LI JKUXLEJALTIKE
Jkolta jbatik ta xcholbel mantal li krixchanoetik ti jeltos skʼopike
Kʼalal chichʼik kʼoponel ta skʼop stukik li krixchanoetike toj lek chchikintaik li mantal sventa Ajvalilal yuʼun Diose. Jaʼ yuʼun xuʼ van li ta Pentekostes ta sjabilal 33, li Jeovae laj yakʼ ti akʼo xaʼiik lekil aʼyejetik ta skʼop stukik li judaetik «ta yantik lum» akʼo mi yikʼaluk van lek ojtikinbil li skʼopik jech kʼuchaʼal li evreo o li griegoe (Ech 2:5, 8). Li avie, oy tsobobbailetik ta jeltos kʼopetik ti koʼol bu ta xcholik mantale. ¿Kʼusi stakʼ pasel sventa mu jecheʼuk noʼox xakʼik persa xcholel mantal li ermanoetik taje xchiʼuk ti jecheʼ noʼox chbat xcholbeik mantal li krixchanoetik ti yan-o skʼopike?
Skʼan xichʼ chapbel skʼoplal (Pr 15:22): Li jkʼelcholmantaletike skʼan snopik lek xchiʼuk ti skʼelik lek kʼu yelan xuʼ xichʼ cholel mantal ti lekuk xaʼiik li yan tsobobbailetik eke. Li tsobobbailetik ta yan kʼope yikʼaluk van mas lek chaʼiik ti mu jcholtik mantal ti bu sbainojik ta skoj ti bikʼit noʼox ti bu chcholik mantale. Akʼo mi jech, mi toj ep krixchanoetik ti bu sbainojik xcholel mantale xchiʼuk ti muʼyuk mas chkʼotik ta cholmantal tee, yikʼaluk van mas lek chaʼiik ti jcholtik batel mantal ta skotol li naetike xchiʼuk ti xkalbetik li tsobobbail mi oy buchʼu lek la xchikinta mantal ti koʼol skʼopike (od-S paj. 93 par. 37). O xuʼ van skʼanbutik koltael li ta jtsobobbailtik sventa xichʼ tael li buchʼutik jaʼ jech skʼopik kʼuchaʼal stukike, vaʼun jaʼ tstsʼibaik ti bu stukʼil nakal li jun krixchanoe (km 7/12 paj. 5, rekuadro). Teuk me ta joltik ti xuʼ van snaʼik yan kʼopetik li ta jpʼej nae. Skʼan me xichʼ tsakel ta venta li mantaletik oy ta sventa jujun krixchano kʼalal chichʼ nopel ti kʼu yelan chichʼ cholel mantal ti bu kʼalal jbainojtike.
Skʼan jkolta jbatik (Ef 4:16): Skʼan me jchʼuntik lek li kʼusi chal li jkʼelcholmantale. ¿Mi oy buchʼu chkakʼbetik estudio ti maʼuk jech skʼop ti bu jtsobobbailtike? Yikʼaluk van mas anil xchʼi ta mantal mi jaʼ ch-akʼbat estudio yuʼun li buchʼu te oy ta jun tsobobbail o junuk grupo ti jaʼ jech chkʼopoj kʼuchaʼal li jun krixchanoe.
Skʼan jchapan jbatik (Pr 15:28; 16:1): Mi oy la ata junuk krixchano ti bu abainojik xcholel mantal ti yan-o skʼope, akʼo persa ta xcholbel mantal. Sventa chapalukot noʼoxe nopo kʼusitik van kʼopal chkʼopojik ti bu abainojik xcholel mantale, vaʼun yaleso ta Internet li Vivliae xchiʼuk junantik videoetik li ta kʼopetik taje. Jech xtok, xuʼ xatunes li aplikasion JW Language sventa xachan jpʼelchaʼpʼeluk kʼop ta jeltos kʼopetike.