Ta jpuktik ta spʼejel Balumil li uni vunetik sventa sNaʼobil slajel Cristoe
1. ¿Kʼusi kampanyail stuk noʼox jech chichʼ pasel ta spʼejel Balumil sventa li sNaʼobil slajel Cristoe?
1 «Jech me xapasilanic, yuʼun jech chanaʼilanicun o.» (Luc. 22:19.) Ta sventa ti chichʼ chʼunel li mantal laj yal Jesuse, li yajtuneltak Jeovae ta jtsob jbatik xchiʼuk yan krixchanoetik li ta 30 yuʼun marso ta 2010 sventa ta jvules ta joltik li slajel Jesuse. Jaʼ yuʼun li uni vunetik sventa sNaʼobil slajel Cristoe ta xlik yichʼ pukel ta spʼejel Balumil ta 13 kʼalal ta 30 yuʼun marso.
2. ¿Kʼu yelan xuʼ xkakʼtik li uni vunetike?
2 Kʼuxi ta pasel. Xuʼ xavakʼbe jlikuk uni vun sventa skʼel li lokʼol ta baʼyel pajina li krixchanoe, vaʼun xuʼ xi xavalbee: «Li ta 30 yuʼun marso ta bat kʼakʼale, epal miyon krixchanoetik ta spʼejel Balumil ta jtsob jbakutik sventa chichʼ pasel li sNaʼobil slajel Cristoe. Ta jkʼan chkakʼbot li uni vun liʼe yoʼ xa chiʼinunkutik xchiʼuk avutsʼ avalal. Lek chʼambil chkʼot li avamigotak eke. Liʼ chal bu xchiʼuk ta jayib ora ch-echʼ». Jaʼ ti kʼuyelan chavile, xuʼ xa kʼelbe li Lucas 22:19 sventa xavakʼbe yil li mantal chal akʼo jech jpastike, xuʼ xavalbe li yorail xchiʼuk bu ch-echʼ li tsobajele. Teuk me ta joltik, ti mi toj ep to skʼan pukel ta yosilal chol mantal li uni vunetike, jaʼ lek ti mu xi jalijutik ta loʼile.
3. ¿Buchʼutik xuʼ jtaktik ta ikʼel?
3 Mi ep yosilal bu chchol mantal li tsobobbaile, li moletike xuʼ van chalik akʼo xichʼ iktael li vunetik li ta naetik ti chʼabal te yajval ta jtatik ta sba velta vulaʼale. Ta sabado xchiʼuk domingoe xuʼ jmoj xichʼ akʼel xchiʼuk revistaetik li uni vune. Oyuk ta avoʼonton stakel ta ikʼel li buchʼutik cha chaʼvulaʼane, avajchanuntake, avutsʼ avalaltake, achiʼiltak ta chanune, achiʼiltak ta abtele, alakʼnatake o yantik ti xavojtikine.
4. ¿Kʼusi tstij koʼontontik spasel mi ta jtojbetik ta vokol ti skʼanojutik li Jeovae?
4 Chapano aba sventa ep xa koltavan. Li ta yorail sNaʼobil slajel Cristoe jaʼ me yorail ti xkepajes kabteltik ta chol mantale. ¿Mi xuʼ van xa chʼakbe yorail cha tun ta prekursor auksiliar? ¿Mi oy junuk akerem o atseb o junuk ti buchʼu cha chanubtas ta Vivlia ti yakal xa chchʼi ta mantale? Mi jeche, skʼan xa noʼox xa chiʼin ta loʼil li moletik ta tsobobbail sventa skʼelik mi xuʼ xa x-och ta jcholmantal ti muʼyuk to yichʼojik voʼ sventa xchiʼinutik li ta kampanyae. Mi ta jtojbetik ta vokol ti la spojutik ta slajel xNichʼon li Jeovae, tstij koʼontontik chi jbat li ta sNaʼobil slajel Cristoe xchiʼuk ti chkikʼtik batel xtok ti kʼuk noʼox yepal xuʼ kuʼuntik li krixchanoetik sventa xchiʼinutik li ta tsobajel taje (Juan 3:16).