Kʼuxi xuʼ jtunestik ti bu chal: «Kʼuxi xuʼ jlikes jloʼiltik»

Ti bu chal: «Kʼuxi xuʼ jlikes jloʼiltike» te lik lokʼuk talel ta pajina 1 li ta Jkuxlejaltik xchiʼuk Kabteltik sventa Dios, programa xchiʼuk bu chijtsʼibaj ta enero ta sjabilal 2018. ¿Kʼuxi ta tunesel?

Li sparte staoj jchanunetike. Skʼan jtunestik li sjakʼobil te taleme, li tekstoe xchiʼuk li kʼusi ta jakʼbetik komele. Akʼo mi jech, maʼuk skʼan xal ti jaʼ xa jech tajek chkaltik ti kʼu yelan chvinaj li ta videoetik sventa jlikes jloʼiltike. Jech kʼuchaʼal liʼe, xuʼ jeltik ti bu ta jcholtik mantale, ti kʼu yelan ta jlikes jloʼiltike o yan kʼusi xuʼ jakʼbetik li krixchanoe. Jech xtok, xuʼ xkakʼtik komel jlikuk vun li ta abtejebaletik sventa xijchanubtasvan akʼo mi muʼyuk te chal ti xuʼ jech jpastike.

Li ta cholmantale. Ti chkichʼtik albel ti kʼuxi xuʼ jlikes jloʼiltike maʼuk skʼan xal ti jaʼ xa jech tajek chkaltik kʼuchaʼal chal ta pajina 1. Mi oy ta yoʼonton mantal li jun krixchanoe xchiʼuk mi tskʼan to tsnabe skʼoplale, xuʼ te jchiʼintik-o ta loʼil, vaʼun xuʼ van jaʼ xa jtunestik li kʼusi chal ta sventa revisitae. Xuʼ jeltik jutuk ti kʼu yelan chkichʼtik albele o xuʼ jeltik li slikeb jloʼiltike. ¿Mi mas van chtun yuʼun li krixchanoetik li slikeb loʼiletik lokʼemik ta yan ue xchiʼuk ti jkʼelbetik yan tekstoe? ¿Mi oy kʼusi jaʼtik to kʼotem ta pasel o mi oy kʼusi jaʼtik to laj yichʼ aʼiel ti jaʼ oy ta yoʼontonik xchikintaele? Mi sta-o chkiltike, xuʼ jech jlikes jloʼiltik ti kʼu yelan talem ta pajina 1, pe teuk me ta joltik li kʼusi oy ta koʼontontike jaʼ ti jpastik skotol ta skoj li lekil aʼyejetik sventa xuʼ xkalbetik batel li yantike (1Ko 9:22, 23).