¡Kʼupil sba pasbil li achʼ tratadoetike!

1. ¿Kʼusitik vunal achʼ to lokʼ ti kʼupilik sba pasbile?

¹ Laj yichʼ akʼel voʼlik achʼ tratado li ta mukʼta tsobajel ta oxib kʼakʼal ta 2013 ti xi sbie: «¡Li Skʼop Diose jaʼ melel!». Pe maʼuk noʼox taje, yuʼun lokʼ xtok li tratado Aʼyejetik sventa Ajvalilal yuʼun Dios num. 38 ti jaʼ sbi: «¿Mi xuʼ to van xkuxiik yan velta li buchʼutik chamemike?». Toj kʼupil sba pasbil svaklikal, yuʼun achʼ to jech lik lokʼuk tal. ¿Kʼu yuʼun ti jech xa laj yichʼ pasel tale? ¿Kʼuxi xuʼ xijtojob ta stunesel ti kʼu yelan pasbil mi lik jpuktik ta naetike?

2. ¿Kʼusi tskoltautik spasel li achʼ tratadoetike?

² ¿Kʼu yuʼun jelel xa pasbil? Oy onoʼox chantos ti kʼusi skʼan jpastik sventa lekuk jcholtik mantal li ta naetike: 1) Sventa xlik jloʼiltike ta jakʼbetik kʼusi tsnop li yajval nae. 2) Ta jkʼelbetik kʼusi chal li Vivliae. 3) Chkakʼbetik jlikuk vun sventa skʼel. 4) Oy kʼusi ta jakʼbetik ta slajebal, vaʼun chkalbetik ti chijsut ta yan kʼakʼal sventa jtakʼbetike. Ti kʼu yelan laj yichʼ pasel li achʼ tratadoetike jaʼ sventa mu tsotsuk xkaʼitik ta spasel xchantosal taje.

3. ¿Kʼuxi chkakʼtik li achʼ tratadoetik ta cholmantale?

³ Kʼuxi ta jtunestik. 1) Mi laj xaʼox jkʼopontik li yajval nae kakʼbetik yil li kʼusi tsjakʼ ta slikebal li tratado ti oy jayibuk stakʼobile, vaʼun akʼo yal kʼusi tsnop. 2) Jamo li tratado sventa xakʼelik ti bu chal «Li kʼusi chal li Vivliae». Mi xuʼ chavile kʼelbo ta Vivlia li teksto te chale. Jech xtok, mi xokol toe kʼelik ti bu chal «Ti kʼuxi ta jtabetik sbalil kʼalal ta jnaʼtike». 3) Akʼbo li tratadoe, vaʼun albo ti akʼo stsutses skʼelel kʼalal xuʼ yuʼune. 4) Kʼalal mu to chasut batele akʼbo yil ti bu chal «Jakʼbo aba» ti xi ta slajeb li tratadoe, vaʼun chapo akʼopik kʼusi ora chakʼelbeik li stakʼobil chakʼ Vivliae.

4. ¿Kʼuxi ta jtunestik li achʼ tratadoetik kʼalal oy buchʼu ta jchaʼvulaʼantike?

⁴ Kʼun ta tunesel xtok kʼalal chijchaʼvulaʼanvane. Yuʼun jaʼ noʼox ta jkʼelbetik li teksto te ta yolon li kʼusi la jakʼbetik kʼalal lij-ay ta sba veltae. Vaʼun mi chijbat xae kakʼbetik yil slokʼol li foyeto Lekil aʼyejetik yakʼoj Dios ti te chvinaj ta slajeb li tratadoe, jlokʼes li jfoyetotike, vaʼun kakʼbetik yil li xchanobil ti jaʼ chalbe mas smelolal li kʼusi la jloʼiltatike xchiʼuk kakʼbetik li foyetoe. Mi la stsak une chapo akʼopik kʼusi ora chasut sventa jmoj xachanik. Vaʼun, ¡laj xa me alikes jun chanubtasel ta Vivlia! Mi jaʼ muʼyuk xavakʼbe li foyetoe xuʼ xavakʼbe yan tratado, vaʼun chapik kʼusi ora xuʼ xasut sventa jmoj xachanik.

5. ¿Kʼu yuʼun toj jtunel kuʼuntik ta cholmantal li tratadoetike?

⁵ Oy xa mas ta 130 jabil ta jtunestik ta cholmantal li tratadoetike. Manchuk mi jelajtik kʼu yelan xchiʼuk kʼu smukʼul pasbil talel, toj jtunel kuʼuntik ta cholmantal. Jaʼ yuʼun tojobkutik me ta stunesel sventa jpukbetik batel skʼoplal ta spʼejel Balumil li pʼijilal ta Vivliae (Prov. 15:7 sbavokʼal).