Tojobkutik batel mas li ta cholmantale: Cholbo me mantal skotol li krixchanoetike

¿KʼU YUʼUN TSOTS SKʼOPLAL? Li Sakariase laj yal ta jun albil kʼop ti chnopajik tal «ta jujuchop cʼop ta scotol banamil» sventa chaʼiik mantal li krixchanoetike (Zac 8:23). Pe, ¿buchʼu chchanubtasvanik? (Ro 10:13-15). Voʼotik oy ta jbatik yalbel xchiʼuk xchanubtasel li krixchanoetik ti bu ta jcholtik mantale (od-S paj. 84 par. 10, 11).

¿KʼUXI TA PASEL?

• Chapano aba. ¿Mi oy ataoj krixchanoetik ti yan-o skʼop chkʼopojike? Xuʼ xatunes li aplikasion JW Language sventa xanaʼ kʼusi xuʼ xaval li ta cholmantale. Jech noxtok, xuʼ xatunes li aselular o atavleta sventa xavakʼbe yil li krixchano ti xuʼ sta yan mantal ta yantik kʼopetik li ta jpajinatik ta jw.org.

• Kʼelo li kʼusitik oy ta apat axokone. Mi yakal chachol mantal ta naetike, cholbo me mantal li buchʼu te chjelavike xchiʼuk li buchʼutik tsmala skaroalike. Mi jaʼo chachol mantal ta karitoe, jaʼuk me xavakʼ ta avoʼonton yalel li lekil aʼyeje.

• Akʼo me ta avoʼonton. Mu me xachibaj. Sut kʼelo li buchʼu muʼyuk te la ata ta snae. Akʼo persa ti xachiʼin ta loʼil li buchʼutik te chata ta snae, mi muʼyuk buchʼu te la atae xuʼ van sut akʼel ta mas tsʼakal o jaʼ to xbat akʼel ta yan kʼakʼal. Jlom krixchanoetike ta karta van skʼan jcholbetik mantal, ta telefono o jaʼo kʼalal ta jtatik ta kayee.

• Jech-o me xachiʼin ta loʼil li krixchanoe. Sutan noʼox me batel sventa xatijbe mas yoʼonton. Mi yan-o skʼop chkʼopoje, saʼo junuk jcholmantal ti jmoj skʼopik sventa skolta li krixchanoe. Pe jechuk-o me xbat akʼel mi muʼyuk to chkʼot skʼel li buchʼu koʼol skʼopik xchiʼuke (od-S paj. 93, 94 par. 39, 40).

MI LAJ AKʼEL LI VIDEO XCHOLEL MANTAL «KʼALAL TO TA NAMAL BALUMIL», TAKʼIK LI SJAKʼOBILTAK LIʼE:

• 

  ¿Kʼuxi la xchapan sbaik li ermanoetik sventa xbat xcholik mantal ta jun namal osile? (1Ko 9:22, 23).

• 

  ¿Kʼusi vokolil la snuptanik?

• 

  ¿Kʼusitik bendisional la staik?

• ¿Kʼusi xuʼ xapas sventa xachiʼin ta loʼil li krixchanoetik bu chachol mantale?