Li kampanya sventa Snaʼobil slajel Cristoe chlik ta 1 yuʼun marso
1. ¿Kʼusi ora chlik li kampanya sventa jtaktik ta ikʼel krixchanoetik ta Snaʼobil slajel Cristoe, xchiʼuk kʼu yuʼun mas xa chjalij li jabil liʼe?
1 Li kampanya sventa ta jtaktik ta ikʼel li krixchanoetik ta Snaʼobil slajel Cristoe chlik ta 1 yuʼun marso, akʼo mi jaʼ to chkʼot ta pasel ta 26 yuʼun marso. Kʼuchaʼal chkiltike mas xa chjalij li kampanyae. Taje chkoltavan sventa mas ep krixchanoetik jtaktik ta ikʼel, mas to mi ep tajek yosilal bu ta jcholtik mantale.
2. ¿Kʼusi xuʼ jpastik sventa jpuktik li uni vunetike, xchiʼuk kʼuxi xuʼ jtatik?
2 Kʼuxi ta jpuktik. Li moletik ta tsobobbaile jaʼ chalik kʼuxi chichʼ pukel li butik ta jcholtik mantale xchiʼuk mi chkiktatik komel li ta naetik ti bu muʼyuk te yajvale. Mi laj xaʼox yichʼ vulaʼanel skotol naetik, pe mi oy to kom sovrail li uni vunetike xuʼ xichʼ pukel ti bu oy krixchanoetike. Li jkʼelcholmantale jaʼ oy ta sba skʼelel ti oyuk ep uni vunetik li ta salone. Li ta vunetik taje skʼan te xa tsʼibabil bu ch-echʼ xchiʼuk kʼusi ora li Snaʼobil slajel Cristoe, jaʼ xa noʼox ch-echʼ stsakik ti kʼuyepal chtun yuʼunik ta jun xemana li jcholmantaletike. Skʼan mu teuk xichʼ kajanel skotol li uni vunetike.
3. ¿Kʼusi skʼan teuk ta joltik kʼalal ta jpuktik li uni vunetike?
3 Kʼuxi xuʼ xkakʼtik. Jaʼ me lek ti mu xijalijutike, yuʼun jech mas ep krixchanoetik ta jvulaʼantik. Li ta pajina 4 te oy jun skʼelobil kʼusi xuʼ xkaltik ti xuʼ jeltik jutuk sventa mas lek xkʼot ta yoʼonton li krixchanoetike. Pe mi oy junuk krixchano ti lek chchʼamutike o ti oy kʼusitik tsjakʼe, xuʼ onoʼox jaltik jchiʼintik ta loʼil. Li ta sabado xchiʼuk domingoe xuʼ xkakʼtik xtok li revistaetik mi sta-o chkiltike. Akʼo mi nopem xkaʼitik slikesel chanubtasel ta Vivlia, li ta 2 yuʼun marsoe jaʼ noʼox ta jpuktik li uni vunetike.
4. ¿Kʼu yuʼun skʼan ti sjunuluk koʼontontik jcholtik mantal li ta kampanyae?
4 Ta jkʼantik ti ep krixchanoetik xbatik li ta Snaʼobil slajel Cristoe. Li mantal te chjelave chalbe smelolal li kʼusi yabtel sbainoj ta melel li Jesucristoe (1 Cor. 11:26). Te chkaʼitik kʼuxi xuʼ jbalintik li slajele (Rom. 6:23). Te chalbutik ti toj ep sbalil ti teuk-o ta joltike (Juan 17:3). ¡Ta sjunuluk me koʼontontik jcholtik mantal xchiʼuk muyubajkutik noʼox li ta kampanyae!