Tojobkutik batel mas li ta cholmantale. Cholbo mantal li maʼsatetike.

¿KʼU YUʼUN TSOTS SKʼOPLAL? Li maʼsatetike muʼyuk lek chaʼi sbaik kʼalal chchiʼinik ta loʼil li buchʼu mu xojtikinike. Jaʼ yuʼun, sventa xuʼ jcholbetik mantale skʼan jnaʼtik kʼuxi ta pasel. Li Jeovae skʼanoj li maʼsatetike xchiʼuk oy ta yoʼonton (Le 19:14). Jchanbetik li stalelal Jeovae xchiʼuk kakʼ ta koʼontontik jkoltatik li maʼsatetike sventa xojtikinik li Diose.

¿KʼUXI TA PASEL?

• Lik saʼo. ¿Mi xanaʼ mi oy buchʼu maʼsat yutsʼ yalal? Li bu chacholik mantale, ¿mi oy van junuk eskuela, jpʼejuk naʼ ti bu chichʼ chabiel li maʼsatekike o organisasionetik ti oy ta yoʼontonik tskʼanik li vunetik ti pasbil sventa maʼsatetike?

• Akʼbo yaʼi ti oy ta avoʼontone. Mi ta slekil avoʼonton chakʼopon xchiʼuk mi oy ta avoʼontone, mas jun yoʼonton xuʼ xloʼilaj. Jaʼ xa loʼiltabe li kʼusi lek chaʼiik xchikintael li bu chachol mantale.

• Koltao sventa xojtikinik Jeova. Li j-organisasiontike ep ta tos kʼutik yelan slokʼesojik vunetik ta jeltos formatoetik sventa xichʼik koltael li maʼsatetike. Jakʼbo kʼusi formatoil tskʼan chchan. Li jkʼelcholmantale skʼan me xakʼ ta yoʼonton xalbe li buchʼu sbainoj skʼanel vunetik sventa jech skʼan talel ti kʼu yelan tskʼan li jun maʼsate.