Sventa jcholtik mantale skʼan van jsaʼtik baʼyel li krixchanoetike

1. Li bu chkʼopojik ta epal kʼopetik li krixchanoetike, ¿kʼu yuʼun jaʼ chichʼik albel li tsobobbailetik ti jaʼ jech skʼopik sventa jaʼ xcholbeik mantale?

¹ Li ta kʼin Pentecostés ta sjabilal 33, kʼalal laj xaʼox yichʼik chʼul espiritu li yajtsʼaklomtak Jesuse «lic [skʼoponik] ta yantic cʼopetic» li krixchanoetik ti likemik talel ta epal lumetik ti talemik sventa li kʼin taje (Hech. 2:4). Jech oxal, te van oxmiluk krixchanoetik laj yichʼik voʼ. Li buchʼutik te kʼotike oy skʼop stukik, pe xuʼ van jutuk mu skotolikuk xkʼopojik ta hebreo o griego. Akʼo mi jech, li Jeovae la skʼan ti akʼo xaʼiik ta skʼop stukik li aʼyejetik sventa Ajvalilal yuʼun Diose. Jech la spas, yuʼun li krixchanoetike jaʼ mas chkʼot ta yoʼontonik kʼalal chichʼik cholbel mantal ta skʼopike. Jaʼ yuʼun li bu chkʼopojik ta epal kʼopetike, jaʼ chichʼik albel li tsobobbailetik ti jech skʼopik sventa jaʼ xcholbeik mantale (kʼelo stsʼakleb Kabteltik Sventa Dios ta fevrero ta 2007, paj. 7, par. 6 kʼalal ta paj. 8, par. 1). Pe kʼalal oy jun grupo ti jot-o to lum bu likem tal li skʼopike jaʼ chcholbe mantal li krixchanoetik ti jech chkʼopojik ti bu onoʼox chcholik mantal li tsobobbail ti oy ta sba skʼelel li grupo taje xchiʼuk li ta yan tsobobbail ti nopol noʼox oye.

2. 1) ¿Kʼuxi chichʼ saʼel li buchʼutik yan-o skʼopike xchiʼuk bakʼin jech skʼan pasel? 2) ¿Kʼuxi xuʼ skolta sbaik li tsobobbailetik ti oy jaytos kʼop li bu chcholik mantale? 3) ¿Kʼusi xuʼ jpastik kʼalal chkʼot ta yoʼonton mantal junuk krixchano ti yan-o skʼope?

² Li jcholmantaletike xuʼ xcholik mantal ta jujupʼej na kʼalal kʼajomal noʼox jtos skʼopik li krixchanoetike. Pe mi oy ep ta tos kʼopetik li bu nakalike, xuʼ me koʼol xabtelanik jayibuk tsobobbail li yosilal cholmantale. Mi la staik junuk krixchano ti yan-o skʼope, xuʼ stsakbeik ta vun li sbie xchiʼuk li bu nakale, sventa jaʼ xa chbat svulaʼanik li ermanoetik ti koʼol skʼopike. Skʼan jvules ta joltik ti buchʼu oy ta sba saʼel li krixchanoetik taje jaʼ li tsobobbail o grupo ti jech skʼopik eke (kʼelo li rekuadro «Jkolta jbatik ta jujuntal»). Jaʼ yuʼun, li tsobobbailetik o grupoetik taje skʼan spasik sensar o saʼik xchiʼuk stsakbeik ta vun sbi li krixchanoetik ti yan-o skʼopike. Li avie une ta jkʼeltik kʼusitik xuʼ jpastik.

3. ¿Kʼusi chichʼ tsakel ta venta sventa chichʼ saʼel li krixchanoetike xchiʼuk mi koʼol kʼuyelan chichʼik saʼel ta skotolal yosilal cholmantal?

³ Kʼuxi ta saʼel li krixchanoetike. Ti kʼu sjalil skʼan saʼel li krixchanoetik ti yan-o skʼopike, toj jelel, yuʼun jaʼ chichʼ tsakel ta venta jayvoʼ krixchanoetik ti jech skʼopike, jayvoʼ jcholmantal oy, jayvoʼ xa jnaʼojtik bu nakalik. Mu persauk koʼol kʼuyelan chichʼ saʼel ta skotolal li yosilal cholmantale; xuʼ jaʼ mas xichʼ vulaʼanel ti bu mas ep nakal krixchanoetik ti bu chchol mantal li tsobobbaile xchiʼuk ti bu lektik noʼox sba snamale. Jaʼ noʼoxe skʼan lek chapalutik sventa xuʼ jkoltatik li krixchanoetik yoʼ staik ta naʼel li sbi Diose (Rom. 10:13, 14).

4. 1) ¿Kʼu yelan skʼan chapanel li saʼel krixchanoetike? 2) Alo jlom kʼusitik stakʼ pasel sventa chichʼ saʼel krixchanoetik ti yan-o skʼopike.

⁴ Sventa mu masuk xij-abteje, li moletik ta tsobobbaile skʼan xchapanik xchiʼuk skʼelik kʼuyelan chichʼ saʼel li krixchanoetike, pe mas to jech skʼan spas li jkʼelcholmantale (1 Cor. 9:26). Kʼalal oy krixchanoetik ti jot-o to lum bu likem tal li skʼopike, li moletik ta tsobobbail ti jaʼ oy ta sba li grupo taje, jaʼ ta svaʼanik jun ermano ti lek chanem sventa tskʼel li abtelal taje, jaʼ mas lek mi jaʼ jun mol o yajkoltaobba mol ta tsobobbaile. Epal tsobobbailetik xchiʼuk grupoetike staojbeik lek smelolal kʼuyelan tspasik sventa tsaʼik li krixchanoetike. Xuʼ van saʼik ta junuk directorio o ta Internet sventa stsakik li biiletik ti mas nopem xaʼiik stunesel li krixchanoetik taje. Vaʼun ta tsʼakale tskʼoponik ta telefono o moʼoje tsvulaʼanik sventa skʼelik lek buchʼutik te nakalik ta yosilal bu chcholik mantal. Li moletik ta tsobobbaile xuʼ xalik ti xuʼ xbat xcholik mantal bateltik li tsobobbail sventa tskoltaik ta saʼel krixchanoetik li jun grupoe (kʼelo li rekuadro «Kʼuxi xuʼ jsaʼtik li buchʼutik chkʼopojik ta yan kʼope»).

5. 1) ¿Kʼusi skʼan mu xchʼay ta sjolik li buchʼutik chlokʼ spasik sensoe? 2) ¿Kʼusi xuʼ xichʼ albel li krixchanoetike?

⁵ Kʼalal skʼan toʼox xbat jpastik sensoe skʼan jnoptik baʼyel kʼusi li ta jkʼantike. Li jkʼuʼ jpokʼtike skʼan jechuk kʼuchaʼal chijbat ta cholmantale, yuʼun te snitoj sba xchiʼuk li spasbel yabtel Diose. Jech xtok skʼan chanilanel kʼuxi ta cholel mantal xchiʼuk kʼuxi ta jchiʼintik ta loʼil ta skʼop li krixchanoetike, yuʼun taje ep buchʼutik jaʼ koltabil-o sventa xmuyubajik noʼox xchiʼuk ti xchanik mas li kʼope. Xuʼ xichʼ tsakel ta vun ti kʼu sjalil ta jsaʼtik li krixchanoetike, jaʼ muʼyuk kʼalal chichʼ chapanel li mapa sventa cholmantale o li slistail biiletike. Kʼalal ta jtatik jun krixchano ti yan-o skʼope skʼan xkakʼtik persa jcholbetik mantal. Manchuk mi xkʼot ta yoʼonton mantal o mi muʼyuk, skʼan noʼox albel li jkʼelcholmantale o li buchʼu yakʼojbe sbain sventa xichʼ tsakbel ta vun li sbie. Skʼan me jvules ta joltik ti manchuk mi tsots skʼoplal li sensoe skʼan onoʼox me jpastik li yan kʼusitik sventa yabtel Diose (kʼelo li rekuadro «Kʼusi xuʼ xichʼ alel kʼalal chichʼ pasel sensare»).

6. ¿Kʼusitik vokol oy kʼalal chichʼ saʼel li buchʼutik makal xchikinike?

⁶ Kʼuyelan ta saʼel li buchʼutik makal xchikinike. Li abtelal taje tsots ta pasel, jaʼ yuʼun skʼan xkakʼbetik yipal xchiʼuk skʼan mu xijlub. Epal krixchanoetike anil xvinaj ta sbiik, ta satik xchiʼuk ta skʼuʼ spokʼik ti oy yan skʼopike, yan li buchʼu makal xchikinike mu xvinaj ta anil. Jech noxtok, ta skoj ti oy bakʼintik ti chchabiatik tajek yuʼun yutsʼ yalalik xchiʼuk li yamigotakike mu xalik o xuʼ van mu xalbeik li jcholmantaletik li kʼusi tsjakʼike. Li kʼusitik chichʼ alel batel avie toj jtunel sventa chichʼ saʼel li buchʼutik makal xchikinike o li buchʼutik oy yan skʼopike.

7. 1) ¿Kʼusi stakʼ jakʼel kʼalal chichʼ saʼel li buchʼutik makal xchikinike? 2) ¿Kʼusi chkoltavan sventa mu kʼusi chopol snop li krixchanoetike?

⁷ Li tsobobbailetik xchiʼuk li grupoetik ta senya kʼope oy tsjakʼilanik ta naetik mi oy buchʼu xojtikinik ti makal xchikine. Xuʼ van oy jun slakʼnaik, xchiʼilik ta abtel o ta chanun ti snaʼ senya kʼope, o junuk yutsʼ yalalik ti makal xchikine. Xuʼ van xvul ta sjolik ti yilojik jun letrero ta kaye ti tspʼijubtas jtsʼot karoetik ti oy te ololetik ti makal xchikinike. Skʼan me teuk ta joltik ti kʼalal jech chichʼ jakʼele xuʼ van oy kʼusi chopol xlik snopik kuʼuntik. Sventa mu kʼusi chopol snopike skʼan lek noʼox stseʼet jsatik, chij-ichʼvan ta mukʼ, jamaluk xijkʼopoj xchiʼuk jlikeluk noʼox. Jlome yilojik ti lek kʼusi chkʼot ta pasel kʼalal jaʼ chkʼot yakʼik iluk li Vivlia ta senya kʼop o yan vun ta DVD, vaʼun chalbeik ti jaʼ tskʼan chbat yakʼbeik xchan li spatobil oʼontonal oy ta Vivlia li buchʼutik makal xchikinike. Mi mu skʼan xalbutik mi oy buchʼu xojtikine xuʼ van jaʼ noʼox xkiktabetik jlikuk vun ti te chal bu nakalutike o li vun sventa chichʼ takel ta ikʼel li krixchanoetik ta tsobajeletike, taje jaʼ sventa xakʼbe mi xojtikin li buchʼu makal xchikine.

8. ¿Kʼuxi xuʼ xichʼ koltael ta yan tsobobbail li jcholmantaletik ta senya kʼope?

⁸ Jun tsobobbail ta senya kʼope xuʼ skʼanbe koltael jun tsobobbail ti te noʼox nopol oy ti bu ep tajek nakal krixchanoetik sventa koʼol spasik sensar jun o chibuk velta ta jabile. Li buchʼu oy ta sba li tsobajel sventa cholmantal ta senya kʼope xuʼ xal kʼuxi ta pasel xchiʼuk xuʼ xjelav jun skʼelobil cholmantal. Mi ta karo chbatik li jujun grupoetike skʼan me xikʼik batel junuk li buchʼu oy ta senya kʼope xchiʼuk skʼan xichʼik batel jun mapa sventa snaʼik lek bu jotukal tspasik sensar.

9. ¿Kʼusi xuʼ jpastik sventa xalik kʼuxi xuʼ jtatik ta saʼel kʼalal ta jchiʼintik ta loʼil bu chchʼay yoʼontonik li buchʼutik makal xchikinike?

⁹ Jech xtok xuʼ xbat yichʼik vulaʼanel ti bu lek xaʼi chchʼay yoʼontonik li buchʼutik makal xchikinike o ti bu tstsob sbaik sventa tstaik koltael ta jun jteklume. Li jcholmantaletike skʼan jechuk slap skʼuʼ spokʼik ti stauk-o ti bu chbatike. Sventa jchiʼintik ta loʼil li krixchanoetike skʼan jsabetik lek smelolal kʼuyelan xuʼ xijnopaj ta stojolal xchiʼuk jaʼ van mas lek mi jun o chib noʼox ta jchiʼintik ta loʼile. Mi chkʼot ta yoʼonton mantale xuʼ xachapik kʼuxi xuʼ xata abaik ta saʼel.

10. ¿Kʼuxi ta saʼel ta pʼolmajebaletik li buchʼutik makal xchikinike?

¹⁰ Yan ti kʼusi xuʼ xichʼ pasele jaʼ ti xichʼ akʼbel senyail ta mapa li pʼolmajebaletik sventa chichʼik vulaʼanel ta mas tsʼakal kʼalal mas xaʼox xokolike. Ta jun mapae xuʼ xichʼ akʼbel senyail jayib gasolinera oy, ta yantik xtoke xuʼ xichʼ akʼbel senyail tintoreriaetik, chukʼob kʼuʼiletik, veʼebaletik, oteletik o yan pʼolmajebaletik. Kʼalal jtos noʼox pʼolmajebal chichʼ alel ta jun mapae xuʼ mas xchanik xchiʼuk xtojobik li jcholmantaletike. Jech kʼuchaʼal liʼe: kʼalal mi laj xaʼox kalbetik jutuk skʼoplal li buchʼu chchʼamvan ta jun otele, xuʼ xichʼ akʼbel jayibuk DVD ta senya kʼop xchiʼuk jun vun ti chalbe skʼoplal li tsobajeletike, sventa xuʼ xakʼbe li buchʼutik te oy ta otel ti makal xchikinike. Ta junantik pʼolmajebale jaʼ noʼox skʼan jakʼtik mi oy junuk j-abtel o junuk jmanolajel ti snaʼ senya kʼope. Mi oy jun chanobvun sventa buchʼu makal xchikinik li ta yosilal bu ta jcholtik mantale xuʼ xkakʼtik junantik li kʼusitik lokʼemik ta DVD sventa xakʼ ta svivliotekaike.

11. ¿Kʼu yuʼun tsots skʼoplal sventa cholmantal li sensoe?

¹¹ Jun abtelal ti toj tsots skʼoplale. Xuʼ van vokol chkaʼitik saʼel li krixchanoetik ti yan-o skʼopike. Bateltik li krixchanoetike xtal xbatik noʼox, jaʼ yuʼun mu stakʼ ti oy-o lek jun slistail li bu nakalike. Pe ta junantik lume, saʼel li krixchanoetik taje jaʼ xa jun abtelal ti toj tsots skʼoplal sventa li cholmantale. Li Jeovae ti jaʼ yakʼojbutik li abtelal taje mu xtʼujvan (Hech. 10:34). «Li stuque tscʼan ti acʼo coluc scotol cristianoetique, xchiʼuc ti acʼo lic yotquinic li cʼusi melele.» (1 Tim. 2:3, 4.) Jaʼ yuʼun koʼol xij-abtej xchiʼuk Jeova xchiʼuk li ermanoetik ta saʼel li krixchanoetik ta skotol kʼopetik «ti chcʼot lec ta yoʼntonique [xchiʼuk] ti jun yoʼnton chchʼunic oe» (Luc. 8:15).

[Rekuadro ta pajina 5]

Jkolta jbatik ta jujuntal

Ta jun tsobobbail o grupo ti jot-o lum bu likem tal skʼopik ti oy ta yoʼonton chkoltavan ta saʼel mas krixchanoetike, li jkʼelcholmantale xuʼ xchiʼin ta loʼil li moletik ta tsobobbail ti mas nopolike. Jaʼ lek ti xkʼopojik batel ta tsobobbailetik ti nopol noʼoxe. O xuʼ xkʼopojik ta tsobobbailetik ti chcholbeik mantal krixchanoetik ti jot-o to lum bu likem tal skʼopike. Li ta tsobobbailetik taje chichʼik albel li jcholmantaletik ti akʼo stsakik ta vun bu nakal mi oy la staik jun krixchano ti chkʼopoj ta yan kʼope xchiʼuk ti xakʼbeik li jkʼelcholmantale, vaʼun li stuke chakʼbe li grupo o li tsobobbail ti la skʼan koltaele. Li jkʼelcholmantal ta tsobobbailetik ti te tsakal skʼoplalike xuʼ xchapik sventa xabtelanik lek sjunul li bu staojik ti oy buchʼutik chkʼopojik ta yan kʼope, mi jech chichʼ pasele xuʼ xalbeik li tsobobbail o grupo ti bu nakal li krixchanoetik taje.

Jech xtok, mi oy jun jcholmantal la sta jun krixchano ti yan-o skʼop (o li buchʼu makal xchikine) xchiʼuk ti oy ta yoʼonton mantale, skʼan me snojes ta anil li vun Sírvase visitar (S-43-S) xchiʼuk skʼan xakʼbe li sekretario ta tsobobbaile. Mi jech ta jpastike anil me chichʼ koltael ta mantal li jun krixchanoe (kʼelo km 5/11 paj. 3).

[Rekuadro ta pajina 6]

Kʼuxi xuʼ jsaʼtik li buchʼutik chkʼopojik ta yan kʼope

• Xuʼ jakʼbetik li buchʼu ta jchanubtastik ta Vivliae, li kutsʼ kalaltike, li jchiʼiltik ta abtele o yan buchʼutik.

• Ta junuk directorio sventa telefono xuʼ van jsaʼtik biiletik ti mas nopem xaʼiik stunesel li krixchanoetik ti yan-o skʼopike. Jech xtok, oy vunetik ti chalbe sbi xchiʼuk bu nakal li jun krixchanoe xchiʼuk xuʼ xichʼ tael ta Internet o ta junuk empresa sventa telefono.

• Xuʼ lek noʼox smelolal jsaʼtik li butik chkʼot epal krixchanoetike, xuʼ van ta vivliotekaetik, ta s-ofisina j-abteletik yuʼun ajvalil xchiʼuk ta chanobvunetik.

• Jkʼeltik mi oy aʼyej ta periodiko ti oy kʼusi tspasik li buchʼutik yan-o skʼopike.

• Batik ta pʼolmajebaletik ti nopem xaʼi te chkʼotik li buchʼutik yan-o skʼopike.

• Kʼalal jkʼanojtik xaʼox permisoe jlatstik vunetik ta jun mexa ta xokon pʼolmajebaletik, ta universidad o li bu chkoti karoetik ti jnaʼojtik te chkʼotilan li buchʼutik yan-o skʼopike.

• Mi muʼyuk tskontrain smantaltak ajvalile, jmantik junuk directorio o jtojtik junuk programa ta Internet ti xuʼ skoltautik saʼele.

[Rekuadro ta pajina 7]

Kʼusi xuʼ xichʼ alel kʼalal chichʼ pasel sensare

Kʼalal lek noʼox stseʼet jsatik, jamal ta jkʼopontik xchiʼuk chkalbetik noʼox li kʼusi ta jkʼan chkalbetik li krixchanoetike muʼyuk me kʼusi chopol tsnopik ta jtojolaltik. Li kʼusi jtunele jaʼ ti baʼyel xkakʼbetik yil jlikuk vun ti oy ta skʼope.

Mi laj xaʼox jkʼopontike, xuʼ xi xkaltike: «Yakalunkutik saʼel li buchʼutik chkʼopojik ta ______ sventa chkalbekutik li spatobil oʼontonal chal Vivliae. ¿Mi oy buchʼu xavojtikin ti jech chkʼopoje?».

Kʼalal ta jsaʼtik li buchʼutik makal xchikinike, xuʼ xi xkaltike: «¿Mi liʼote? ¿Mi xuʼ xkakʼbot avil li video liʼe? [Ta jun stijobil DVD ti stakʼ kuchele, akʼbo yil junuk versikulo ta Traducción del Nuevo Mundo ta senya kʼop.] Liʼe jaʼ jun versikulo ta Vivlia ta senya kʼop sventa México. Oy jchapanojkutik epal videoetik ti tskolta ta mantal li buchʼutik makal xchikinike, li videoetik taje ta moton chkakʼkutik. ¿Mi oy buchʼu xavojtikin ti makal xchikin o ti mu xaʼi lek ti snaʼ senya kʼope?». Mi mu xvul ta sjol yileluke, jakʼbo mi oy yiloj ta yabtel, ta chanobvun o te noʼox ta stsʼel sna junuk krixchano ti makal xchikine.