Moletik ta tsobobbail, akʼik ta ilel ti akʼanojik xchiʼuk ti kʼux ta avoʼontonik li buchʼu tsots tspas smule

1. ¿Mi oy to van kʼusi stakʼ pasel ta stojolal li buchʼu tsots tspas smule?

LI ECHʼ xchanobil la jchantik talele, li jtakbol Pabloe laj yalbe tsobobbail ta Korinto ti kʼu yelan skʼan skʼelbeik skʼoplal li vinik ti tsots la spas smule. Ta skoj ti muʼyuk toʼox sutesoj yoʼontone, la slokʼesik ta tsobobbail. Pe jech kʼuchaʼal chal li teksto ti bu lokʼem talel li xchanobil liʼe, xuʼ to me xichʼ koltael sventa sutes yoʼonton li jpasmulile (Rom. 2:4). Li Jeovae, ¿kʼuxi tstunes moletik ta tsobobbail sventa skoltaik yoʼ sutes yoʼonton li jpasmulile?

2, 3. ¿Kʼusi skʼan jpastik mi laj kaʼitik ti tsots la spas smul junuk ermanoe, xchiʼuk kʼu yuʼun ti skʼan jech jpastike?

² Mi laj kaʼitik ti oy junuk ermano ti tsots la spas smule, jaʼ xkaltik, ti oy kʼusi la spas ti xuʼ xichʼ lokʼesel-o ta tsobobbaile, ¿kʼusi skʼan jpastik? Melel onoʼox, sventa xuʼ xkoltavanik li moletik ta tsobobbaile, skʼan snaʼik lek li kʼusi kʼot ta pasele. Jaʼ yuʼun, skʼan jtijbetik yoʼonton li buchʼu la saʼ smul sventa xbat skʼanbe koltael li moletik ta tsobobbaile (Is. 1:18; Ech. 20:28; 1 Ped. 5:2).

³ Pe ¿mi mu skʼan xbat yalbe moletik li ermano une? Ta skoj ti oy ta koʼontontik ti xichʼ koltaele, voʼotik chbat kalbetik li moletike. Ti jech ta jpastike, jaʼ jech chkakʼtik ta ilel ti jkʼanojtik li kermanotike, yuʼun jnaʼojtik ti xuʼ xkoltaat yuʼun li moletike. Mi muʼyuk tsjel stalelale, muʼyuk xa lek chil sbaik xchiʼuk Jeova xchiʼuk xuʼ sokesbe skʼoplal li tsobobbaile. Jech oxal, akʼo mi vokol chkaʼitik spasel, skʼan tsots koʼontontik xbat kalbetik li moletik ta tsobobbaile, yuʼun jkʼanojtik li Jeova xchiʼuk li kermanotike (Sal. 27:14).

¿KʼUXI CHICHʼ KOLTAEL YUʼUN MOLETIK LI BUCHʼU TSOTS SPASOJ SMULE?

4. ¿Kʼusi oy ta yoʼonton li moletik kʼalal chchiʼinik ta loʼil li buchʼu tsots la spas smule?

⁴ Kʼalal tsots tspas smul jun ermanoe, li moletik ta tsobobbaile tstʼujik oxvoʼ moletik sventa xtunik ta komite yuʼun moletika yoʼ xchiʼinik ta loʼile. Li moletik taje skʼan teuk ta sjolik ti oy kʼusitik mu spas yuʼunike xchiʼuk ti bikʼituk xakʼ sbaike. Jech xtok, akʼo mi oy ta yoʼonton tskʼan tskoltaik li jpasmulile, pe snaʼojik ti mu stakʼ buchʼu sujik sventa sjel stalelale (Deut. 30:19). Snaʼojik xtok ti mu skotoluk jpasmuliletik lek chchʼamik li tukʼibtasel ch-akʼbatik jech kʼuchaʼal la spas li ajvalil Davide (2 Sam. 12:13). Oy junantik ti tspʼajik li tojobtasel chakʼ Jeovae (Jen. 4:​6-8). Akʼo mi jech, li kʼusi oy ta yoʼonton li moletik ta tsobobbaile jaʼ ti skoltaik li buchʼu tsots la spas smul sventa sutes yoʼontone. ¿Kʼusi skʼan teuk ta sjolik li komite yuʼun moletik kʼalal chchiʼinik ta loʼile?

5. ¿Kʼu yelan skʼan stalelalik li moletik kʼalal chchiʼinik ta loʼil li buchʼu la spas smule? (2 Timoteo 2:​24-26; kʼelo xtok li lokʼole).

⁵ Li moletike skʼan jechuk xilik kʼuchaʼal chʼayemal chij li buchʼu tsots la spas smule (Luk. 15:​4, 6). Taje jaʼ jech chakʼ ta ilel ta stalelalik xchiʼuk ta skʼopojelik kʼalal chchiʼinik ta loʼile. Maʼuk ti solel tsots xa chkʼopojike o ti jaʼ noʼox tstsob sbaik sventa oyuk kʼusi sjakʼbeik yoʼ snaʼik li kʼusi kʼot ta pasele. Yuʼun li kʼusi oy ta yoʼontonike, jaʼ ti xakʼik ta ilel li talelaletik chal li ta 2 Timoteo 2:24 kʼalal ta 26 (kʼelo). Ta skotol ora chakʼ ta ilel slekil yoʼontonik xchiʼuk smalael yuʼunik sventa xkʼot ta yoʼonton li tojobtasel chalbeike.

6. ¿Kʼuxi chchapan yoʼonton li moletik kʼalal skʼan toʼox xchiʼinik ta loʼil li jpasmulile? (Romanos 2:4).

⁶ Li moletike chchapan li yoʼontonike. Skʼan teuk ta sjolik li kʼusi laj yal Pablo liʼe: «Ta slekil yoʼonton Dios tsbeiltasot batel sventa xasutes [avoʼonton]» (kʼelo Romanos 2:4). Jaʼ yuʼun, chakʼik persa ti xchanbeik slekil yoʼonton Jeova kʼalal tskʼelbeik skʼoplal li buchʼu la spas smule. Skʼan teuk ta sjolik ti jaʼ mas tsots skʼoplal skʼan xchabiik li xchijtak Jeovae, ti stsakik ta venta li mantaletik xchiʼuk ti kʼu yelan laj yakʼ ta ilel stalelal li Kristoe (Is. 11:​3, 4; Mat. 18:​18-20). Jaʼ yuʼun, kʼalal skʼan toʼox stsob sbaik sventa xchiʼinik ta loʼil li jpasmulile, li komite yuʼun moletike tskʼoponik Jeova sventa snaʼik kʼuxi xuʼ skoltaik yoʼ sutes yoʼontone. Tsaʼik beiltasel ta Vivlia xchiʼuk li ta vunetike, tskʼanbeik koltael Jeova yoʼ x-akʼbat spʼijilik sventa xaʼibeik smelolal kʼu yelan chaʼi sba li ermanoe xchiʼuk ti kʼusi kʼot ta pasele. Tskʼelbeik lek skʼoplal ti kʼu yuʼun jech la spas stalelale xchiʼuk ti kʼusi tijbat-o yoʼonton spasel li mulile (Prov. 20:5).

7, 8. Li moletike, ¿kʼuxi xuʼ xchanbeik Jeova ti oy smalael yuʼun kʼalal chchiʼinik ta loʼil li jpasmulile?

⁷ Li moletike chchanbeik Jeova ti oy smalael yuʼune. Te ta sjolik ti kʼu yelan la skolta jpasmuliletik li ta voʼnee. Kalbetik skʼoplal kʼalal la xchiʼin ta loʼil li Kaine. Li Jeovae laj yakʼ ta ilel ti oy smalael yuʼune, laj yalbe li kʼusi xuʼ xkʼot ta pasel mi muʼyuk la sjel li stalelale. Pe laj yalbe ti xuʼ sta bendision mi la xchʼun li kʼusi albate (Jen. 4:​6, 7). Jun velta xtoke, sventa stukʼibtas li ajvalil Davide, li Jeovae la stak batel j-alkʼop Natan. Vaʼun, li Natane laj yalbe skʼoplal jun loʼil (2 Sam. 12:​1-7). Jech xtok, li Jeovae «ep ta velta» la stak batel yaj-alkʼoptak kʼalal la stoy sbaik li jteklum Israele (Jer. 7:​24, 25). Li Jeovae la skolta ta anil yajtuneltak kʼalal jaʼo tspas smulike, mu jaʼuk to la smala kʼalal sutesoj xa ox yoʼontonike.

⁸ Li moletik ta tsobobbaile, ¿kʼuxi chchanbeik stalelal Jeova kʼalal tskoltaik li buchʼu tsots la spas smule? Jech kʼuchaʼal chal 2 Timoteo 4:2 tsots skʼoplal ti stsʼikuk yuʼunike o ti oyuk smalael yuʼunike. Skotol ora skʼan snaʼuk spajtsan sbaik xchiʼuk ti ta slekiluk yoʼonton xchiʼinik ta loʼil yoʼ stijbeik yoʼonton ta spasel li kʼusi leke. Yuʼun mi kap sjol li moletike o mi mu xa snaʼ kʼusi tspasike, yikʼaluk van mu xa skʼan xchikinta o muʼyuk tsutes yoʼonton li jpasmulile.

9, 10. ¿Kʼusi xuʼ spasik li moletik sventa xrasonaj xchiʼukik li buchʼu la spas smule?

⁹ Li moletike tskʼelik lek kʼu yuʼun tsʼuj ta mulil li ermanoe. Xuʼ me xkoltavan li sjakʼobiltak liʼe: ¿mi ta kʼunkʼun van kʼunib batel ta mantal ta skoj ti muʼyuk xa chchan Svivlia o ti muʼyuk xa mas chlokʼilan ta cholmantale? ¿Mi muʼyuk xa van mas tspas orasion? ¿Mi laj van yakʼ chʼiuk ta yoʼonton li kʼusi chopole? ¿Mi jaʼ van ta skoj ti la xchiʼin li chopol krixchanoetike o mi jaʼ van tijbat-o yoʼonton ta skoj li kʼusi chopol chchʼay-o yoʼontone? ¿Mi oy snopojbe skʼoplal ti kʼu yelan chaʼi sba yuʼun Jeova ta skoj li kʼusi kʼot ta nopel yuʼun xchiʼuk li kʼusi la spase?

¹⁰ Li moletik ta tsobobbaile tsnopik lek li kʼusi tsjakʼbeik li ermanoe. Pe muʼyuk tsjakʼbeik li kʼusi mu xa persauk skʼan snabeik skʼoplale. Kʼalal ta slekil yoʼonton chchiʼinik ta loʼile, xuʼ xtijbat-o yoʼonton sventa jamal xal li kʼusi kʼot ta pasele xchiʼuk chkoltaat-o sventa xakʼ venta ti kʼu yuʼun tsʼuj ta mulile (Prov. 20:5). Jech kʼuchaʼal la spas Natan ta stojolal li Davide, li moletik eke xuʼ stunesik skʼelobiltak sventa skoltaik li ermano yoʼ xakʼ venta ti toj chopol li kʼusi la spase. Kʼalal tstsob sbaik ta sba veltae, xuʼ van chopol chaʼi sba ta skoj li kʼusi la spase o xuʼ van sutes yoʼonton.

11. ¿Kʼu yelan la skolta jpasmuliletik li Jesuse?

¹¹ Li moletik ta tsobobbaile chakʼik persa xchanbel stalelal Jesus. Jun veltae, li Jesuse xi laj yalbe li Saulo ta Tarsoe: «Saulo, Saulo, ¿kʼu yuʼun yakal chakontrainun?». Ti jech la sjakʼbee, jaʼ koltaat-o sventa xakʼ venta ti toj chopol li kʼusi yakal tspase (Ech. 9:​3-6). Li ta Apokalipsis 2:20 xchiʼuk 21, li Jesuse xi laj yalbe jun ants ti «Jesabel» sbie: «La jmala sventa sutes yoʼonton».

12, 13. ¿Kʼusi xuʼ spasik li moletik sventa smalaik ti sutes yoʼonton li buchʼu la spas smule? (Kʼelo xtok li lokʼoletike).

¹² Jech kʼuchaʼal la spas li Jesuse, li moletike muʼyuk tsnopik ta anil ti muʼyuk xa tsutes yoʼonton li buchʼu la spas smule. Oy buchʼutik ti tsutes noʼox yoʼontonik kʼalal tstsob sbaik ta sba velta xchiʼuk li moletike, pe jaʼuk li yantike mu jechuk tspasik. Jaʼ yuʼun, li moletike xuʼ van oy jayibuk velta skʼan stsob sbaik xchiʼuk li jpasmulile. Kʼalal tstsob sbaik ta sba veltae, xuʼ van te xnopnun chkom ta sventa li kʼusi laj yal li moletike, vaʼun ta sjunul yoʼonton tskʼanbe perton li Jeovae (Sal. 32:5; 38:18). Mi la stsob sbaik yan veltae, xuʼ van jelem xa ox tajek stalelal.

¹³ Sventa sutes yoʼonton li jpasmulile, li moletik ta tsobobbaile skʼan xakʼ ta ilel slekil yoʼontonik xchiʼuk ti xaʼibeik smelolal ti kʼu yelan chaʼi sbae. Tskʼanbeik Jeova ti x-akʼbatik bendision ta sventa li kʼusi tspasike xchiʼuk ti oyuk ta yoʼontonik skoltael li buchʼu la saʼ smul sventa xvul xchʼulel xchiʼuk ti sutes yoʼontone (2 Tim. 2:​25, 26).

14. ¿Buchʼu ti chkoltavan ta melel kʼalal tsutes yoʼonton li jun jpasmulile, xchiʼuk kʼu yuʼun ti jech chkaltike?

¹⁴ Kʼalal tsutes yoʼonton li jpasmulile, xijmuyubaj yuʼun tajek (Luk. 15:​7, 10). Pe ¿buchʼu van ti koltavan ta melele? ¿Mi jaʼ li moletik ta tsobobbaile? Teuk ta joltik ti Pabloe laj yal ti «xuʼ van xjelbat snopbenik yuʼun Dios» li jpasmuliletike (2 Tim. 2:25). Jaʼ yuʼun, ti jech la sjel snopben xchiʼuk stalelal li jpasmulile, maʼuk ta skoj junuk krixchano, yuʼun jaʼ koliyal li Jeova ti la skolta sventa stam sutel li lekil bee. Laje, li Pabloe laj yalbe skʼoplal li kʼusitik lek chkʼot ta pasel kʼalal oy buchʼu tsutes yoʼontone. Yuʼun li jpasmulile mas to chojtikin li kʼusi chal Vivliae, chvul xchʼulel xchiʼuk xuʼ xjatav lokʼel li ta spetsʼ Diabloe (2 Tim. 2:26).

15. Li moletik ta tsobobbaile, ¿kʼuxi xuʼ skoltaik-o li buchʼu la sutes yoʼontone?

¹⁵ Mi la sutes yoʼonton li buchʼu la spas smule, li moletik ta tsobobbaile jech-o tsvulaʼanik sventa skoltaik yoʼ stsatsub li xchʼunel yoʼontone, ti muuk xa xpʼaj yan velta li ta spetsʼtak Satanase xchiʼuk ti jaʼuk spas batel li kʼusi leke (Ebr. 12:​12, 13). Melel onoʼox, li moletik ta tsobobbaile muʼyuk buchʼu chalbeik batel li kʼusi la spas li ermanoe. Pe ¿kʼusi van ti persa skʼan snaʼik li tsobobbaile?

«ALBO MANTAL TA SAT KRIXCHANOETIK»

16. Jech kʼuchaʼal chal 1 Timoteo 5:​20, ¿buchʼu skʼoplal laj yal Pablo kʼalal ta «sat krixchanoetik» xie?

¹⁶ (Kʼelo 1 Timoteo 5:20). Li Pabloe laj yalbe Timoteo ti jaʼ mol ta tsobobbail eke ti akʼo xalbe mantal o stukʼibtas ta «sat krixchanoetik» li buchʼu tspas smulike. ¿Buchʼutik skʼoplal taje? Xu van maʼuk skʼoplal sjunul li tsobobbaile, xuʼ jaʼ noʼox skʼoplal li ermanoetik ti snaʼojik li kʼusi la spase, ti laj yil ta sat stukik o ti albatik li kʼusi la spase. Li moletik ta tsobobbaile jaʼ noʼox chalbeik li ermanoetik ti snaʼojik li kʼusi kʼot ta pasele. Chalbeik ti laj xa skʼelbeik skʼoplale xchiʼuk ti laj xa stukʼibtasik li ermanoe.

17. Mi snaʼojik xa ermanoetik ta tsobobbail li buchʼu la spas smule o ti yikʼaluk xkʼot ta xchikinik ta mas tsʼakale, ¿kʼusi aʼyej skʼan jelubtasel, xchiʼuk kʼu yuʼun?

¹⁷ Bateltike, li ermanoetik ta tsobobbaile snaʼojik ti oy buchʼu tsots la spas smule o ti xuʼ xkʼot ta xchikinik ta mas tsʼakale. Kʼalal jech chkʼot ta pasel taje, xuʼ xkaltik ti snaʼoj xa sjunul tsobobbail li mulile. Jech oxal, jun mol ta tsobobbail tsjelubtas jun aʼyej ta tsobobbail ti bu chal ti laj yichʼ spasel sensurar o tukʼibtasel li jun ermanoe. ¿Kʼu yuʼun jech chichʼ pasel? Li Pabloe laj yal ti jaʼ «sventa xpʼijubik li yantike» xchiʼuk ti mu spasik tsatsal mulil eke.

18. ¿Kʼusi tspas li moletik kʼalal kʼox to li buchʼu tsots la spas smule? (Kʼelo xtok li lokʼole).

¹⁸ ¿Kʼu yelan skʼan xichʼ kʼelbel skʼoplal mi mu to sta 18 sjabilal li ermano ti yichʼoj xa voʼ ti tsots la spas smule? Li moletik ta tsobobbaile tstʼujik chaʼvoʼ moletik sventa xchiʼinik ta loʼil xchiʼuk li stot smeʼ ti jaʼik testigoetike.b Li moletik taje tskʼelik kʼusitik spasoj stot smeʼ sventa skoltaik li skerem o stsebik yoʼ sjel li stalelale xchiʼuk ti sutes yoʼontone. Mi chchʼam li tojobtasel chakʼ stot smeʼ li kerem o li tsebe xchiʼuk mi tsjel stalelal xchiʼuk ti kʼu yelan tsnope, li chaʼvoʼ moletike xuʼ xkʼot ta nopel yuʼunik ti jaʼuk xkoltavanik batel ta mantal li stot smeʼe xchiʼuk ti mu persauk xichʼ vaʼanel junuk komite yuʼun moletike. Yuʼun li Jeovae jaʼ yakʼojbe ta sba totil meʼil sventa stukʼibtasik ta slekil yoʼonton li yalab xnichʼnabike (Deut. 6:​6, 7; Prov. 6:20; 22:6; Efes. 6:​2-4). Laje, li moletike skʼan jechuk-o xchiʼinik ta loʼil bakʼintik li totil meʼil sventa snaʼik mi jech-o chichʼ koltael li kerem o li tsebe. Pe mi mu skʼan sutes yoʼonton xchiʼuk mi mu skʼan sjel li stalelale, chichʼ vaʼanel jun komite yuʼun moletik sventa xchiʼinik ta loʼil xchiʼuk li stot smeʼ ti jaʼik testigoetike.

«TOJ ECHʼ XA NOʼOX SNAʼ XKʼANVAN XCHIʼUK CHKʼUXUBINVAN LI JEOVAE»

19. ¿Kʼu yelan chchanbeik stalel Jeova li moletik kʼalal chchiʼinik ta loʼil li buchʼu tsots la spas smule?

¹⁹ Li moletik ti chtunik ta komitee oy ta yoʼontonik ti lekuk sak li tsobobbaile, yuʼun jaʼ li kʼusi akʼbil sbainik yuʼun li Jeovae (1 Kor. 5:7). Pe oy ta yoʼontonik xtok ti skoltaik li buchʼu la spas smul sventa sutes yoʼontone. Jaʼ yuʼun, muʼyuk tsnopik ti muʼyuk xa tsjel stalelale. Kʼalal jech tspasike, yakal chchanbeik stalelal Jeova ti «toj echʼ xa noʼox snaʼ xkʼanvan xchiʼuk [chkʼuxubinvane]» (Sant. 5:11). Li jtakbol Juane xi laj yalbe ta slekil yoʼonton li yermanotake: «Kuni nichʼnab, jaʼ sventa mu xasaʼ jtosuk amulik ti ta jtsʼibaboxuk tale. Pe oy jun jkoltavanej kuʼuntik ti te oy xchiʼuk Totil mi oy la asaʼ jtosuk amulike, jaʼ li Jesukristo ti jaʼ tukʼil vinike» (1 Juan 2:1).

20. ¿Kʼusi ta jkʼelbetik batel skʼoplal li ta yan xchanobile?

²⁰ Bateltike, oy ermanoetik ti mu skʼan sutes yoʼontonik kʼalal tsots tspas smulike. Mi jech kʼot ta pasele, skʼan xichʼ lokʼesel li ta tsobobbaile. ¿Kʼu yelan skʼan skʼelbeik skʼoplal moletik kʼalal jech chkʼot ta pasele? Taje jaʼ ta jkʼelbetik batel skʼoplal li ta yan xchanobile.