XCHANOBIL 33
KʼEJOJ 130 Jchantik yakʼel perton
Li tsobobbaile, ¿k’u yelan xuʼ xchanbeik Jeova ti k’u yelan chil li buchʼutik tsots tspas smulike?
«Pe oy jun jkoltavanej kuʼuntik [ . . . ] mi oy la asaʼ jtosuk amulike» (1 JUAN 2:1).
LI K’USI CHALBE SKʼOPLALE
Li ta xchanobil liʼe, ta jkʼeltik kʼusi chakʼ jchantik li kʼusi kʼot ta pasel kʼalal oy buchʼu tsots la spas smul ta tsobobbail ta Korintoe.
1. ¿Kʼusi oy ta yoʼonton Jeova ti akʼo jpastike?
TI KʼU YELAN la spasutik li Jeovae, jaʼ ti xuʼ jnop jtuktik li kʼusi ta jnop ta jpastike. Skotol kʼakʼal jech ta jpastik. Li kʼusi toj tsots skʼoplal skʼan jpastik ta jujuntale jaʼ ti xkakʼbe jkuxlejaltik li Jeovae xchiʼuk ti xijkʼot ta yutsʼ yalale. Li Jeovae oy ta yoʼonton ti jechuk spas skotol li krixchanoetike. ¿Kʼu yuʼun? Yuʼun skʼanojan xchiʼuk tskʼan ti lekuk xbat xkuxlejalike. Jech xtok, oy ta yoʼonton ti lekuk xil sbaik xchiʼuke xchiʼuk ti xkuxiik sbatel osile (Deut. 30:19, 20; Gal. 6:7, 8).
2. ¿Kʼusi oy ta yoʼonton Jeova ti akʼo spas li buchʼutik tsots spasoj smulike xchiʼuk ti muʼyuk to sutesoj yoʼontonike? (1 Juan 2:1).
2 Li Jeovae muʼyuk tsujutik sventa xijtun ta stojolal, yuʼun ta jujuntal chakʼ jnoptik. Pe ¿kʼusi chkʼot ta pasel mi tsots la spas smul jun ermanoe? Mi muʼyuk tsutes yoʼontone, skʼan xichʼ lokʼesel li ta tsobobbaile (1 Kor. 5:13). Akʼo mi jech chkʼot ta pasel, li Jeovae oy tajek ta yoʼonton ti sut talel ta stojolale. Taje jaʼ jun srasonal ti kʼu yuʼun laj yakʼ li pojelale, yuʼun jaʼ sventa xichʼik akʼel ta perton li buchʼutik tsutes yoʼontonike (kʼelo 1 Juan 2:1). Ta skoj ti toj echʼ xa noʼox snaʼ xkʼanvan li Jdiostike, oy ta yoʼonton tskolta li jpasmuliletike xchiʼuk tstijbe yoʼonton ti akʼo sutes yoʼontonike (Sak. 1:3; Rom. 2:4; Sant. 4:8).
3. ¿Kʼusi ta jkʼeltik batel li ta xchanobil liʼe?
3 Li Jeovae chalbutik kʼu yelan chil li mulile xchiʼuk li buchʼutik tsots tspas smulike, tskʼan ti jechuk xkiltik eke. Li ta xchanobil liʼe, jaʼ tskoltautik sventa jechuk jpastik. Baʼyel, ta jkʼeltik kʼusi kʼot ta pasel ta baʼyel siglo kʼalal tsots la spas smul jun ermano li ta tsobobbail ta Korintoe. Laje, ta jkʼeltik li mantaletik laj yal Pablo ti kʼusi skʼan spasik kʼalal sutesoj xa ox yoʼonton li jpasmulile. Ta slajebe, jaʼ chkalbetik skʼoplal ti kʼu yelan chil Jeova li buchʼu tsots tspas smule.
¿KʼUSI LA SPAS LI TSOBOBBAIL TA BAʼYEL SIGLO KʼALAL TSOTS LA SPAS SMUL LI JUN ERMANOE?
4. ¿Kʼusi kʼot ta pasel li ta tsobobbail ta Korintoe? (1 Korintios 5:1, 2).
4 (Kʼelo 1 Korintios 5:1, 2). Kʼalal bat ta yoxibal velta ta misioneroal li Pabloe, oy kʼusi laj yaʼi ti toj echʼ noʼox chopol kʼusi kʼot ta pasel li ta achʼ tsobobbail ta Korintoe, yuʼun li jun ermanoe yakal chmulivaj xchiʼuk li xchaʼmeʼe. Li Pabloe xi laj yalbe skʼoplal ta sventa taje: «Chvinaj loʼil ti oy buchʼu chmulivaj avuʼunike, taje mi jaʼuk jech tspasik li ta yan lumetike». Li tsobobbaile muʼyuk chopol chilik li kʼusi chopol tspas li vinike, yuʼun lek noʼox chilik ti te xchiʼukike. Junantike laj van snopik ti jaʼ jech chakʼ ta ilel xkʼuxul yoʼonton xchiʼuk slekil yoʼonton Jeova ta stojolal li jpasmulil krixchanoetike. Pe li Jeovae muʼyuk lek chil li buchʼutik tspas smulik ti te oy ta steklumale. Ti jech muʼyuk xkʼexlal kʼusi la spas li vinik taje, yakal tsokesbe skʼoplal li tsobobbaile. Jech xtok, xuʼ van tsokesbe stalelal li ermanoetik ta tsobobbaile. Jaʼ yuʼun chaʼa, ¿kʼusi mantaletik laj yakʼbe batel li tsobobbail ta Korinto li jtakbol Pabloe?
5. Li Pabloe, ¿kʼusi la stsʼibabe batel tsobobbail ti akʼo spasike? (1 Korintios 5:13; kʼelo xtok li lokʼole).
5 (Kʼelo 1 Korintios 5:13). Li Pabloe akʼbat snaʼ yuʼun Dios ti skʼan slokʼesik ta tsobobbail li jpasmulil ti muʼyuk to sutesoj yoʼontone. ¿Kʼu van yelan skʼan xilik yajtsʼaklomtak Kristo li jpasmulile? Li Pabloe laj yalanbe batel ti mu xa xchiʼinike xchiʼuk ti mu jaʼuk xchiʼinik ta veʼele (1 Kor. 5:11). Yuʼun kʼalal oy buchʼu ta jchiʼintik ta veʼele, chlik jchiʼintik ta loʼil xchiʼuk mu xkaʼitik x-echʼ ora xchiʼuk. Jaʼ yuʼun, li Pabloe laj yalbe batel li ermanoetik ta tsobobbail ti mu xa xchiʼinik li vinike. Taje jaʼ sventa mu xchanbeik li xchopol talelale (1 Kor. 5:5-7). Jech xtok, xuʼ van jaʼ xkoltaat sventa xakʼ venta ti la syayijesbe yoʼonton li Jeovae, ti xkʼexav ta skoj li kʼusi chopol la spase xchiʼuk ti xtijbat yoʼonton sventa sutes yoʼontone.
Li Pabloe akʼbat snaʼ yuʼun Dios ti akʼo stsʼibabe batel jkorintoetik ti akʼo slokʼesik ta tsobobbail li jpasmulil ti muʼyuk to sutesoj yoʼontone. (Kʼelo parafo 5).
6. ¿Kʼusi sbalil la stabe tsobobbail li karta la stak batel li Pabloe, xchiʼuk kʼusi sbalil la stabe li jpasmulile?
6 Kʼalal laj xa ox stakbe batel karta li tsobobbail ta Korintoe, li Pabloe lik van sjakʼbe sba kʼu yelan laj yaʼiik li ermanoetike. Kʼalal mu to jaluk yechʼele, li Titoe laj yal jun lekil aʼyej, yuʼun laj yal ti lek laj yaʼiik kʼusi chal li kartae xchiʼuk la spasik kʼusi chal li jtakbol Pabloe (2 Kor. 7:6, 7). Kʼalal mu toʼox jaluk la stak batel skarta li Pabloe, li vinik taje laj xa ox sutes yoʼonton, laj xa ox sjel li stalelale xchiʼuk lik xa ox xchʼunbe smantaltak li Jeovae (2 Kor. 7:8-11). ¿Kʼusi xa van mantaletik chakʼbe batel Pablo li tsobobbail une?
¿KʼUSI LA SPAS LI TSOBOBBAIL KʼALAL LA SUTES YOʼONTON LI JPASMULILE?
7. ¿Kʼusi kʼot ta pasel kʼalal laj yichʼ lokʼesel ta tsobobbail li jpasmulile? (2 Korintios 2:5-8).
7 (Kʼelo 2 Korintios 2:5-8). Li Pabloe xi laj yale: «Lek xa noʼox jech li mantal laj yichʼ akʼbel li vinike, ti jutuk mu skotolikuk laj yakʼbeik mantale». Taje jaʼ skʼan xal ti la stabe sbalil li vinik ti laj yichʼ akʼbel mantale. ¿Kʼu yuʼun ti jech chkaltike? Jaʼ ti la sutes yoʼonton li vinike (Ebr. 12:11).
8. ¿Kʼusi laj yalbe noʼox batel tsobobbail li Pabloe?
8 Laj une, li Pabloe xi laj yalbe li tsobobbail ti kʼusi skʼan spasik ta stojolal li buchʼu laj toʼox spas smule: «Ta slekil avoʼontonik xavakʼik ta perton xchiʼuk patbeik yoʼonton». Xchiʼuk xi to laj yale: «Chkalboxuk mantal ti akʼbeik yil ti akʼanojike». Jech kʼuchaʼal chkakʼtik ventae, li Pabloe maʼuk noʼox oy ta yoʼonton ti sut ta mantal li buchʼu spasoj smule, yuʼun skʼan xakʼbeik ta ilel ta skʼopojelik xchiʼuk ta stalelalik ti yakʼojik xa ta perton xchiʼuk ti skʼanojike. Kʼalal jech la spasike, li vinike laj yakʼ venta ti xmuyubaj li ermanoetik ta tsobobbail ti sut talele.
9. ¿Kʼu van yuʼun oy junantik vokol laj yaʼiik yakʼel ta perton li buchʼu laj xa sutes yoʼontone?
9 ¿Mi oy van junantik ermanoetik ti vokol laj yaʼiik ti lek xchʼamik li buchʼu laj xa sutes yoʼontone? Li Vivliae muʼyuk bu chal. Pe yikʼaluk van oy buchʼutik ti jech laj yaʼiike. Yuʼun xuʼ van sok skʼoplal yuʼun li tsobobbaile xchiʼuk oy van junantik ermanoetik ti laj yil-o svokolik ta skoj li kʼusi la spase. Jech xtok, li ermanoetik ta tsobobbaile yakʼojik persa ti xchʼunbeik li smantaltak Jeovae, jaʼ yuʼun mu van sta-o laj yilik ti lekuk xchʼamik ta tsobobbail li buchʼu tsots la spas smule (koʼoltaso xchiʼuk Lukas 15:28-30). Pe ¿kʼu yuʼun toj tsots skʼoplal ti xakʼbeik ta ilel ti skʼanojik ta melel li buchʼu chaʼsut talel ta tsobobbaile?
10, 11. ¿Kʼusi van kʼot ta pasel jechuk ti muʼyukuk laj yakʼik ta perton li jpasmulil ti sutesoj xa yoʼontone?
10 ¿Kʼu van yelan laj yaʼi sba li vinik ti muʼyukuk x-akʼe sutuk tal ta tsobobbail yuʼun li moletike o ti chʼabaluk xakʼik ta ilel kʼanelal li ermanoetike? Xuʼ van lubtsaj-o ta skoj ti «chat tajek yoʼontone». Xuʼ van la snop ti mu xa kʼusi stakʼ pasel ta stojolale o yikʼaluk van muʼyuk xa xakʼbe yipal sventa lekuk xil sba yan velta xchiʼuk li Jeovae.
11 Pe maʼuk noʼox taje. Ti muʼyukuk x-akʼvanik ta perton li ermanoetik ta tsobobbaile, yikʼaluk van muʼyuk xa lek laj yil sbaik xchiʼuk Jeova. ¿Kʼu yuʼun? Yuʼun ti jechuk la spasike, jaʼ muʼyuk la xchanbeik stalelal Jeova ti chakʼ ta perton li jpasmulil ti sutesoj yoʼontone, yuʼun jaʼ van la xchanbeik stalelal Satanas ti toj tsots yoʼonton xchiʼuk ti muʼyuk xkʼuxul yoʼontone. Vaʼun, xuʼ van tunesatik yuʼun Satanas sventa slubtsaj-o yuʼunik ta mantal li vinik ti tsots la spas smule (2 Kor. 2:10, 11; Efes. 4:27).
12. ¿Kʼuxi xuʼ xchanbeik stalelal Jeova li tsobobbaile?
12 Vaʼun chaʼa, ¿kʼuxi xuʼ xakʼik ta ilel li tsobobbail ta Korinto ti mu jaʼuk chchanbeik stalelal li Satanase? Jaʼ ti jechuk xilik kʼuchaʼal chil Jeova li jpasmulil ti sutesoj xa yoʼontone. Jkʼeltik kʼusi laj yalik ta stojolal Jeova junantik jtsʼibajometik ta Vivlia. Li Davide xi laj yale: «Toj lek avoʼonton xchiʼuk chapalot sventa xachʼay mulil» (Sal. 86:5). Li Mikease xi la stsʼibae: «¿Mi oy yan Dios jech kʼuchaʼal li voʼote ti chchʼay ta yoʼonton li mulile [ . . . ]?» (Mik. 7:18). Li Isaias eke xi laj yale: «Akʼo skomtsan sbe li buchʼu toj chopole xchiʼuk akʼo yikta kʼusi tsnop li jpaschoplejale; akʼo sutuk tal ta stojolal li Jeova ti jaʼ chkʼuxubinate, akʼo sutuk tal ta stojolal li Jdiostike, yuʼun muʼyuk spajeb ch-akʼvan ta perton» (Is. 55:7).
13. ¿Kʼu yuʼun lek ti kʼot ta nopel yuʼunik ti sut talel ta mantal li vinike? (Kʼelo li rekuadro «¿Kʼusi ora sut ta mantal li vinik ta Korintoe?»).
13 Sventa xakʼik ta ilel ti chchanbeik stalelal Jeova li tsobobbail ta Korintoe, skʼan ta sjunul yoʼonton xchʼamik li vinik ti sutesoj xa yoʼontone xchiʼuk ti xakʼbeik ta ilel ti skʼanojike. Li Pabloe laj yal ti mi chakʼik ta perton li vinik ti sutesoj xa yoʼontone, jaʼ jech chakʼik ta ilel ti yakal chchʼunik skotol li mantale (2 Kor. 2:9). Akʼo mi oy onoʼox van jayibuk u laj yichʼ lokʼesel ta tsobobbail li vinike, la xchʼam li tukʼibtasele, vaʼun la sutes yoʼonton. Jaʼ yuʼun, li moletike muʼyuk srasonal yuʼunik sventa jal to smalaik yoʼ sut ta mantale (readmitir).
¿KʼUXI XUʼ JCHANBETIK JEOVA TI TUKʼ KʼUSITIK TSPAS XCHIʼUK TI OY XKʼUXUL YOʼONTONE?
14, 15. ¿Kʼusi chakʼ jchantik li kʼusi kʼot ta pasel li ta tsobobbail ta Korintoe? (2 Pedro 3:9; kʼelo xtok li lokʼole).
14 Li Jeovae laj yakʼ ti tsʼibabiluk xkom ta Skʼop li kʼusi kʼot ta pasel ta tsobobbail ta Korinto sventa jchanubtaseltike (Rom. 15:4). Taje chakʼ kiltik ti muʼyuk lek chil Jeova li buchʼu tsots tspas smul li ta steklumale. Junantike tsnopik ti ta skoj ti toj echʼ xa noʼox xkʼuxul yoʼonton li Jeovae, muʼyuk la tslokʼes ta tsobobbail li buchʼu tsots la spas smule. Pe taje mu jechuk, melel onoʼox ti oy xkʼuxul yoʼonton li Jeovae, pe maʼuk skʼan xal ti lek noʼox chil skotole o ti muʼyuk chopol chil mi muʼyuk ta jchʼunbetik smantaltake (Jud. 4). Yuʼun ti teuk noʼox skʼeloj li buchʼu muʼyuk tsutes yoʼontone, muʼyuk chakʼ ta ilel xkʼuxul yoʼonton, yuʼun xuʼ xakʼ ta vokol li tsobobbaile (Prov. 13:20; 1 Kor. 15:33).
15 Li loʼil taje chakʼ kiltik xtok ti mu skʼan Jeova ti oyuk buchʼu xbat ta lajele, yuʼun li kʼusi oy ta yoʼontone, jaʼ ti stauk skolelik li krixchanoetike. Chakʼbe ta ilel xkʼuxul yoʼonton li buchʼutik tsjel stalelalik xchiʼuk ti chakʼik persa sventa lekuk xil sbaik yan veltae (Esek. 33:11; kʼelo 2 Pedro 3:9). Jaʼ yuʼun, kʼalal la sutes yoʼonton xchiʼuk ti laj yikta spasel kʼusi chopol li vinik ta tsobobbail ta Korintoe, li Jeovae la stunes Pablo sventa xalbe tsobobbail ti akʼo xakʼik ta pertone xchiʼuk ti xchʼamik yan veltae.
Li tsobobbaile chchanbeik stalelal Jeova ti snaʼ xkʼanvan xchiʼuk ti oy xkʼuxul yoʼontone, yuʼun ta sjunul yoʼonton chchʼamik li buchʼutik tsutik ta mantale. (Kʼelo parafo 14, 15).
16. ¿Kʼu yelan chavaʼi aba ti kʼu yelan la xchapan Jeova li tsatsal mulil kʼot ta pasel li ta tsobobbail ta Korintoe?
16 Kʼalal ta jkʼelbetik skʼoplal li kʼusi kʼot ta pasel li ta tsobobbail ta Korintoe, chakʼ kiltik ti toj echʼ xa noʼox skʼanojutik li Jeovae xchiʼuk ti tukʼ chchapanvane (Sal. 33:5). Ta skoj li stalelaltak Jeovae, ¿mi mu jechuk ti tstij koʼontontik sventa masuk to jkʼupil kʼoptatike? Yuʼun jkotoltik jpasmulilutik xchiʼuk ta onoʼox jkʼantik ti xakʼutik ta pertone. Ta jtojtik tajek ta vokol ti la spojutike, yuʼun jaʼ jech xuʼ jtatik perton ta skoj li jmultike. Tspat tajek koʼontontik ti skʼanoj yajtuneltak li Jeovae xchiʼuk ti tskʼan ti lekuk xbat xkuxlejalike.
17. ¿Kʼusi ta jchantik batel li ta yantik xchanobiltak chtale?
17 ¿Kʼusi chkʼot ta pasel mi oy buchʼu tsots la spas smul li avie? Li moletike, ¿kʼuxi xuʼ xchanbeik stalelal Jeova ti snaʼ xkʼanvan xchiʼuk ti skoltaik sventa sutes yoʼonton li buchʼu la spas smule? Kʼalal chkʼot ta nopel yuʼun moletik ti oy buchʼu tslokʼesik ta tsobobbail o ti chchʼamik yan veltae, ¿kʼu yelan skʼan xkiltik? Taje jaʼ ta jkʼelbetik batel skʼoplal li ta yantik xchanobiltak chtale.
KʼEJOJ 109 Sjunuluk me avoʼnton xakʼan abaik