Lekubuk batel mas ti kʼu yelan xijtojob ta cholmantale: kʼuxi xuʼ jtakʼbetik jun krixchano ti ch-iline

Kʼu yuʼun tsots skʼoplal. Kʼalal ta jcholtik mantale oy ta jtatik krixchanoetik ti lek chtakʼavike. Akʼo mi jech, li Jesuse laj xa onoʼox yal ti oy buchʼutik muʼyuk lek chilutike (Juan 17:14). Jaʼ yuʼun mu me labaluk xkaʼitik mi oy bu la jtatik krixchanoetik ti ch-ilinike. Mi oy jech kʼot ta jtojolaltike, skʼan me jech jpastik kʼuchaʼal lek chil li Jeovae, ti jaʼ li Dios chkalbetik batel skʼoplale (Rom. 12:17-21; 1 Ped. 3:15). Mi lek noʼox ta jtakʼtike, jaʼ me mu masuk x-ilin-o li krixchanoe. Jech xtok xuʼ lek kʼusi tsnop ta jtojolaltik li buchʼu ta jchiʼintik ta loʼile xchiʼuk li buchʼutik chilutike, vaʼun xuʼ me mas xa lek chchikintabe li stestigotak Jeova mi bat vulaʼanatuk ta yan veltae (2 Cor. 6:3).

Kʼuxi ta pasel:

Mu me xkap ajol xchiʼuk akʼo ta ilel slekil avoʼonton. Mi jech laj apase jaʼ me mu xlik-o kʼop avuʼunik. Mu me xanop ti voʼot noʼox ch-ilin ta atojolal li krixchanoe (Ecl. 7:9). Yuʼun xuʼ van yakal chil tsots svokol o jaʼo lakʼot kʼalal oy toʼox kʼusi yakal tspase. Pe mi jaʼ chopol chaʼi li mantal kichʼojbetik batele, xuʼ van jaʼ ta skoj ti muʼyuk yaʼiojbe lek smelolale (2 Cor. 4:4).
Ta slekiluk me avoʼonton xachiʼin ta loʼil (Prov. 15:1). ¿Mi laj van atijbe svayel li krixchanoe? ¿Mi laj van xkechan avuʼun li kʼusi toʼox tspase? Melel onoʼox ti mu persauk ta jkʼantik perton kʼalal yakal ta jpastik li abtelal akʼbilutike. Akʼo mi jech, xuʼ xavalbe ti mu yolbajuk jech lakʼot kʼalal oy toʼox kʼusi yakal tspase. Pe ¿mi jaʼ kapem-o sjol ta skoj ti oy buchʼu chopol kʼusi laj yal ta jtojolaltik une? Mi jaʼ jech taje, xuʼ xi xavale: «Xkaʼibe smelolal ti kʼu yuʼun jech kapem ajole. Pe yileluke mu meleluk skotol li kʼusi yalojboxuk ta jtojolalkutike. ¿Mi xuʼ xkalbot smelolal?». Mi oy chopol chil jlomuk li kʼusi ta jpastike, ti xuʼ van jaʼ ta skoj ti kʼu yelan chkiltik li buchʼutik lokʼesbil ta tsobobbail o ta sventa li yichʼel chʼichʼe, xuʼ xi xkalbetike: «Xkaʼibe smelolal, yuʼun oy xa onoʼox buchʼu jech yalojbunkutik. Pe ¿mi xuʼ xkakʼbot avil ta Vivlia ti kʼu yuʼun jech jchʼunojkutike?».
Mi solel kapem sjol li krixchanoe, jaʼ van lek ti xijlokʼutik echʼel xchiʼuk ti mu kʼusi xkalbetike. Mi laj yal ti mu xa skʼan ti akʼo xichʼ vulaʼanel yuʼun li stestigotak Jeovae, skʼan me ti jechuk jpastike.

Paso jech sjunul u liʼe:

Kʼalal chapasik li yichʼel ta mukʼ Jeova ta avutsʼ avalalike chanilanik kʼusi xuʼ xapasik.
Kʼalal mi lalokʼ xaʼox batel ta stiʼ sna li jun krixchano ti kapem sjole, xuʼ xajakʼbe li achiʼil ta cholmantal mi oy ox kʼusi stakʼ yan xapas ti jechuke.