Kʼuxi xuʼ jkoltatik sventa xojtikinik Jeova li maʼsatetike
1. ¿Kʼuxi laj yakʼ ta ilel Jesus ti la svul yoʼonton ta stojolal li maʼsatetike?
1 Jutuk xa skʼan xlokʼ batel ta Jeriko li Jesuse. Vaʼun te tal chaʼvoʼ jkʼanlimoxna ti maʼsatetike, xi lik avanikuke: «¡Kajval, [...] oyuk xkʼuxul avoʼonton ta jtojolalkutik!». Li Jesuse xuʼ van jaʼo solel tsvul yoʼonton, yuʼun snaʼoj ti jutuk xa skʼan xchame. Akʼo mi jech, li stuke paj ta xanbal xchiʼuk la stak ta ikʼel li maʼsatetike, vaʼun la xpoxta (Mat. 20:29-34). ¿Kʼuxi xuʼ jchanbetik Jesus ti laj yakʼ ta ilel xkʼuxul yoʼonton ta stojolal li chaʼvoʼ maʼsatetike?
2. Kʼalal ta jtatik maʼsatetik ta kayee, ¿kʼuxi xuʼ jcholbetik mantal?
2 Jkoltatik. Mi oy bu la jtatik junuk krixchano ta kaye ti maʼsate, jchiʼintik ta loʼil xchiʼuk kalbetik mi tskʼan koltael. Li ta slikebale xuʼ van mu spat yoʼonton ta jtojolaltik, ta skoj ti oy buchʼutik chilbajin li maʼsatetike xchiʼuk ti oy kʼusi chopol tspasbeike. Pe mi lek xijkʼopoj xchiʼuk mi oy ta koʼontontik skoltael ta melele, xuʼ van mas jun yoʼonton chaʼi sba. Jech xtok, skʼan me teuk ta joltik ti oy buchʼu solel mu xil jutebuk sakilal osile, pe li jlome xilik jutuk, taje xuʼ skoltautik sventa jnaʼtik kʼuxi xuʼ jkoltatik li krixchanoe. Kʼalal mi laj xaʼox jkoltatike, xuʼ xkalbetik ti yakal ta jpastik jun abtelal ta sventa yakʼel chanubtasel ta Vivliae. Jkʼelbetik junuk teksto ta Vivlia, jech kʼuchaʼal ta Salmo 146:8 o Isaías 35:5 xchiʼuk 6. Jech xtok, xuʼ jkoltatik ta syalesel li kʼusitik pasbil gravar ta jw.org. Mi xtojob skʼelel vun ta braile kʼop li krixchanoe, jakʼbetik mi tskʼan tskʼel vunetik ta braile ti chalbe skʼoplal Vivliae. Mi oy jpʼejuk skomputadora li krixchano ti yichʼoj jun programa sventa chapta tal li kʼusi chichʼ jamel ta spantayaile, xuʼ van stabe sbalil li mantaletik ti muyesbil ta jw.org xchiʼuk li vunetik ti stakʼ yalesel ta jtos formato ti jaʼ sbi RTF. Li formato taje xchiʼuk li kʼusitik pasbil gravare jaʼ noʼox oy ta español xchiʼuk ta yan kʼopetik ti mas ojtikinbilik ta spʼejel Balumile. (Kʼelo li rekuadro «Kʼalal ta jkoltatik jun maʼsate...».)
3. ¿Kʼuxi xuʼ jtatik ta saʼel li maʼsatetik ti bu ta jcholtik mantale?
3 Jsaʼtik li maʼsatetike. Xuʼ van mu jtatik maʼsatetik kʼalal chbat jcholtik mantal ta naetike, yuʼun jutuk mu skotoluk velta mu skʼan xchiʼinik ta loʼil li buchʼutik mu xojtikinike. Jech oxal, skʼan xkakʼtik persa saʼel sventa xuʼ jcholbetik mantal (Mat. 10:11). Mi oy jchiʼiltik ta abtel o ta chanun ti maʼsate jcholbetik me mantal. Mi oy junuk eskuela sventa maʼsatetik ti bu ta jcholtik mantale, jakʼbetik li direktor mi xuʼ xkichʼtik batel jaylikuk vunetik ta braile li ta svivliotekail eskuelae. Jech xtok, ¿mi oy te junuk organisasion ti tskoltaik maʼsatetik o junuk snail maʼsatetike? Xchiʼuk, ¿mi oy buchʼu xkojtikintik ti oy junuk yutsʼ yalal ti maʼsate? Mi jeche, kalbetik li yutsʼ yalale, ti buchʼu chchʼamvan ta snail maʼsatetike o li direktor ta eskuela ti oy ta koʼontontik ta jkoltatik li maʼsatetike, ti oy jvuntik ta braile xchiʼuk ti oy pasbil gravar jlom vunetik ta sventaike. Kakʼbetik yilik ta Vivlia ti yaloj Dios ti tsjambe sat li maʼsatetike. Xuʼ xkakʼbetik yil xtok li video ti xi sbie: «Mu xikuxi yuʼun ti muʼyukuke», te chichʼ tael ta jpajinatik ta Internet jw.org. Li video liʼe te chal sloʼil jun ermano ti maʼsate xchiʼuk ti kʼuxi staojbe sbalil ti oy Svivlia ta braile. Mi jamal chkaltik ti kʼu yuʼun ta jkʼan ta jchiʼintik ta loʼil li maʼsatetike, xuʼ van skoltautik sventa jtatik ta saʼel.
4. ¿Kʼusi chakʼ jchantik li kʼusi la spas Janete?
4 Oy jun ermana ti Janet sbie xchiʼuk ti maʼsate, li stuke ay ta vulaʼal li ta snail maʼsatetike. Vaʼun la xchiʼin ta loʼil jun tseb, xi laj yalbee: «Kʼalal ay ta Balumil li Jesuse la sjambe sat jlom maʼsatetik, taje jaʼ jun skʼelobil laj yakʼ ta ilel li kʼusi tspas ta jelavel ta stojolal skotol li maʼsatetike». Laj yalbeik skʼoplal li kʼusi chal Apokalipsis 21:3 xchiʼuk 4, li Janete laj yalbe smelolal kʼuxi chakʼ kʼotuk ta pasel li Ajvalilal yuʼun Dios taje. Li tsebe, tsʼijil kom jlikel, vaʼun xi laj yale: «Sba to velta ti jech laj yalbun jun maʼsat taje. Yuʼun jutuk mu skotoluk krixchanoetik chalik ti jaʼ la jun kastigo ti chmak jsatike, jaʼ la ta skoj li kʼusi la jpastike o li kʼusi la spasik li jmoltotaktike». Li Janete la stakbe batel ta koreo jun direksion ta Internet ti xuʼ te sta li livro chchanubtasvan[e]. Jaʼ yuʼun li avie chaʼkoj xa ta xemana chchanik Vivlia.
5. Akʼo mi mu xjambe kuʼuntik sat li maʼsatetike, ¿kʼuxi xuʼ jkoltatik?
5 Li Jesuse la sjambe sat maʼsatetik, pe jaʼuk li voʼotike mu xpas kuʼuntik jech. Pe oy kʼusi xuʼ jpastik ek: xuʼ jkoltatik sventa xaʼibeik smelolal li kʼusi melel ta Skʼop Diose. Yuʼun li dios ta sventa li kʼusitik oy ta balumil liʼe smakojbe snopben epal krixchanoetik, oy jlome, batsʼi maʼsatetik ta melel (2 Kor. 4:4). Li Jesuse kʼuxubaj ta yoʼonton li chaʼvoʼ maʼsatetike jaʼ yuʼun la xpoxta (Mat. 20:34). Mi oy ta koʼontontik li maʼsatetik eke, xuʼ me jkoltatik sventa xojtikinik li Jeovae, ti jaʼ noʼox xuʼ xjambat satik xchiʼuk ti x-akʼbatik kuxlejal sbatel osile.