Bat me jkʼeltik ta ora

Kʼalal lik jtunestik talel li jpajinatik ta Internete, solel epajem tajek li buchʼutik tskʼanik chanubtasel ta Vivliae. Koliyal xtok li cholmantal ta buyuk noʼoxe mas xa ep buchʼutik tskʼanik chanubtasel ta Vivlia. Jaʼ yuʼun ta ora noʼox tskʼel Betel li kʼusitik skʼan pasele. Mi oy buchʼu la skʼan junuk chanubtasel li ta jpajinatik ta Internet ta jw.org, ta xchibal noʼox kʼakʼal ch-albatik yuʼun Betel li moletik ta tsobobbail ti jaʼ oy ta sbaik ti akʼo xbat skʼelik li krixchano ti te oy ti bu chcholik mantale. Akʼo mi jech, kaʼiojkutik ti chjalij tajek sventa xbat vulaʼanatuk li buchʼutik tskʼanik chanubtasel ta Vivliae. ¿Kʼusi skʼan jpastik sventa xbat noʼox jvulaʼantik yoʼ to oy ta yoʼontonik li mantale? (Mar. 4:14, 15.)

Mi oy la ata jun krixchano ti maʼuk te nakal ti bu chachol mantale, nojeso noʼox me ta anil li vun ti jaʼ sbi Sírvase visitar (S-43-S), vaʼun akʼbo noʼox me li sekretario ta atsobobbail kʼalal mi labat ta tsobajele. Li sekretarioe ta stakbe batel ta yokʼomal o ta xchaʼejal noʼox li tsobobbail ti jaʼ oy ta sba skʼelele o ta Betel, jaʼ te chakʼbe klik ti bu chal Congregación li ta jpajinatik ta jw.org. Jech xtok, li moletik ta tsobobbaile skʼan me nopolik noʼox skʼelik li pajina taje. Mi laj yil ta spajinaik ti oy buchʼu skʼan vulaʼanele skʼan me skʼelik ta ora ti buchʼu xuʼ xbat svulaʼane. Akʼo yalbeik junuk jcholmantal ti akʼo xbat noʼox skʼel ta orae. Mi voʼotik laj kichʼtik albel ti akʼo xbat jvulaʼantike, ¿kʼusi skʼan jpastik mi muʼyuk te la jtatik ta snae? Xuʼ xkiktabetik jlikuk uni vun ti bu chal ti kʼuxi xuʼ stautik ta saʼele.