Jun kampanya ti lek kʼusi chkʼot ta pasel yuʼune

Kʼalal oxib to xemana skʼan li mukʼta tsobajele ta jpuktik vunetik sventa ta jtaktik ta ikʼel krixchanoetik bu ta jcholtik mantal sventa xbatik li ta mukʼta tsobajele xchiʼuk oy lek srasonal kuʼuntik sventa jpuktik li uni vun taje. Li krixchanoetik ti la xchʼamik xa uni vunetik li echʼ jabiletike labal to sba laj yaʼiik li mantaletik jelave xchiʼuk labal to laj yilik ti lek tajek chapanbil li buchʼutik abtejike, ti lek stalelalik xchiʼuk ti lek jmoj oyike (Sal. 110:3; 133:1; Is. 65:13, 14). Ta sventa taje, ¿mi oy kʼusi lek chkʼot ta pasel yuʼun li kampanya mas to kʼalal nom bu ch-echʼ li mukʼta tsobajele?

Kʼalal echʼ xaʼox li mukʼta tsobajel ta oxib kʼakʼal li ta sjabilal 2011, ta jun Betele kʼot skarta jun ants ti nopem xaʼi tsnakʼ sba mi kʼot stestigotak Jeova ta snae, pe jun veltae te la sta ta stiʼ sna li uni vun sventa mukʼta tsobajele. Xi chal li kartae: «Kʼupil sba li jnae xchiʼuk li jmalale toj lek yoʼonton, kaloj mi oy xa kuʼun skotol li kʼusi chakʼ muyubajele. Pe mu jechuk, yuʼun muʼyuk sbalil chkaʼi li jkuxlejale. Ta skoj taje libat ta mukʼta tsobajel li ta sabadoe, akʼo mi la jtsʼot batel jkaro 320 kilometro». La skʼupin tajek li mukʼta tsobajele, jaʼ yuʼun la skʼopon batel smalal sventa chalbe ti muʼyuk ta xkʼot ta sna li vaʼ akʼobale, yuʼun tskʼan to ta xkom li ta domingoe. Xi chale: «Laj kaʼi skotol li mantaletike xchiʼuk laj kojtikinan ep stestigotak Jeova. Ta jkʼan ox yaʼel ti mu stsutse». Kalal sut tale lik xchan Vivlia xchiʼuk kʼalal echʼem xaʼox chanib ue och ta jcholmantal ti muʼyuk yichʼoj voʼe. Xi to chale: «¡Toj lek ti la jta ta stiʼ jna li uni vune! Li avie oy xa sbalil chkaʼi li jkuxlejale».

Melel onoʼox ti oy jlom li buchʼutik ta xchʼamik li uni vune ta onoʼox xbatik li ta mukʼta tsobajele. Jaʼ yuʼun, muyubajkutik noʼox me xij-abtej li ta kampanya ti tsots skʼoplale. Mi oy to sovrail avuʼun li uni vune, ichʼo batel li ta mukʼta tsobajele, taje jaʼ sventa chatunes kʼalal chachol mantal ta buyuk noʼox li ta jteklume.

[Rekuadro ta pajina 5]

¿Kʼusi chkaltik kʼalal chkakʼtik li uni vune?

Mi ta jkʼan chkakʼbetik skotol krixchanoetik li ta yosilal bu ta jcholtik mantale, skʼan mu xijalijutik. Xuʼ van xi noʼox xkaltike: «Ta spʼejel Balumil yakal chichʼ pukel li vunetik liʼe. Tsako, liʼe jaʼ avuʼun. Te chatabe mas skʼoplal». Muyubajan noʼox. Mi jaʼo chlokʼ apuk ta sabado o domingoe xchiʼuk mi jech sta-o chavile xuʼ xavakʼ ek li revistaetike.