Jtunestik tratadoetik sventa jcholtik li lekil aʼyejetike
1. ¿Kʼuxitik tunesbil li tratadoetik ta s-organisasion Jeovae?
1 Li s-organisasion Jeovae ta epal jabil stunesoj tratadoetik sventa xichʼ pukel batel li lekil aʼyejetike. Li ta sjabilal 1880 li C. T. Russell xchiʼuk xchiʼiltake lik slokʼesik tratadoetik sventa tspukbeik batel li buchʼutik tskʼelik li revista Watch Tower. Tsots tajek skʼoplal li tratadoetik taje, yuʼun li ta 1884 kʼalal li ermano Russell laj yakʼ ta ojtikinel ta stojolal ajvalil li organisasion ti jaʼ sventa chichʼ pukel batel li lekil aʼyejetike, ti maʼuk sventa tspasik-o kanale, li jpʼel kʼop tract («tratado») xie, te tsakal skʼoplal kom li ta sbi organisasion Zionʼs Watch Tower Tract Society (li avie ojtikinbil kʼuchaʼal Watch Tower Bible and Tract Society of Pennsylvania). Li ta sjabilal 1918 li Jchanolajeletik ta Vivliae laj xaʼox spukik mas ta 300 miyon li tratadoetike. Li avie toj jtunel-o sventa cholmantal.
2. ¿Kʼu yuʼun toj jtunel li tratadoetike?
2 Kʼu yuʼun toj jtunelik. Li tratadoetike lekik ta kʼelel xchiʼuk ep skoloral yichʼoj. Yichʼoj tal aʼyejetik ti lek xaʼiik xchikintael li krixchanoetike xchiʼuk ep kʼusi chalbe skʼoplal ta jpʼelchaʼpʼel noʼox kʼop. Li krixchanoetike lek chaʼi sbaik mi laj kakʼbetik tratadoe jaʼ mu sta mi laj kakʼbetik livro o revistae. Manchuk mi achʼ jcholmantaletik o mi ololetik xuʼ xakʼik li tratadoe. Ta skoj ti bikʼit noʼoxe, lek xkichʼtik batel ta buyuk noʼox.
3. Alo junuk loʼil ti jech kʼotem ta akuxlejale o jaʼ li kʼusi chal li vunetik ti chakʼ ta ilel ti oy sbalil li tratadoetike.
3 Epal krixchanoetike laj yojtikinik mantal ta skoj li tratadoe. Jech kʼuchaʼal liʼe, jun ants ti te nakal ta Haitie la sta jun tratado ta kaye, kʼalal la skʼele xi laj yale: «Liʼe jaʼ li kʼusi melele». Ta tsʼakale bat li ta Salon sventa Tsobobbaile, lik xchan Vivlia xchiʼuk laj yichʼ voʼ. ¡Taje jaʼ koliyal li svuʼel Skʼop Dios ti te tsʼibabil ta jun tratadoe!
4. ¿Kʼusi oy ta koʼontontik stael kʼalal chkakʼtik li tratadoe?
4 Li cholmantal ta naetike. Ta skoj ti jaʼ jun lekil abtejebal ta cholmantal li tratadoe, li ta noviembree te chlik yichʼ tunesel-o bateltik ta junantik u. Ta melel, li kʼusi oy ta koʼontontike jaʼ ti jchiʼintik-o ta loʼil li krixchanoetike, maʼuk ti naka noʼox chkiktabetik komele. Mi kʼot ta yoʼonton mantal ta sba velta vulaʼal o kʼalal ta jchaʼvulaʼantik li krixchanoe, xuʼ xkalbetik smelolal kʼuyelan ta chanel Vivlia xchiʼuk li livro Chchanubtasvane o yan vunetik. ¿Kʼuxi xuʼ xkakʼtik li tratadoetike? Ta skoj ti ep ta tose, baʼyel skʼan jchantik lek, vaʼun xuʼ xa xkakʼtik.
5. ¿Kʼuxi xuʼ xkakʼtik tratadoetik kʼalal ta jcholtik mantal ta naetike?
5 Sventa jlikes jloʼiltike skʼan jtsaktik ta venta li kʼusi tratadoal chkakʼtike xchiʼuk ti bu ta jcholtik mantale. Ta baʼyele xuʼ xkakʼbetik tratado li krixchanoe. Xuʼ van labal chil li skoloral ta baʼyel pajinae. Li yan kʼusi xuʼ jpastike, jaʼ ti xkakʼbetik yil jayibuk tratado sventa tstʼuj ti bu lek chile. Mi mu skʼan sjam snaik li bu ta jcholtik mantale xuʼ jchʼiktik komel ta stiʼ snaik ti bu xilike, o xuʼ jakʼbetik mi xuʼ jtikʼbetik ochel ta yolon stiʼ sna sventa xalbutik li kʼusi tsnope. Mi oy kʼusi chichʼ jakʼel li ta tratadoe xuʼ jakʼbetik kʼusi tstakʼ li yajval nae o mi moʼoje xuʼ jakʼbetik yan sventa x-ayan ta yoʼonton xchiʼuk xuʼ jchiʼintik-o ta loʼil. Vaʼun xuʼ jkʼelbetik jvokʼuk li ta tratadoe sventa stakʼ li sjakʼobiltak ti te chvinaje o kakʼtik ti akʼo xal li kʼusi tsnope. Lek ti jkʼelbetik tekstoetik ta Vivlia ti lek jamal chalbe smelolale. Mi laj xaʼox jchiʼintik ta loʼile kalbetik kʼusi ora xchiʼuk jayib ora chbat jchaʼvulaʼantik. Mi nopem xaʼi jtsobobbailtik ti chiktaik vunetik mi muʼyuk te li yajval nae, xuʼ xkiktatik ti bu mu xilik li buchʼutik te ch-echʼike.
6. ¿Kʼuxi xuʼ xkakʼtik tratadoetik kʼalal ta jcholtik mantal ta kayeetike?
6 Kʼalal ta jcholtik mantal ta kayeetike. ¿Mi oy atunesoj tratado kʼalal chachol mantal ta kayeetike? Jlom krixchanoetike sujom xa bu chbatik ti mu skʼan xpajik sventa jchiʼintik ta loʼile, jaʼ yuʼun mu jnaʼtik mi oy ta yoʼontonik li mantale. Ta skoj ti mu jnaʼtik mi tskʼelik li revistaetik ti mas achʼik toe jaʼ lek kakʼbetik noʼox jlikuk tratado. Ti kʼuyelan lek tajek xvinaj li ta baʼyel pajinae xchiʼuk ti ta jpʼelchaʼpʼel noʼox chalbe lek smelolale xuʼ jaʼ xtijbat-o yoʼontonik ta skʼelel jayibuk minuto. Pe mi tskʼan chchikintabutik li krixchanoe xuʼ xkalbetik smelolal kʼusi chal li tratadoe.
7. Alo junantik skʼelobil ti chakʼ ta ilel kʼuxi xuʼ jtunestik tratadoetik kʼalal ta jcholtik mantal ta buyuk noʼoxe.
7 Kʼalal ta jcholtik mantal ta butikuk noʼoxe. Toj kʼun ta cholel mantal ta butikuk noʼox kʼalal ta jtunestik li tratadoetike. Kʼalal mu to chlokʼ batel ta sna li jun ermanoe tskʼel mi chichʼ batel jayibuk tratadoetik. Vaʼun kʼalal oy buchʼu chchiʼin ta loʼile, xuʼ van jaʼ junuk j-abtel ta tienda chakʼbe jlikuk tratado sventa tskʼel. Jun nupultsʼakale batik ta xanbal ta Nueva York, laj yichʼik batel li foyeto Naciones xchiʼuk yan tratadoetik ta yantik kʼopetik, yuʼun snaʼojik ti te tstaik krixchanoetik ti likemik tal ta yantik balumile. Kʼalal chaʼiik ti chkʼopojik ta yantik kʼop akʼo mi jaʼ jchonolajeletik ta kaye, mi chkux yoʼontonik ta parke, o mi yakal chveʼik ta restaurantee, chakʼbeik jun tratado ta skʼopik.
8. ¿Kʼusi skʼan xal ti xkoʼolaj kʼuchaʼal sbekʼ tsʼunobil li tratadoetike?
8 «Ovolajan noʼox.» Li tratadoetike xkoʼolaj kʼuchaʼal sbekʼ tsʼunobil. Kʼalal tstsʼunolajike oy bateltik ti vijbil noʼox tspasike, yuʼun mu snaʼik ti bu jpʼejukal chvokʼ tale. Jaʼ yuʼun xi chal li ta Eclesiastés 11:6: «Ovolajan noʼox ta sob xchiʼuc ta mal cʼacʼal, yuʼun mu xanaʼ bu junucal lec chbat, me jaʼ ti baʼyuc laj atsʼune o me jaʼ ti bu tsʼacal laj atsʼune, o me xchibal lec chbat». Jech oxal, kaltik-o echʼel li kʼusi «puru sventa bijubtasel» yichʼoj li tratadoetike (Prov. 15:7).
[Tsʼib ti mukʼtik sletraile ta pajina 3]
Ta skoj ti jaʼ jun lekil abtejebal li tratado kʼalal ta jcholtik mantale, li ta noviembree te chlik yichʼ tunesel-o batel junantik u.