Jtabetik sbalil kʼalal ta jchan jvun jtuktike

¿KʼU YUʼUN TSOTS SKʼOPLAL? Kʼalal ta jchan jtuktik li Skʼop Diose tskoltautik sventa xkaʼibetik lek smelolal «ti kʼu sjamleje, ti kʼu snatile, ti kʼu stayleje, ti kʼu snatil [xyal]» li kʼusi melele (Ef 3:18). Tskoltautik xtok sventa muʼyukuk jmultik li ta chopol balumil liʼe xchiʼuk ti lekuk tsʼunul ta koʼontontik «li aʼyej sventa kuxlejale» (Flp 2:15, 16). Kʼalal ta jchan jtuktik li Vivliae xuʼ jaʼ jtʼujtik li kʼusi jnaʼojtik chtun kuʼuntike. ¿Kʼuxi xuʼ masuk to jtabetik sbalil ti kʼu sjalil jchʼakojtik sventa jchantik xchiʼuk xkaʼibetik smelolal li kʼusi chal Vivliae?

¿KʼUXI TA PASEL?

• Jbontik junantik versikuloetik xchiʼuk oyuk kʼusi jtsʼibatik li ta Vivlia ti jaʼ ta jtunestik sventa ta jchan jtuktike, mi ta tavleta, ta selular, ta vun o ta yan kʼusitik.

• Kʼalal yakal ta jchantik batele jnopbentik skʼoplal xchiʼuk jtakʼtik li sjakʼobiltak liʼe: «¿Buchʼu?», «¿Kʼusi?», «¿Bu?», «¿Bakʼin?», «¿Kʼuxi?» xchiʼuk «¿Kʼu yuʼun?».

• Jsabetik skʼoplal. Xuʼ jsaʼtik ta jujun tema o ta jujun versikulo ti jaʼ ta jtunestik li kʼusi oy kuʼuntik sventa jsabetik skʼoplale.

• Jnopbetik skʼoplal li kʼusi ta jchantike, vaʼun jkʼeltik kʼuxi xuʼ jtabetik sbalil.

• Kakʼ ta jkuxlejaltik li kʼusi ta jchantike (Lu 6:47, 48).

MI LA AKʼELIK LI VIDEO TI XIJCHANUNAJ JTUKTIKE TSKOLTAUTIK SVENTA JKʼAN TA SJUNUL KOʼONTONTIK LI SKʼOP DIOSE, TAKʼIK LI SJAKʼOBILTAK LIʼE:

• ¿Kʼu yelan chaʼi sbaik junantik kʼalal chchanunaj stukike?

• ¿Kʼu yuʼun skʼan baʼyel jpastik orasion kʼalal skʼan to xlik chanunajkutike?

• ¿Kʼusi xuʼ skoltautik sventa xkaʼibetik lek smelolal junuk loʼil ta Vivliae?

• ¿Kʼu yelan xuʼ jbontik o jtsʼibatik li Jvivliatik ti jaʼ sventa chijchanunaj-oe?

• ¿Kʼu yuʼun skʼan jnopbetik lek skʼoplal kʼalal ta jchan Jvivliatike?

• ¿Kʼusi xuʼ jpastik kʼalal oy kʼusi achʼ ta jchantike?