Tojobkutik batel mas li ta cholmantale: Lik chiʼino ta loʼil junuk krixchano sventa xacholbe mantal

Li Jesuse la xcholbe mantal jun jsamaria ants ta skoj ti oy xa onoʼox kʼusi lik sloʼiltaike. ¿Kʼusi xuʼ jpastik sventa jnaʼtik kʼuxi xuʼ jlikes jloʼiltik xchiʼuk li buchʼu mu xkojtikintike?

• Oyuk slekil avoʼonton xchiʼuk chiʼino ta loʼil li krixchanoetike. Akʼo mi lubem xa ox tajek li Jesuse, lik xchiʼin ta loʼil li antse. ¿Kʼuxi la spas? Jaʼ noʼox lik skʼan j-umuk voʼ yuchʼ. Xuʼ me ta slekiluk koʼonton xlik jchiʼintik ta loʼil li jun krixchanoe, kalbetik skʼoplal ti kʼu yelan li kʼakʼale o ta sventa li kʼusi achʼ to kʼotem ta pasele. Li kʼusi mas tsots skʼoplale, jaʼ ti jlikestik noʼox jloʼiltike, jaʼ yuʼun chaʼa, jaʼuk xavalbe skʼoplal li kʼusi lek chaʼi li krixchanoe. Pe mi muʼyuk lek tstakʼbote mu kʼu xal avoʼonton, bat chiʼino ta loʼil yan krixchano. Kʼanbo Jeova ti akʼo xakʼ stsatsal avoʼontone (Ne 2:4; Ech 4:29).

• Kʼelo kʼusi ora xuʼ xalikes aloʼil yoʼ xavalbe skʼoplal li lekil aʼyej ta sventa li Ajvalilal yuʼun Diose, pe mu me sujbiluk xavaʼi aba. Akʼo persa ti jechuk xakʼopoj ti kʼu yelan onoʼox nopem xavaʼie. Yuʼun mi sujbil chavaʼi aba kʼalal chachiʼin ta loʼil li jun krixchanoe xuʼ me muʼyuk xa lek chaʼi sba xchiʼuk mu xa skʼan xchikintabot. Mu kʼu xal avoʼonton mi muʼyuk xa laj avalbe skʼoplal Jeova ta skoj ti anil noʼox bate. Mi vokol chavaʼi chachol mantale, akʼo persa ti oyuk buchʼu xachiʼin ta loʼile. [Akʼo ta ilel li baʼyel videoe, vaʼun jmoj xavalbeik batel skʼoplal xchiʼuk li tsobobbaile].

• Akʼo persa xcholbel mantal junuk krixchano. Xuʼ xlik avalbe li kʼusi jchʼunojtik sventa oyuk kʼusi xlik sjakʼe. Jaʼ jech la spas li Jesuse, yuʼun oy kʼusi toj labal sba laj yaʼi li jun jsamaria antse, vaʼun oy kʼusi lik sjakʼbe li Jesuse. Kʼalal laj yalbe skʼoplal Ajvalilal yuʼun Dios li Jesuse, jaʼ yakal tstakʼbe li kʼusitik la sjakʼe. [Akʼo ta ilel li xchibal videoe, vaʼun jmoj xavalbeik batel skʼoplal xchiʼuk li tsobobbaile xchiʼuk jech xapas xtok li ta yoxibal videoe].