Chijtakvan ta ikʼel ta jun tsobajel ti toj tsots skʼoplale
1. ¿Bakʼin chlik jpuktik li uni vunetik ta sventa li mukʼta tsobajel ta oxib kʼakʼal ta 2014?
1 Xijmuyubaj me tajek ta xkikʼtik ta veʼel kamigotaktik o kutsʼ kalaltik kʼalal ta jpas lek jveʼeltik ti stuk noʼox jeche, ti jal yichʼoje xchiʼuk ti ep takʼin chlaje. Jaʼ me jech jal laj yichʼ chapanel jun lekil veʼlil ta mantal ek ti ch-echʼ ta mukʼta tsobajel ta oxib kʼakʼal xchiʼuk ta internasional ta 2014. Jtaojtik jun mukʼta matanal, yuʼun kʼalal oxib xaʼox xemana skʼan xlik li jmukʼta tsobajeltike chlik jtaktik ta ikʼel li krixchanoetik sventa xbatik eke. ¿Kʼusi tskoltautik sventa xijmuyubajuk noʼox xbat kalbetik?
2. ¿Kʼusi tstij koʼontontik sventa tsots xij-abtej li ta kampanyae?
2 Mas to me oy ta koʼontontik tsots chij-abtej ta kampanya mi ta jnoptik kʼu to yepal jtaojbetik sbalil ta jujuntal li lekil veʼlil ta mantal chakʼbutik Jeova ta mukʼta tsobajeletike (Is. 65:13, 14). Skʼan me jnopbetik skʼoplal xtok ti oy kʼusi lek chkʼot ta pasel yuʼun li kampanya ti chichʼ pasel jujun jabile. Yuʼun oy buchʼutik chbat ta mukʼta tsobajel ti laj kakʼbetik yuni vunike. Mu ventauk ti jayvoʼ xbatike, li kʼusi mas tsots skʼoplal ta kampanyae jaʼ ti tskʼupil kʼopta Jeova xchiʼuk chakʼbe ta ilel li slekil yoʼontone (Sal. 145:3, 7; Apoc. 22:17).
3. ¿Kʼuxi ta jpuktik li uni vunetik ta sventa mukʼta tsobajele?
3 Jaʼ me tsnopik moletik ta jtsobobbailtik kʼuxi ta jpuktik li uni vunetik sventa epuk xichʼ pukel li ta naetike, mi chkiktatik ti butik chʼabal yajvale o mi ta jpuktik ta cholmantal ta buyuk noʼox xchiʼuk li grupoe. Li ta jujun sabado xchiʼuk domingoe jmoj chkakʼtik xchiʼuk li revistaetik mi sta-o chkiltike. Jech xtok, mi jmoj yorail kʼot xchiʼuk li baʼyel sabado ti jaʼ sventa ta jlikestik chanubtasel ta Vivliae, jaʼ me mas tsots skʼoplal ti jpuktik li uni vunetik ta sventa mukʼta tsobajele. Kʼalal mi tsuts li kampanyae xijmuyubaj me tajek ta skoj ti tsots lij-abteje xchiʼuk ti la jtaktik ta ikʼel krixchanoetik ti kʼu yepal xuʼ kuʼuntike, yuʼun jmoj ta jmakʼlin jbatik li ta mantal chakʼbutik Jeovae.