Jtunestik sventa jlikes-o jloʼiltik li foyeto Slikeb loʼil ta sventa li Skʼop Diose
1. ¿Kʼusi achʼ abtejebal oy kuʼuntik ta sventa li cholmantale?
1 Achʼtik toe laj kichʼtik li achʼ foyeto Slikeb loʼil ta sventa li Skʼop Diose. Kakʼojtik xa van venta ti yichʼoj tal jayibuk teksto li ta jujun sjakʼobile, xkoʼolajtik kʼuchaʼal livro Razonamiento, jaʼ yuʼun xuʼ lek xtun kuʼuntik sventa jlikes-o jloʼiltik li ta cholmantale. ¿Kʼuxi xuʼ skoltautik kʼalal ta jchapan jbatik sventa cholmantale?
2. ¿Kʼuxi xuʼ jtunestik ta cholmantal li foyeto Slikeb loʼil ta sventa li Skʼop Diose?
2 Jech kʼuchaʼal liʼe, xuʼ xatunes li sjakʼobil 8, vaʼun xuʼ xi xavale: «Oy jchiʼinojkutik ta loʼil krixchanoetik xchiʼuk kakʼojkutik venta ti tsjakʼbe sbaik mi jaʼ ta smul Dios ti ta jnuptan jvokoltike. [Oy jlom ti bu ta jcholtik mantale mas lek chaʼiik kʼalal chkakʼbetik yilik ta foyeto li sjakʼobile.] ¿Kʼusi chanop li voʼote? [Akʼo stakʼ.] Li Vivliae lek jamal chalbe smelolal». Mi laje xuʼ xakʼelbe xchiʼuk xavalbe smelolal junuk o jayibuk li tekstoetik tee. Mi lek laj yaʼi li krixchanoe, akʼbo yil skotol li sjakʼobiltak ti te oy ta baʼyel pajinae xchiʼuk albo ti xuʼ jaʼ xavalbeik skʼoplal junchibuk li ta yan veltae. Jech xtok xuʼ xavakʼbe li vun ti chkakʼtik-o chanubtasel ta Vivliae xchiʼuk albo ti chalbe to mas skʼoplal li kʼusi jaʼ to laj avalike.
3. ¿Kʼuxi xuʼ jtunestik li foyeto kʼalal ta jcholbetik mantal li buchʼutik xchʼunojik ti oy jun Diose pe muʼyuk xchʼunojik li kʼusi chal Vivliae?
3 Li sjakʼobiltak 4 xchiʼuk 13 kʼalal ta 17 xuʼ me lek xtun kuʼuntik kʼalal ta jcholbetik mantal li buchʼutik xchʼunojik ti oy jun Diose pe muʼyuk xchʼunojik li kʼusi chal Vivliae. Jech kʼuchaʼal liʼe, xuʼ xatunes li sjakʼobil 17 xchiʼuk xi xavale: «Yakal ta jvulaʼankutik uni jlikeluk li utsʼ alaliletik sventa ta jkoltakutike. Yuʼun kakʼojkutik venta ti yantik stsatsaj li svokolike. ¿Kʼusi chanop li voʼote? [Akʼo stakʼ.] Oy epal nupultsʼakaletik ti chakʼik persa yakʼel ta xkuxlejalik li pʼijil tojobtasel liʼe: ‹Li antsetique, acʼo yichʼ ta mucʼ li smalalique›. [Mu persauk chavalbe ti jaʼ te lokʼem tal ta Efesios 5:33. Pe mi jaʼ yakal chacholbe mantal junuk antse, xuʼ jaʼ xavalbe skʼoplal li kʼusi chal ta Efesios 5:28.] Li tojobtaseletik taje, ¿mi tstabeik sbalil xanaʼ mi laj yakʼ ta xkuxlejalik li buchʼutik nupultsʼakalike?».
4. ¿Kʼusi xuʼ xapas mi tsuts xaʼox aloʼil xchiʼuk jun krixchano ti xchʼunoj ti oy jun Diose pe muʼyuk xchʼunoj li kʼusi chal Vivliae?
4 Mi tsuts xaʼox li aloʼilike xuʼ xavalbe ti chasut akʼel ta yan velta sventa chavalbeik mas skʼoplal li kʼusi laj aloʼiltaike. Mi sut akʼele, xuʼ xaloʼiltaik li yan versikulo ti te onoʼox talem li ta sjakʼobil 17 li ta foyetoe. Mi sta-o chavile, albo ti te lokʼemik ta Vivlia li tojobtaseletik laj avalbeik skʼoplale. Mi laj avil ti kʼu yelan chaʼi sba ta sventa li kʼusi laj avalbeik skʼoplal xchiʼuk ti kʼusi tsnop ta sventa li Vivliae, akʼbo komel jlikuk vun ti bu lek chile. (Kʼelo li Kabteltik sventa Dios yuʼun disiembre ta 2013, paj. 3-6.)