«Muʼyucuc cʼop avuʼunic achiʼuquic scotol» krixchanoetik
1. ¿Kʼusi beiltasel ta Vivlia skʼan teuk ta joltik mi ch-ilinik kʼalal ta jcholbetik mantal ta snaik li krixchanoetike?
1 Li steklumal Jeovae jun yoʼontonik, jech oxal jaʼ sventa jun oʼontonal li mantal chcholbeik skʼoplale (Is. 52:7). Akʼo mi jech, junantik krixchanoetike ta x-ilinik kʼalal chbat jcholbetik mantal ta snaike. Jkʼeltik kʼusi tskoltautik sventa jun noʼox koʼontontik xchiʼuk mu xij-ilin ta stojolalik (Rom. 12:18).
2. ¿Kʼu yuʼun tsots skʼoplal ti mu kʼusi chopol jnoptik ta anile?
2 Mu chopoluk kʼusi jnoptik ta anil. Junantik krixchanoetike mu skʼan xchikintaik li mantale, jaʼ yuʼun ch-ilinik, pe oy junantike yan-o srasonal ti kʼu yuʼun ilinem chkʼot jtatike. Xuʼ van jaʼo oy kʼusi kʼot ta stojolal o ilinem ta skoj ti oy svokole. Pe mi jaʼ ch-ilinik-o ti ta jcholbetik mantale xuʼ van jaʼ ta skoj ti xchʼunojik li kʼusitik chalik yantik ta stojolal yajrextikotak Jeovae (2 Cor. 4:4). Mi chkaʼibetik smelolal ti maʼuk noʼox ta skoj ti mu skʼan xchikinta mantal li krixchanoetike xchiʼuk ti mu kʼusi chopol jnoptik ta anile jaʼ me tskoltautik sventa mu xij-ilin (Prov. 19:11).
3. ¿Kʼutik yelan chkakʼtik ta ilel ti chkichʼtik ta mukʼ li yajval naetike?
3 Ichʼvankutik ta mukʼ. Epal krixchanoetik ti bu ta jcholtik mantale meʼinem ta yoʼontonik li kʼusitik xchʼunojike (2 Cor. 10:4). Melel onoʼox ti ta jujuntal tsnopik mi chchikintaik o mi moʼoj li mantale. Skʼan me jtsaktik ta venta li kʼusi xchʼunojik li buchʼu ta jcholbetik mantale xchiʼuk mu me stakʼ xkakʼbetik snop ti mu kʼusi snaʼike. Mi chalbutik ti akʼo xijbate skʼan jchʼuntik ta slekil noʼox koʼontontik.
4. ¿Kʼusi smakoj ti «oyuc me lec smuil» xijkʼopoje?
4 Ta slekiluk koʼontontik xijkʼopoj. Akʼo mi chopol chkichʼtik takʼbel, pe li voʼotike skʼan «oyuc me lec smuil» xijtakʼav, taje jaʼ skʼan xal ti vinajuk slekil koʼontontik xchiʼuk ti mu xij-iline (Col. 4:6; 1 Ped. 2:23). Mu stakʼ jsaʼtik kʼop, jaʼ lek jkʼeltik kʼusi koʼol jchʼunojtik ti xuʼ jaʼ xlik-o jloʼiltike. Jkʼeltik kʼu yuʼun mu jechuk tsnop kʼuchaʼal voʼotik li yajval nae. Pe sventa mu x-ilin mas li yajval nae, bateltike jaʼ lek ti xijbat noʼoxe (Prov. 9:7; 17:14, Ch).
5. ¿Kʼusitik sbalil chichʼ tael kʼalal muʼyuk ta jsaʼtik kʼop ta cholmantale?
5 Mi muʼyuk ta jsaʼtik kʼop xchiʼuk li krixchanoetik ta cholmantale xuʼ jaʼ xtijbat-o yoʼontonik ta xchikintael mi laj yichʼik cholbel mantal ta yan veltae (Rom. 12:20, 21). Mu jnaʼtik, pe xuʼ van xkʼotik ta yajtunel Jeova li buchʼu tsots chkontrainvanik avie (Gál. 1:13, 14). Akʼo mi xjelik o mi moʼoj, kʼalal chkakʼtik ta ilel slekil koʼontontik xchiʼuk mi jnaʼ spajesel jbatike lek chbat skʼoplal kuʼuntik li Jeovae xchiʼuk ta jlekubtasbetik skʼoplal li chanubtasele (2 Cor. 6:3).