Li stestigotak Jeovae ¿kʼu yelan chilik li buchʼutik laj yichʼik lokʼesel li ta srelijionike?

Li stestigotak Jeovae chakʼ yipalik sventa xakʼik ta ilel ti kʼanvanemik, ti oyuk slekil yoʼontonik xchiʼuk ti snaʼuk x-ichʼvanik ta mukʼe. Mi oy junuk stestigo Jeova ti muʼyuk xa mas xkʼot ta tsobajeletik o ta cholmantale, o ti yiktaoj xa ta j-echʼele, ta jkoltakutik xchiʼuk chkakʼbekutik ta ilel ti jkʼanojkutike, jech xtok ta jtijbekutik yoʼonton sventa xnopaj yan velta ta stojolal li Diose (Lukas 15:4-7).

Bakʼintike, li kʼusitik tspas jun krixchanoe xuʼ van xichʼ lokʼesel-o li ta tsobobbaile (1 Korintios 5:13). Akʼo mi jech, ta skoj ti jkʼanojkutik tajek li kermanotakutike ta to xichʼik koltael sventa mu xichʼik lokʼesel. Akʼo mi xichʼik onoʼox lokʼesel li ta jtsobobbailkutike jech-o chkakʼbekutik yil ti jkʼanojkutike xchiʼuk ta jtsakutik ta venta jech kʼuchaʼal chal Vivlia ti skʼan jpaskutike (Markos 12:31; 1 Pedro 2:17).

¿Kʼu yuʼun xuʼ xlokʼ ta tsobobbail li jun krixchanoe?

Li Vivliae jamal chal ti skʼan xichʼ lokʼesel ta tsobobbaila li jun yajtsʼaklom Kristo ti la saʼ tsots smul xchiʼuk ti mu skʼan xikta li xchopol talelale (1 Korintios 5:11-13). Vaʼun chaʼa, ¿kʼusitik jaʼ li tsatsal mulil ti xuʼ xlokʼ-o ta tsobobbail li jun yajtsʼaklom Kristoe? Li Vivliae te chal kʼusitik jaʼ, junantike jaʼ liʼe: mukul sativanej, yakubel, milvanej, yutilanel o smajel utsʼ alalil xchiʼuk elekʼ (1 Korintios 6:9, 10; Galatas 5:19-21; 1 Timoteo 1:9, 10).

Pe maʼuk ti chichʼ lokʼesel ta anil ta tsobobbail li buchʼu tsots la saʼ smule. Yuʼun baʼyel chichʼ koltael yuʼun li moletik ta tsobobbailb sventa sjel li stalelale (Romanos 2:4). Li moletik ta tsobobbaile chakʼ yipalik xtok sventa xakʼik ta ilel manxoal, slekil yoʼontonik xchiʼuk xkʼuxul yoʼontonik kʼalal chkoltavanike (Galatas 6:1). Taje jaʼ sventa xakʼ venta ti tsots chopol kʼusi la spas li jun krixchanoe xchiʼuk ti xtijbat yoʼonton sventa sutes yoʼontone (2 Timoteo 2:24-26). Pe mi muʼyuk ta yoʼonton tsjel xkuxlejal xchiʼuk ti jechuk xkuxi kʼuchaʼal chal Vivlia mi laj xa ox yichʼ koltael jayibuk veltae, ta xichʼ lokʼesel li ta tsobobbaile. Vaʼun li moletike ta xalik ta tsobobbail ti maʼuk xa stestigo Jeova li jun krixchano taje.

Chaʼvoʼ moletik ta tsobobbail ta slekil yoʼonton chakʼbeik yil tekstoetik ta Vivlia jun kerem. Li jun mol ta tsobobbaile tskajan skʼob ta snekeb li kerem kʼalal yakal chchiʼin ta loʼile. — Li moletik ta tsobobbaile chakʼik persa yakʼel ta ilel manxoal, slekil oʼontonal xchiʼuk xkʼuxul oʼontonal kʼalal chchiʼinik ta loʼil li jun jpasmulil sventa sutes yoʼontone.

¿Kʼusi sbalil chichʼ tabel kʼalal chichʼ lokʼesel ta tsobobbail li buchʼu jech-o tsaʼ smule? Baʼyele, jaʼ ti jech-o chichʼ chʼunel li stukʼil mantaltak Diose xchiʼuk chkoltavan ti mu xichʼ chanbel xchopol talel li jun krixchano taje (1 Korintios 5:6; 15:33; 1 Pedro 1:16). Yan xtoke, xuʼ jaʼ xtijbat-o yoʼonton sventa xikta o sjel stalelal li jpasmulile (Ebreos 12:11).

¿Kʼu yelan chil stestigotak Jeova li buchʼutik lokʼesbilik ta tsobobbaile?

Li Vivliae chal ti skotol li yajtsʼaklomtak Kristoe skʼan mu xchiʼinik li buchʼutik yichʼojik lokʼesel ta tsobobbaile, yuʼun xi chale: «Mi jaʼuk xachiʼinik ta veʼel» (1 Korintios 5:11). Jaʼ yuʼun, muʼyuk jmoj xa kʼusitik ta jpaskutik xchiʼukik. Pe taje, maʼuk skʼan xal ti muʼyuk xa ta jtsakutik ta venta jutebuk li buchʼutik lokʼemik ta tsobobbaile. Yuʼun lek chʼambil mi kʼot li ta tsobajeletik ta jpaskutike. Jech xtok, li buchʼutik lokʼemik ta tsobobbaile xuʼ skʼanbeik koltael ta mantal li moletik ta tsobobbaile, xchiʼuk li buchʼutik te oyik ta tsobajele xuʼ skʼoponik.c

Li ta salon ti bu tstsob sbaik li stestigotak Jeovae, te oy jun nupultsʼakal ti jaʼik stestigotak Jeovae xchiʼuk lek yakal chchʼamik jun ants ti yichʼoj lokʼesel ta tsobobbaile. — Li buchʼutik yichʼojik lokʼesel ta tsobobbaile lek chʼambilik mi batik li ta jtsobajelkutike.

Pe ¿kʼusi van chkʼot ta pasel kʼalal chichʼ lokʼesel ta tsobobbail li malalil pe ti jaʼik-o stestigotak Jeova li yajnil xchiʼuk xnichʼnabtake? Akʼo mi muʼyuk xa koʼol chichʼik ta mukʼ li Diose yutsʼ yalal-o sbaik. Ta skoj ti jmoj nakalike, jech-o chichʼ sbaik ta mukʼ xchiʼuk tskʼan sbaik li malalil xchiʼuk ajnilale xchiʼuk jech ta sventa li ololetik eke.

Li buchʼu lokʼem ta tsobobbaile, xuʼ xalbe moletik ta tsobobbail ti xbat vulaʼanatuke. Li moletik ta tsobobbaile tstunesik li Vivliae xchiʼuk ta slekil yoʼontonik tsbeiltasik sventa stijbeik yoʼonton yoʼ sutes yoʼonton xchiʼuk ti sut talel ta stojolal Jeova li buchʼu la spas smule (Sakarias 1:3). Mi laj yikta li kʼusitik chopol tspase xchiʼuk mi jamal xvinaj ti yakal chchʼun li kʼusi chal Vivliae, xuʼ sut tal yan velta li ta tsobobbaile. Vaʼun, li ermanoetike ta sjunul yoʼonton ta xakʼik ta perton xchiʼuk tspatbeik yoʼonton, jech kʼuchaʼal la spasik li yajtsʼaklomtak Kristo ta Korinto kʼalal la sutes yoʼonton li jun jpasmulile (2 Korintios 2:6-8).

¿Kʼu yelan chaʼi sbaik avi li buchʼutik lokʼik toʼox ta tsobobbaile?

Kʼelavil kʼusi chal junantik stestigotak Jeova ti laj toʼox yichʼik lokʼesel ta tsobobbaile, pe ti kʼot ta nopel yuʼunik ti tsutik tal yan velta ta stojolal Diose.

«Kʼalal la jnop chisut talele,laj toʼox jnop ti tskʼan tsnaʼik moletik skotol li kʼusi la jpas kʼalal lokʼemun toʼox ta tsobobbaile. Pe mu jechuk, yuʼun jaʼ noʼox xi laj yalbeikune: ‹Ta jkʼankutik ti jaʼuk xavakʼ ta avoʼonton li kʼusi xuʼ xapas ta jelavele›. Kʼalal jech laj yalbeikune jun koʼonton laj kaʼi jba...» (María, Estados Unidos).

«Li tsobobbaile oy ta yoʼontonik ti xisut talel ta mantale. Kʼanbil laj kaʼi jba yuʼunik. Li ermanoetik ta tsobobbaile laj yakʼbeikun ta ilel ti yakʼojun xa ta perton li Jeovae xchiʼuk ti jech xa yakʼojikun ta perton eke. Taje, jaʼ la skoltaun sventa mu chopoluk xkaʼi jba ta sventa li kʼusi la jnuptane xchiʼuk ti xkakʼbe yipale. Jech xtok, li moletik ta tsobobbaile ep ta velta la spatbeikun koʼonton xchiʼuk la skoltaikun sventa lekuk xkil jba yan velta xchiʼuk li Jeovae, ti ep jbalil chilune xchiʼuk ti skʼanojune» (Malcom, Sierra Leona).

«Ximuyubaj tajek ti skʼanoj tajek steklumal li Jeovae xchiʼuk ti oy ta yoʼonton ti sakuk oye. Junantike xuʼ van chopol chilik, pe jtunel ti jech chichʼ pasele, yuʼun jaʼ svinajeb ti skʼanojutike. Ta jtojbe tajek ta vokol Jeova ti jaʼ jun Totil ti kʼanvanem xchiʼuk ti snaʼ x-akʼvan ta pertone» (Sandi, Estados Unidos).

**Sloʼil junantik buchʼutik xchanojbeik skʼoplal derecho ti maʼuk stestigotak Jeovae**

Kʼelo avil kʼusi tsnopik junantik nail chapanobbail xchiʼuk li buchʼutik xchanojbeik skʼoplal derecho ta stojolal li stestigotak Jeova ti tslokʼesik ta tsobobbail li buchʼutik mu sutes yoʼontonike.

«Mi oy jun relijion ti chakʼ sba ta beiltasel ta Vivlia xchiʼuk ti chakʼ persa ti jechuk xkuxi kʼuchaʼal chal li Vivliae oy srasonal yuʼunik ti slokʼesik ta stsobobbailik li buchʼu tsots tsaʼ smule. Lek xtok ti jech chichʼ pasele, yuʼun mi yolbaj mu skʼan xchʼun li mantaletik chal Vivliae mu sta-o ti te skʼoplal li ta relijione yuʼun xuʼ sokbe stalelal li yantik ti oy ta yoʼontonik jech chkuxiik kʼuchaʼal chal Vivliae» (Tribunal Superior de Justicia ta Inglaterra xchiʼuk Gales, 7 yuʼun junio ta 2019).
«Li nail chapanobbailetik ta Europa xchiʼuk ta yantik lumetike yalojik ti oy sderechoik ta stojolal ajvalil li stestigotak Jeova mi [oy buchʼu la slokʼesik li ta srelijionike] [...] oy sderechoik ta stojolal ajvalil ta skoj ti jaʼik jun relijione [...] jech xtok, li nail chapanobbaile muʼyuk sderecho sventa stikʼ sba ta sventa li kʼusitik tspas li relijionetike» (Paulo Pinto de Albuquerque, jchapanvanej toʼox ta Tribunal Europeo de Derechos Humanos).

a Kʼalal oy buchʼu tsaʼ smul xchiʼuk ti muʼyuk tsutes yoʼontone ta toʼox jtuneskutik li jpʼel kʼop expulsar xie. Pe li avie, jaʼ xa noʼox chichʼ alel ti laj yichʼ lokʼesel ta tsobobbail jech kʼuchaʼal chal ta Vivliae.

b Li moletik ta tsobobbaile jaʼik stestigotak Jeova ti ep xa kʼusi xchanojike xchiʼuk te tslokʼesik ta Vivlia li kʼusi chakʼik ta chanele. Jech xtok, tskoltaik xchiʼuk tspatbeik yoʼonton li yermanotakike. Muʼyuk chichʼik tojel ti jech tspasike (1 Pedro 5:1-3).

c Oy junantik veltae, li buchʼu chlokʼ ta tsobobbaile oy kʼusitik tspas sventa xakʼbe svokol o xchibajes li buchʼutik te oyik ta tsobobbaile. Jech xtok, xuʼ van bateltike tstijbe yoʼonton yantik sventa spasik kʼusitik chopol. Kʼalal jech chkʼot ta pasel taje, jaʼ ta jchʼunkutik li kʼusi chal ta Vivliae. Jaʼ yuʼun, muʼyuk ta jkʼoponkutik jsetʼuk li krixchano taje (2 Juan 9-11).