Lekubuk batel mas ti kʼu yelan xijtojob ta cholmantale: kʼuxi xuʼ jlikes jloʼiltik yoʼ jcholtik mantal ta buyuk noʼoxe

Kʼu yuʼun tsots skʼoplal. Kʼalal ta jcholtik mantal ta naetike oy bakʼintik ti muʼyuk te ta jtatik li krixchanoetike. Akʼo mi jech, xuʼ van te jtatik kʼalaluk oy bu chijbat ta karoe, ti bu chichʼ malael doktoretike, kʼalal ta jkuxtik uni jlikel li ta kabteltike o kʼalal jaʼo lokʼemik ta rekreo li jchanunetike xchiʼuk ta yantik. Yuʼun li kʼusi tskʼan li Jeovae jaʼ ti akʼo xaʼiik li aʼyej sventa Ajvalilal yuʼun Dios skotol li krixchanoetike (1 Tim. 2:3, 4). Jutuk mu skotoluk velta voʼotik baʼyel skʼan jchiʼintik ta loʼil li krixchanoetik yoʼ xuʼ jcholbetik mantale.

Kʼuxi ta pasel:

Kʼelo baʼyel lek mi oy slekil yoʼonton xvinaj li krixchanoe xchiʼuk mi oy ta yoʼonton chloʼilaj. Mi muʼyuk kʼusi xuʼ xtuchʼ-o ta be li aloʼilike. Oy jlom jcholmantaletike tskʼelbeik baʼyel sat li krixchanoe xchiʼuk stseʼet satik chakʼik ta ilel. Mi stseʼet sat xvinaj li krixchanoe chlik xchiʼinik ta loʼil.
Mi chaxiʼ ta xchiʼinel ta loʼil li krixchanoe paso orasion uni jlikeluk ta avoʼonton (Neh. 2:4; Hech. 4:29).
Xuʼ van xlik ajakʼbe bu chbat, kʼu yelan oy o yantik. Li Jesuse muʼyuk lik yalbe ta anil sventa Ajvalilal yuʼun Dios li jsamaria antse (Juan 4:7). Bakʼintike xuʼ xi xlik akʼupil kʼopta li krixchanoe: «Toj lek tspas stalelalik li avalab anichʼnabe». Jech xtok, xuʼ xi xajakʼbee: «¿Mi la avil li notisia echʼ akʼobale?».
Mi lik xa achiʼin ta loʼile, kʼelo kʼuxi xuʼ xavalbe li lekil aʼyeje, pe mu me toj aniluk xavalbe. Kʼalal chachiʼin ta loʼil li krixchanoe mu me toj sujbiluk xaʼi sba. Xuʼ xavalbe jtosuk kʼusi ti xuʼ labal sba xaʼie xchiʼuk ti xuʼ xtijbat yoʼonton sventa oyuk kʼusi sjakʼbote. Jech kʼuchaʼal liʼe, mi yakal chaloʼilaj ta sventa utsʼ alalile, xuʼ xi xlik avalbee: «La jkʼel jun tojobtasel ti toj jtunel ta sventa kʼuxi ta tsʼitesel li alab nichʼnabiletike». Mi yakal chaloʼilaj ta jtosuk notisiae, xuʼ xi xlik avalbee: «Achʼtik toe jaʼ to sba velta laj kil jun lekil notisia». Mu xa chibaj mi tuchʼ noʼox ta be li aloʼil kʼalal muʼyuk toʼox bu acholojbe mantale.
Ichʼo batel tratadoetik o yan vunetik sventa xavakʼbe li buchʼu oy ta yoʼonton li mantale.

Paso jech sjunul u liʼe:

Li ta jujun xemanae akʼo persa xchiʼinel to loʼil krixchano yoʼ xachol mantal ta buyuk noʼox.