Li ta 2 yuʼun avrile chlik jpuktik li uni vun sventa sNaʼobil slajel Cristoe
1. ¿Kʼusi ora chlik jpuktik li vun sventa sNaʼobil slajel Cristo li jabil liʼe, xchiʼuk kʼusitik sbalil chichʼ tael kʼalal jech chichʼ pasele?
1 Li ta 2 kʼalal ta 17 yuʼun avrile chlik jpukbetik svunal li tsobajel mas tsots skʼoplal ch-echʼ li ta jabile, ti jaʼ li sNaʼobil slajel Cristoe. Ta skoj li kampanya chichʼ pasel jujun jabile oy kʼusi lek kʼotemik ta pasel ta stojolal li buchʼutik oy ta yoʼontonik mantale. Jech kʼuchaʼal liʼe, kʼalal jaʼo skʼakʼalil chichʼ pasel jun sNaʼobil slajel Cristoe kʼopoj batel ta Betel jun ants, xi laj yale: «Naka to li vul ta jna xchiʼuk la jta jlik vun ta yolon stiʼ jna. Ta jkʼan chi bat, pe mu jnaʼ lek jayib ora ch-echʼ». Li ermanoe laj yalbe ti xuʼ te sta li ta uni vune. Vaʼun kʼalal tstsuts xaʼox sloʼil li antse, xi laj yale: «¡Chi bat li bu cha tsob abaik tana ta akʼobale!».
2. ¿Kʼusi van xuʼ xkaltik sventa xkakʼtik li vune?
2 Kʼuxi xuʼ jpuktik. Ta skoj ti jayib noʼox kʼakʼal akʼbilutik sventa ta jpuktik li vune, jaʼ lek ti mu xi jalijutik ta loʼile. Xuʼ van xi xkaltike: «Mi te oyot. Ta jkʼan cha kakʼbotkutik jlik uni vun ti bu takbiloxuk ta ikʼel xchiʼuk avutsʼ avalal ta jun tsobajel ti tsots skʼoplal chichʼ pasel ta domingo 17 yuʼun avrile [akʼbo ta skʼob yajval na li vune]. Li tsobajel taje jaʼ sventa li sNaʼobil slajel Cristoe. Te ch-echʼ jun mantal ti bu chichʼ alel kʼuxi xuʼ jtabetik sbalil ti laj yakʼ sba ta matanal li Cristoe. Li vun liʼe chal bu jotukal xchiʼuk ta jayib ora chichʼ pasel li tsobajele».
3. ¿Kʼusi xuʼ jpastik sventa jtaktik ta ikʼel bu kʼalal xuʼ kuʼuntik li krixchanoetike?
3 Mi ep yosilal bu chchol mantal li tsobobbaile, li moletike xuʼ van chalik ti akʼo xichʼ iktael li vunetik ta naetik ti chʼabal te yajvale, jaʼ noʼoxe skʼan jkʼeltik ti lek chʼikiluk xkom kuʼuntik ti bu mu xil li yan krixchanoetike. Oyuk ta avoʼonton stakel ta ikʼel li buchʼutik cha chaʼvulaʼane, avutsʼ avalaltak, achiʼiltak ta chanun, achiʼiltak ta abtel, alakʼnatak o yantik ti xavojtikine. Kʼalal chichʼ pukel li uni vun ta sabado xchiʼuk domingoe xuʼ jmoj xichʼ akʼel xchiʼuk li revistaetik mi jech sta-oe. ¿Mi xuʼ van xa tun ta prekursor auksiliar ta avril sventa mas xa chol mantal li ta kampanya chichʼ pasel ti kʼupil sbae?
4. ¿Kʼu yuʼun ta jkʼantik akʼo xkʼotik ta sNaʼobil slajel Cristo li krixchanoetike?
4 ¡Ep me kʼusitik chchanik li buchʼutik jaʼ to chkʼot ta yoʼontonik mantal ti chbatik ta sNaʼobil slajel Cristoe! Ta xaʼiik ti kʼanvanem tajek li Jeovae, ti jaʼ yuʼun la stak talel xNichʼon sventa tspojutike (Juan 3:16). Ta xchanik kʼusitik tspas li Ajvalilal yuʼun Dios ta stojolal li krixchanoetike (Isa. 65:21-23). Chichʼik albel ti akʼo xchiʼinik ta loʼil jcholvanejetik sventa skʼanik junuk chanubtasel ta Vivlia yoʼ xchanik mase. ¡Ta jkʼanbekutik Jeova ta orasion sventa kʼotuk ta yoʼontonik takel ta ikʼel li krixchanoetik li ta kampanyae xchiʼuk sventa akʼo xchiʼinutik li ta tsobajel sventa sNaʼobil slajel Cristoe!