Li moletik ta tsobobbaile, ¿kʼuxi tskoltaik li buchʼutik lokʼemik ta tsobobbaile?

1, 2. 1) ¿Kʼu yelan chil Jeova li buchʼutik tspas smulik xchiʼuk ti muʼyuk tsutes yoʼontonike? 2) ¿Kʼusi oy ta yoʼonton li Jeovae?

LI Jeovae muʼyuk lek chil skotol li kʼusitik chopol chichʼ pasele, yuʼun spʼajoj li buchʼutik tspas smule (Sal. 5:​4-6). Li stuke tskʼan ti jtsaktik ta venta li mantaletik ta Vivliae, pe taje maʼuk skʼan xal ti tukʼ xa chbat ta pasel kuʼuntik skotole, yuʼun snaʼoj ti jpasmulilutike (Sal. 130:​3, 4). Akʼo mi jech, spʼajoj li «chopol viniketik ti tsjoypʼinbeik skʼoplal li slekil yutsil yoʼonton Jdiostik ta skoj ti toj kʼexlal sba li stalelalike» (Jud. 4). Li Vivliae chal ti Diose tslajesbe skʼoplal ta Armajedon li krixchanoetik ti toj chopolike (2 Ped. 3:7; Apok. 16:16).

² Li Jeovae «mu skʼan ti oy buchʼu xbat ta lajelal junuke». Jech kʼuchaʼal laj xa jchantik talel li ta yantik xchanobiltake, li Vivliae chal li kʼusi oy ta yoʼonton Diose: ti sutes yoʼonton skotol li krixchanoetike (2 Ped. 3:9). Li moletik ta tsobobbaile jaʼ jech chchanbeik stalelal li Jeova eke, yuʼun oy smalael yuʼunik kʼalal tskoltaik li buchʼu tsots la spas smul yoʼ sutes yoʼontone xchiʼuk ti lekuk xil sbaik xchiʼuk Jeova yan veltae. Akʼo mi jech, mu onoʼox skotolikuk chchʼamik li koltaele (Is. 6:9). Yuʼun oy buchʼutik mu skʼan sjel stalelalik akʼo mi ep ta velta chchiʼinatik ta loʼil yuʼun li moletik sventa sutes yoʼontonike. Kʼalal jech chkʼot ta pasele, ¿kʼusi chichʼ pasel?

«LOKʼESIK [ . . . ] LI BUCHʼU TOJ CHOPOLE»

3. 1) Jech kʼuchaʼal chal li Vivliae, ¿kʼusi skʼan pasel kʼalal oy buchʼu tsots tspas smul xchiʼuk ti muʼyuk tsutes yoʼontone? 2) Mi oy buchʼu mu sutes yoʼontone, ¿kʼu yuʼun xuʼ xkaltik ti jaʼ jech la skʼan stuk ti xichʼ lokʼesel ta tsobobbaile?

³ Mi oy buchʼu tsots la spas smul xchiʼuk mi mu skʼan sutes yoʼontone, li moletik ta tsobobbaile jaʼ tstsakik ta venta li mantal chal ta 1 Korintios 5:13 ti xi chale: «Lokʼesik ta atojolalik li buchʼu toj chopole». Kʼalal jech chichʼ pasele, xuʼ xkaltik ti yolbaj jech la skʼan stuk ti xichʼ lokʼesele, yuʼun jaʼ yakal tstsobbe sat li kʼusi la stsʼune (Gal. 6:7). ¿Kʼu yuʼun? Yuʼun yolbaj muʼyuk la xchʼam li koltael akʼbat yuʼun li moletike akʼo mi oy jayibuk velta chiʼinat ta loʼil (2 Rey. 17:​12-15). Li kʼusitik tspase jamal chakʼ ta ilel ti muʼyuk ta yoʼonton chchʼunbe smantaltak li Jeovae (Deut. 30:​19, 20).

4. ¿Kʼu yuʼun chichʼ jelubtasel jun aʼyej kʼalal oy buchʼu chichʼ lokʼesel ta tsobobbaile?

⁴ Kʼalal oy buchʼu chichʼ lokʼesel ta tsobobbail ta skoj ti la spas tsots smul xchiʼuk ti mu skʼan sutes yoʼontone, chichʼ jelubtasel jun aʼyej ta tsobajel sventa xichʼ alel ti maʼuk xa stestigo Jeovae.a Ti jech chichʼ pasele, maʼuk sventa xichʼ kʼexlaltasel, jaʼ sventa stsakik ta venta ermanoetik li mantal chal ta Vivlia ti xikta sbaik ta xchiʼinel xchiʼuk ti mi jaʼuk xchiʼinik ta veʼele (1 Kor. 5:​9-11). Oy lek srasonal yuʼun Jeova ti jech laj yakʼ li mantal taje. Li jtakbol Pabloe xi la stsʼibae: «Tspuk sba ta skotol votsʼbil arina akʼo mi jutuk noʼox li levadurae» (1 Kor. 5:6). Ti muʼyukuk chichʼ lokʼesel ta tsobobbail li buchʼu mu skʼan sutes yoʼontone, li ermanoetike xuʼ van xkʼot ta nopel yuʼunik ti mu persauk xakʼ ta xkuxlejalik li stukʼil mantaltak Jeovae (Prov. 13:20; 1 Kor. 15:33).

5. ¿Kʼu yelan skʼan xkiltik li buchʼu maʼuk xa stestigo Jeovae, xchiʼuk kʼu yuʼun ti skʼan jechuk xkiltike?

⁵ Vaʼun chaʼa, ¿kʼu yelan skʼan xkiltik li buchʼu maʼuk xa stestigo Jeovae? Akʼo mi muʼyuk xa ta jchiʼintik, pe muʼyuk ta jnoptik ti mu xa kʼusi stakʼ pasel ta stojolale. Skʼan jechuk xkiltik kʼuchaʼal jkot uni chij ti chʼayeme xchiʼuk ti xuʼ to sut talel ta stojolal li xchiʼiltake. ¿Kʼu yuʼun ti skʼan jech xkiltike? Yuʼun teuk ta joltik ti laj yakʼbe xkuxlejal li Jeovae. Jaʼ noʼoxe, muʼyuk xa yakal tspas li kʼusi jamal laj yale, jech oxal oy ta vokol li xkuxlejale (Esek. 18:31). Akʼo mi jech, yoʼ to oy yorail xchiʼuk ti oy ta yoʼonton Jeova chakʼ ta ilel xkʼuxul yoʼonton ta stojolale, jpatoj koʼontontik ti xuʼ to sut talele. Jaʼ yuʼun chaʼa, li moletik ta stsobobbaile, ¿kʼuxi xuʼ skoltaik li buchʼu laj yichʼ lokʼesel ta tsobobbaile?

¿KʼU YELAN CHICHʼIK KOLTAEL LI BUCHʼUTIK LOKʼEMIK TA TSOBOBBAILE?

6. ¿Kʼusi skʼan spasik li moletik sventa skoltaik li buchʼu lokʼem ta tsobobbaile?

⁶ Kʼalal oy buchʼu chichʼ lokʼesel ta tsobobbaile, ¿kʼusi tspas li moletike? ¿Mi ta stenik-o komel xchiʼuk mi muʼyuk xa van tskoltaik sventa sut talel ta stojolal li Jeovae? Mu jechuk maʼ taje. Kʼalal chichʼ albel ti chichʼ lokʼesel ta tsobobbaile, li komite yuʼun moletike chalbeik li kʼusitik skʼan spas sventa sut talele. Pe taje maʼuk noʼox, yuʼun jutuk mu skotoluk veltae chichʼ albel ti tskʼan chchiʼinik ta loʼil mi echʼ xa ox jayibuk u sventa skʼelik mi sjeloj xa ox stalelale. Mi laj yal ti xuʼe, li ta tsobajel taje li moletike ta slekil yoʼonton chalbeik ti akʼo sutes yoʼonton xchiʼuk ti sut talel ta stojolal Jeovae. Pe ¿mi muʼyuk sjeloj stalelal li vaʼ ora une? Li moletike jech-o chakʼik persa sventa xchiʼinik ta loʼil yan velta xchiʼuk ti stijbeik yoʼonton ti akʼo sutes yoʼontone.

7. Kʼalal oy buchʼu chlokʼ ta tsobobbaile, ¿kʼuxi xuʼ xchanbeik xkʼuxul yoʼonton Jeova li moletike? (Jeremias 3:12).

⁷ Li moletik ta tsobobbaile chakʼik persa xchanbel Jeova ti kʼu yelan chakʼ ta ilel xkʼuxul yoʼonton kʼalal tskoltaik li buchʼu lokʼem ta tsobobbaile. Kʼalal mu xchʼunik mantal ta voʼne li j-israeletike, li Jeovae mu teuk noʼox skʼeloj ti kʼusi ora tsutik talel ta stojolale. Yuʼun oy kʼusi la spas ta anil xchiʼuk la skoltaan akʼo mi muʼyuk toʼox chakʼik ta ilel ti tsutes yoʼontonike. Jech kʼuchaʼal la jchantik li ta xchibal xchanobil li ta revista liʼe, li Jeovae la stunes j-alkʼop Oseas sventa xakʼ ta ilel ti toj ep xkʼuxul yoʼontone. Laj yalbe Oseas ti akʼo xakʼ ta perton xchiʼuk ti xikʼ sutel yajnil akʼo mi yakal-o chmulivaje (Os. 3:1; Mal. 3:7). Jech kʼuchaʼal tspas li Jeovae, li moletik ta tsobobbaile oy ta yoʼontonik ti sutes yoʼonton li jpasmulile, ti sut talel li ta organisasione xchiʼuk oy kʼusitik tspasik ta anil yoʼ skoltaike (kʼelo Jeremias 3:12).

8. ¿Kʼuxi tskoltautik li sloʼilal jchʼayemal kerem yoʼ xkaʼibetik smelolal li xkʼuxul yoʼonton Jeovae? (Lukas 15:7).

⁸ Teuk ta joltik ti kʼu yelan laj yaʼi sba stot li jchʼayemal kerem laj yalbe skʼoplal Jesuse. Kʼalal la sta ta ilele, «bat snup ta be ta anil, la smey xchiʼuk la skʼunil tsʼutsʼ» (Luk. 15:20). Kʼuchaʼal chkakʼtik ventae, muʼyuk la smala ti xkʼanbat pertone, yuʼun jaʼ oy kʼusi baʼyel la spas, bat snup ta be ta anil li skerem ta skoj ti skʼanoje. Li moletik ta tsobobbaile jaʼ jech oy ta yoʼontonik li chijetik ti chʼayemike xchiʼuk chakʼik persa skoltael yoʼ sutik tal ta stojolal Jeova (Luk. 15:​22-24, 32). Kʼalal tsutes yoʼonton li jpasmulile, xkuxet yoʼontonik li buchʼutik te ta vinajele xchiʼuk xmuyubajik ek li buchʼutik liʼ ta balumile (kʼelo Lukas 15:7).

9. ¿Kʼusi oy ta yoʼonton Jeova ti akʼo spasik li buchʼutik tsots spasoj smulike?

⁹ Li kʼusi laj xa jchantik talele, jamal chakʼ ta ilel ti muʼyuk oy ta yoʼonton Jeova ti teuk-o ta s-organisasion li buchʼu tsots la spas smul xchiʼuk ti mu skʼan sutes yoʼontone. Akʼo mi jech, muʼyuk tsten-o komel, yuʼun oy ta yoʼonton ti sut talel ta stojolale. Li ta Oseas 14:4 te chal kʼu yelan chil Jeova li buchʼutik tsutes yoʼontonike, xi chale: «Ta jpoxtaik xchiʼuk tukʼ xa chakʼ sbaik. Chlokʼ ta koʼonton jtuk ti ta jkʼanike, yuʼun nom xa oy li skʼakʼal koʼonton ta stojolalike». Jaʼ yuʼun, toj tsots skʼoplal ti teuk noʼox sat li moletik ta tsobobbail kʼalal oy buchʼu chakʼ ta ilel ti tsutes xa yoʼontone. Li buchʼutik lokʼemik ta mantal eke toj tsots me skʼoplal ti xakʼ xa noʼox yipalik yoʼ sutik talel ta stojolal Jeovae.

10, 11. Li moletike, ¿kʼu yelan tskoltaik li buchʼutik voʼne xa tajek slokʼelik ta tsobobbaile?

¹⁰ ¿Kʼu yelan chichʼik koltael li buchʼutik voʼne xa tajek laj yichʼik lokʼesel ta tsobobbaile? Yikʼaluk van muʼyuk xa tspasik li mulil ti jaʼ lokʼik-o ta tsobobbaile o junantike mu xa van snaʼik ti kʼu yuʼun laj yichʼik lokʼesele. Kʼuk xiuk noʼox, li moletik ta tsobobbaile chakʼik persa ti xbat saʼik xchiʼuk ti xbat svulaʼanik skotol li buchʼutik lokʼemike. Mi bat svulaʼanike, chalbeik ti xuʼ jmoj spasik orasione xchiʼuk ta slekil yoʼonton chalbeik ti sut talel ta tsobobbaile. Melel onoʼox, kʼalal oy buchʼu jal xa tajek slokʼel li ta organisasione, kʼunibem tajek ta mantal. Jaʼ yuʼun, mi oy ta yoʼonton tsut talele, li moletik ta tsobobbaile jaʼ tskʼelik buchʼu xuʼ xakʼbe chanubtasel ta Vivlia akʼo mi muʼyuk to sutem ta mantal. Pe taje jaʼ noʼox me sbainojik skʼelel li moletike.

¹¹ Li moletike oy ta yoʼontonik chchanbeik Jeova ti kʼu yelan chakʼ ta ilel xkʼuxul yoʼontone. Jaʼ yuʼun, chakʼik persa saʼel xchiʼuk skoltael skotol li buchʼutik lokʼemik ta mantale xchiʼuk chalbeik ti xuʼ sutik talel ta stojolal Jeova mi jech oy ta yoʼontonike. Jaʼ yuʼun, mi oy buchʼu chakʼ ta ilel ti sutesoj xa yoʼonton xchiʼuk ti muʼyuk xa tspas li mulile, xuʼ me sut xa noʼox talel ta mantal (2 Kor. 2:​6-8).

12. 1) ¿Bakʼin skʼan lek xichʼ spʼijilik li moletik ta tsobobbaile? 2) ¿Kʼu yuʼun mu stakʼ xkaltik ti oy buchʼutik mu xa sta-o xichʼik kʼuxubinel yuʼun Jeova ta skoj ti tsots la spas smulike? (Kʼelo xtok li tsʼib ta yok vune).

¹² Bateltike, li moletike skʼan lek xichʼ spʼijilik kʼalal muʼyuk to chkʼot ta nopel yuʼunik mi xuʼ xa sut talel ta mantal junuk krixchanoe. Taje jaʼ jech skʼan spasik kʼalal oy buchʼu laj yutilan junuk olol o ti oy kʼusi chopol la spasbee, ti la svalopatin komel mantale o ti oy kʼusi yolbaj la spas yoʼ xtuchʼ snupunele. Mi jaʼ jeche, li moletik ta tsobobbaile skʼan skʼelbeik lek skʼoplal mi ta melel sutesoj xa yoʼonton (Mal. 2:14; 2 Tim. 3:6). Yuʼun li kʼusi sbainojike jaʼ ti xchabiik li uni chijetike. Pe skʼan teuk ta sjolik xtok ti ta onoʼox xchʼam yan velta Jeova ta steklumal li buchʼu tsutes yoʼonton ta melele xchiʼuk ti chikta spasel li tsatsal mulile. Akʼo mi chichʼ spʼijilik li moletik kʼalal tskʼelbeik skʼoplal li buchʼu toj chopol kʼusi la spasik o ti yolbaj xa valopatinvanik komele, mu me stakʼ snopik ti oy buchʼu mu xa sta-o xichʼ kʼuxubinel yuʼun Jeova ta skoj li mulile (1 Ped. 2:10).b

¿KʼUXI XUʼ XKOLTAVAN LI TSOBOBBAILE?

13. 1) ¿Kʼu yelan skʼan xkiltik li buchʼu laj yichʼ pasel sensurar o laj yichʼ tukʼibtasele? 2) ¿Kʼu yelan skʼan xkiltik li buchʼu laj yichʼ lokʼesel ta tsobobbaile?

¹³ Jech kʼu chaʼal la jchantik li echʼ xchanobile, bateltike chjelav jun aʼyej ta tsobajel ti oy jun ermano ti laj yichʼ pasel sensurar o ti laj yichʼ tukʼibtasele. Kʼalal jech chkʼot ta pasele, xuʼ me jchiʼintik li ermanoe, yuʼun jnaʼojtik ti sutesoj xa yoʼonton xchiʼuk ti yiktaoj xa spasel li mulile (1 Tim. 5:20). Ta skoj ti jaʼo kermanotike, jtunel me tajek yuʼun ti jechuk-o jtijbetik yoʼonton yoʼ spas li kʼusi tukʼe (Ebr. 10:​24, 25). Pe jelel me tajek kʼalal oy buchʼu chichʼ lokʼesel ta tsobobbaile, yuʼun mu xa stakʼ jchiʼintik mi jaʼuk ti jchiʼintik ta veʼele (1 Kor. 5:11).

14. ¿Kʼusi skʼan xkʼot ta nopel yuʼun jun ermano ta stojolal li buchʼu lokʼesbil ta tsobobbaile? (Kʼelo xtok li lokʼoletike).

¹⁴ Kʼalal oy buchʼu chichʼ lokʼesel ta tsobobbaile, ¿mi jaʼ skʼan xal ti muʼyuk xa ta jtsaktik ta venta jutebuke? Mu jechuk. Melel onoʼox ti muʼyuk xa kʼusi jmoj ta jpastik xchiʼukike. Pe mi xakʼ sjol yoʼonton li jun ermanoe, xuʼ me stak ta ikʼel sventa xtal ta tsobajel li buchʼu lokʼesbil ta tsobobbaile, yikʼaluk van jaʼ junuk yutsʼ yalal o jaʼ toʼox yamigo. ¿Kʼu yelan skʼan xkiltik mi kʼot ta tsobajele? Li ta voʼnee, mi jsetʼuk ta jkʼopontik, pe li avie xuʼ snop ta jujuntal li ermanoetik mi tskʼoponik o mi moʼoj. Oy junantik ti lek chaʼiik ti chbat skʼoponik o ti chchʼamik kʼalal mi kʼot ta tsobajele. Pe li kʼusi mu stakʼ jpastike jaʼ ti jal xa te chijloʼilaj xchiʼuke o ti oy xa kʼusi jmoj ta jpastik xchiʼuke.

15. ¿Buchʼutik chalbe skʼoplal li ta 2 Juan 9 kʼalal ta 11? (Kʼelo xtok li rekuadro «¿Mi koʼol li mulil laj yalbeik skʼoplal li Juan xchiʼuk Pabloe?»).

¹⁵ Yikʼaluk van xi ta jnopbetik skʼoplale: «Pe ¿mi mu tauk xal Vivlia ti mi ta jkʼopontik jutebuk li buchʼu lokʼesbil ta tsobobbail ‹xkoʼolaj xa ti yakal ta jpastik ek li kʼusi toj chopol tspase›?» (kʼelo 2 Juan 9-11). Mi la jkʼeltik sjunul li loʼile, te chkakʼtik venta ti jaʼ skʼoplalik li jvalopatinej mantaletike xchiʼuk li buchʼutik tspukbeik skʼoplal li chopol talelale (Apok. 2:20). Jaʼ yuʼun chaʼa, mi oy buchʼu tspukbe batel skʼoplal li kʼusi mu jechuk chakʼ ta chanel Vivlia o tspukbe skʼoplal yan muliletike, li moletik ta tsobobbaile muʼyuk me chbat svulaʼanik. Melel onoʼox, xuʼ to me xjel mi jech tskʼan yoʼontone. Pe mi muʼyuk to bu jech yakʼoj ta ilele, muʼyuk me ta jkʼopontik jutebuk mi jaʼuk ta jtaktik ta ikʼel sventa xbat ta junuk tsobajel.

JCHANBETIK JEOVA TI KʼU YELAN CHAKʼ TA ILEL XKʼUXUL YOʼONTONE

16, 17. 1) ¿Kʼusi oy ta yoʼonton Jeova ti akʼo spas li buchʼu spasoj smule? (Esekiel 18:32). 2) Li moletik ta tsobobbaile, ¿kʼuxi xuʼ skoltaik ta abtel li Jeovae?

¹⁶ ¿Kʼusi xa la jchantik tal li ta voʼob xchanobil li ta revista liʼe? Li Jeovae mu skʼan ti oyuk buchʼu xichʼ lajesel junuke (kʼelo Esekiel 18:32). Oy ta yoʼonton ti lekuk xil sbaik yan velta xchiʼuk li buchʼu spasoj smule (2 Kor. 5:20). Jech oxal, jech-o chalbe yajtuneltak ti namajemik ta stojolal ti akʼo sutes yoʼontonik xchiʼuk ti sutik talel ta stojolale. Li moletik ta tsobobbaile jaʼ jun mukʼta matanal staojik ti xuʼ skoltaik ta abtel Jeova sventa skoltaik yoʼ sutes yoʼonton li buchʼutik tsots spasoj smulike (Rom. 2:4; 1 Kor. 3:9).

¹⁷ ¡Xmuyubajik tajek li buchʼutik te oyik ta vinajel kʼalal tsutes yoʼonton junuk jpas mulile! Li Jtotik Jeovae xmuyubaj jujukoj kʼalal tsut talel ta tsobobbail junuk yuni chij ti chʼayem toʼoxe. Jechuk-o me jnopbetik skʼoplal li xkʼuxul yoʼonton xchiʼuk li slekil yutsil yoʼonton Jeovae. Mi jech ta jpastike, mas to me ta jkʼantik (Luk. 1:78).