Oxtos kʼusi xuʼ jpastik yoʼ xlekub li kʼuyelan chijchanubtasvane
1. ¿Kʼusi srasonal oy sventa jlekubtastik batel li kʼuyelan chijchanubtasvane?
1 Jaʼ jun jchanubtasvanej li buchʼu chchol mantale. Li kʼusi oy ta koʼontontike jaʼ ti jchanubtastik krixchanoetik li ta kʼusi tsots skʼoplale, taje jaʼo ta jpastik kʼalal ta jcholtik mantale, chijchaʼvulaʼanvane o kʼalal chkakʼtik chanubtasel ta Vivliae. Kʼalal chkalbetik skʼoplal li «xchʼul cʼope», jech ta jkoltatik sventa chpʼijubik yoʼ jech chkolik (2 Tim. 3:15). ¡Jaʼ jun mukʼta matanal ti jech xuʼ jpastike! Liʼe ta jkʼeltik batel oxtos kʼusi xuʼ jpastik sventa xlekub li kʼuyelan chijchanubtasvane.
2. ¿Kʼuxi xuʼ kʼun noʼox ta aʼyel li kʼuyelan chijchanubtasvane?
2 Kʼunuk ta aʼyel ti kʼuyelan chijchanubtasvane. Ta skoj ti ep ta velta kaʼyojtik jtosuk chanubtasele, kʼalal chkalbetik skʼoplal li krixchanoetike xuʼ van xchʼay ta joltik ti achʼ to chaʼi stukike o ti tsots ta aʼyel smelolal chaʼiike. Jaʼ yuʼun, kʼalal chkakʼtik jun chanubtasele mu epuk tajek kʼusi xkaltik ti mu persauk sventa mu xtavan xaʼie. Jaʼ noʼox xkaltik li kʼusi mas tsotsik skʼoplale. Maʼuk to skʼan ep xijkʼopoj sventa lek xijchanubtasvan (Pro. 10:19). Jech xtok, mu persauk jsaʼtik skotol li tekstoetik te tsakal tale, xuʼ van jaʼ noʼox jkʼeltik li bu mas tsots skʼoplale. Mi laj xa jkʼeltike jaʼ xa noʼox xkaltik li bu mas chalbe skʼoplal li kʼusi yakalutik xchanele. Li Mantaletik ta Vits laj yal Jesuse te ta jtatik li kʼusi melel ti tsotsik tajek skʼoplale (Mat., kap. 5-7). Akʼo mi jech, kʼun tajek ta aʼyel li kʼusi laj yakʼ ta chanele xchiʼuk mu epuk kʼopoj.
3. ¿Kʼu yuʼun toj jtunelik li lokʼolkʼopetike, xchiʼuk kʼuyelan li mas jtunelike?
3 Jtunestik lokʼolkʼopetik. Li lokʼolkʼopetike chakʼ ti jnoptike, chkoltavan sventa xkʼot ta koʼontontik xchiʼuk ti xvul ta joltik li kʼusi ta jchantike. Mu persauk xatojob tajek ta al-loʼil sventa xatunes lokʼolkʼopetik. Yuʼun jlikelik noʼox xchiʼuk kʼunik noʼox ta aʼyel li lokʼolkʼopetik la stunes Jesuse (Mat. 7:3-5; 18:2-4). Li lokʼolkʼopetik ti jtunelik xtoke, jaʼ li divujoetik ti mu toj tsotsuk ta pasele. Mi ta jchapan jbatik leke chvul ta joltik kʼuxi xuʼ jpastik.
4. ¿Kʼuxi xuʼ jtunestik lek li sjakʼobiltake?
4 Jtunestik lek li sjakʼobiltake. Li buchʼu ta jchanubtastik ta Vivliae skʼan snop kʼusi tstakʼ kʼalal ta jtunestik sjakʼobile. Jaʼ yuʼun, mi oy kʼusi la jakʼbetike skʼan jmalatik sventa tstakʼbutik. Mi ta jtakʼbetik ta anile muʼyuk me chkakʼtik venta mi yabinojbe xa smelolal. Mi mu jechuk la stakʼ tale mu jtukʼibtastik ta anil li kʼusi laj yale, jaʼ van mas lek ti jsabetik smelolal kʼuyelan xuʼ jakʼbetike (Mat. 17:24-27). Pe skʼan me xkakʼtik venta ti muʼyuk buchʼu ti solel xa xtojob tajek ta chanubtasvaneje. Jaʼ yuʼun chal li Vivlia ti jkʼeltik lek ti kʼuyelan chijchanubtasvane yuʼun ta stabeik sbalil li buchʼu chaʼibutike xchiʼuk ta jtabetik sbalil ek (1 Tim. 4:16).