Mu xavul avoʼonton mi muʼyuk mas kʼusi x-ayan avuʼune

Mu kʼunuk ti ta slajebal kʼakʼal kuxulutike, yuʼun ep kʼusitik ta jnuptantik. Mas to tstsatsaj vokolil ta skoj ti yantik xa xnopaj talel li slajeb choplejale. Xuʼ van mu xa jtatik ta saʼel li kʼusi chtun kuʼuntike (Aba 3:16-18). ¿Kʼusi tskoltautik sventa mu masuk jvul koʼontontik kʼalal chkil jvokoltik ta takʼine? Jaʼ ti jpʼeluk ta koʼontontik ti ta onoʼox skoltautik li Jeovae. Jamal yaloj ti chchabi li yamigotake xchiʼuk ti ta skotol ora chakʼbe li kʼusi chtun yuʼunike (Sl 37:18, 19; Ebr 13:5, 6).

¿Kʼusi xuʼ xapas?

• Kʼanbo Jeova ti akʼo xakʼbot apʼijil, ti akʼo sbeiltasot xchiʼuk skoltaote (Sl 62:8).

• Oyuk ta avoʼonton spasel kʼusiuk noʼox abtelal (g-S 1/10 paj. 8, 9, rekuadroetik).

• Mu me xavikta aba ta spasel li kʼusitik mas tsotsik skʼoplale, jech kʼuchaʼal ti xakʼel Avivlia jujun kʼakʼale, ti xabat ta tsobajeletike xchiʼuk ti xachol mantale.

MI LA AKʼELIK LI VIDEO JVAʼANTIK JPʼEJUK NA TI XKUCH YUʼUNE - «MUYUBAJANIK NOʼOX ME TA SKOJ TI KʼUSI OY AVUʼUNIK AVIE», TAKʼIK LI SJAKʼOBILTAK LIʼE:

• ¿Kʼusitik la snuptanik li utsʼ alaliletike?

• ¿Kʼusi ti mas tsots skʼoplal skʼan xkiltike?

• ¿Kʼuxi xuʼ jkoltatik li buchʼutik chil svokolik ta takʼine?