kuʼuntik mi ta jpat koʼontontik ta stojolal li Mukʼul Jchanubtasvanej kuʼuntike xchiʼuk mi ta jtunestik li chanubtaseletik chakʼbutik Jeovae (Isa. 30:20).