XCHANOBIL 57
¿Kʼusi skʼan jpastik mi tsots la jsaʼ jmultike?
Akʼo mi akʼanoj tajek li Jeovae xchiʼuk akʼo mi mu xakʼan xayayijesbe li yoʼontone, oy onoʼox bakʼintik ti muʼyuk kʼusi lek chbat ta pasel avuʼune. Pe oy kʼusitik ta jpastik xtok ti tsatsal mulil xae (1 Korintios 6:9, 10). Mi la apas tsots amule, teuk me ta ajol ti jech˗o skʼanojot li Jeovae, ti oy ta yoʼonton chakʼot ta perton xchiʼuk ti tskoltaote.
1. ¿Kʼusitik skʼan jpastik yoʼ xakʼutik ta perton li Jeovae?
Li buchʼu skʼanoj tajek Jeovae chopol tajek chaʼi sba mi la spas junuk tsatsal mulile, pe li kʼusi laj yalbe steklumal Jeovae tspat tajek koʼontontik. «Akʼo mi solel kuxul tsoj li amulike, sak ta xkom kʼuchaʼal li taive» (Isaias 1:18). Mi la jsutes ta melel koʼontontike, ta me xakʼutik ta perton li Jeovae. ¿Kʼusi skʼan xal ti ta jsutes koʼontontike? Jaʼ ti chopol tajek chkaʼi jbatik ta skoj li kʼusi la jpastike, ti mu xa jchaʼpastike xchiʼuk ti jkʼanbetik Jeova ti akʼo xakʼutik ta pertone. Jech xtok, kakʼtik persa ta sjelel li jnopbentike o ti xkiktatik spasel li kʼusitik la stij koʼontontik ta spasel li tsatsal mulile xchiʼuk ti xkakʼ ta jkuxlejaltik li slekil mantaltak Jeovae (kʼelo Isaias 55:6, 7).
2. ¿Kʼuxi tskoltautik Jeova ta stojolal li moletike?
Xi chalbutik Jeova mi tsots la jpas jmultike: «Akʼo stak ta ikʼel moletik ta tsobobbail» (kʼelo Santiago 5:14, 15). Li moletik taje tʼujbilik ta chʼul espiritu, skʼanojik Jeova xchiʼuk skʼanojbeik li yuni chijtake. Jaʼ yuʼun, chapalik lek sventa skoltautik yoʼ lekuk xkil jbatik yan velta xchiʼuk li Diose (Galatas 6:1).
¿Kʼuxi tskoltautik li moletik mi tsots la jpas jmultike? Chaʼvoʼ o oxvoʼ moletik chakʼbutik ta ilel ta Vivlia ti chopol li kʼusi la jpastike. Jech xtok, tspat koʼontontik xchiʼuk chakʼbutik lekil tojobtaseletik sventa mu xa jpastik yan velta. Mi oy buchʼu tsots la spas smul xchiʼuk mi muʼyuk lasutes yoʼontone, chichʼ lokʼesel ta tsobobbail. Taje jaʼ sventa mu xchanbeik li xchopol talelale.
JCHANTIK TO BATEL MAS
Aʼibo smelolal xchiʼuk tojbo ta vokol Jeova li kʼusi tspas ta jtojolaltik sventa skoltautik kʼalal mi la jpas tsots jmultike.
3. Mi laj kal ta jamal li jmultike, chkamigointik yan velta li Jeovae
Kʼalal tsots ta jpas jmultike, ta jyayijesbetik yoʼonton li Jeovae, jaʼ yuʼun skʼan xkalbetik ta jamal li jmultike. Kʼelik Salmo 32:1-5 xchiʼuk albeik skʼoplal li sjakʼobil liʼe:
¿Kʼu yuʼun jaʼ mas lek mi jamal laj kalbe jmultik li Jeovae?
Lek onoʼox ti jamal xkalbetik jmultik li Jeovae, pe mas to me jun koʼontontik mi la jkʼanbetik koltael li moletike. Kʼelik li VIDEOE xchiʼuk albeik skʼoplal li sjakʼobil liʼe:
Li ermano ta videoe, ¿kʼuxi koltaat yuʼun moletik sventa sut talel ta stojolal li Jeovae?
Tsots me skʼoplal ti jamal xkalbeik skotol jmultik li moletike, yuʼun oy ta yoʼontonik tskoltautik. Kʼelik Santiago 5:16 xchiʼuk albeik skʼoplal li sjakʼobiltak liʼe:
¿Mi mas van kʼun chaʼi moletik mi jamal chkalbetik li jmultike? ¿Kʼu yuʼun ti jech chavale?
Albo skotol amul li moletike xchiʼuk chʼamo ta sjunul avoʼonton li koltael chakʼbot Jeovae.
4. Li Jeovae chak’be ta ilel xk’uxul yo’onton li buch’utik sa’oj smulike
Mi oy buchʼu tsots la spas smul xchiʼuk mi mu skʼan xchʼunbe smantal Jeovae, chichʼ lokʼesel li ta tsobobbaile xchiʼuk muʼyuk kʼusi jmoj ta jpastik xchiʼuk. Kʼelik 1 Korintios 5:6, 11 xchiʼuk albeik skʼoplal li albeik skʼoplal li sjakʼobiltak liʼe:
Jech kʼuchaʼal chal li tekstoe, li levadurae tspuk sba batel ta s˗arinail li pane. Mi jaʼ ta jchiʼintik li buchʼu tsots la spas smul ti muʼyuk la sutes yoʼontone, ¿mi ta van sok kuʼuntik li tsobobbaile? ¿Kʼu yuʼun ti jech chavale?
Li moletike chchanbeik xkʼuxul yoʼonton Jeova, yuʼun tsaʼik xchiʼuk tskoltaik sventa sut talel li buchʼu yichʼoj lokʼesel ta tsobobbaile. Ep tajek li buchʼutik lokʼesbilik toʼox ta tsobobbaile sutemik xa talel. ¿Kʼu yuʼun? Yuʼun jaʼ koltaatik˗o sventa xvul xchʼulelik ti laj yichʼik tukʼibtasele akʼo mi kʼux tajek laj yaʼiik (Salmo 141:5).
¿K’uxi chak’ ta ilel Jeova ti lek sna’ xrasonaj, ti oy xk’uxul yo’onton xchi’uk ti oy slekil yo’onton ta stojolal li buchʼutik saʼoj smulike?
5. Chakʼutik ta perton Jeova mi ta jsutes koʼontontike
Li Jesuse laj yal jun loʼil sventa xkaʼibetik smelolal kʼu yelan chaʼi sba Jeova kʼalal oy buchʼu tsutes yoʼontone. Kʼelik Lukas 15:1-7 xchiʼuk albeik skʼoplal li sjakʼobil liʼe:
¿Kʼusi chakʼ jchantik ta sventa Jeova li loʼil liʼe?
Kʼelik Esekiel 33:11 xchiʼuk albeik skʼoplal li sjakʼobil liʼe:
¿Kʼusitik skʼan jpastik sventa xkakʼtik ta ilel ti jsutesoj xa koʼontontik ta melele?
Li Jeovae xkoʼolaj ta jun jchabichij. Tsvul tajek yoʼonton ta stojolal li yuni chijtake.
JUNANTIKE XI CHALIKE: «Mu jkʼan xkalbe moletik li kʼusi la jpase, yuʼun yikʼaluk slokʼesikun ta tsobobbail».
¿Kʼusi van xuʼ xavalbe mi oy buchʼu jech chal taje?
¿KʼUSI LA ACHAN?
Mi tsots la jpas jmultike, skʼan jsutes koʼontontik ta melel xchiʼuk mu xa jchaʼpastik yan velta. Vaʼun, chakʼutik ta perton li Jeovae.
Svulesobil ta joltik
¿Kʼu yuʼun lek ti jamal xkalbetik Jeova li jmultike?
¿Kʼusitik skʼan jpastik sventa xakʼutik ta perton li Jeovae?
¿Kʼu yuʼun skʼan xkalbetik moletik mi tsots la jpas jmultike?
XUʼ TO XAKʼEL LIʼE
Kʼelavil kʼuxi la stabe sbalil jun vinik li xkʼuxul yoʼonton Jeova chal ta Isaias 1:18.
Jpʼeluk ta koʼontontik ti oy xkʼuxul yoʼonton li Jeovae (5:02)
¿Kʼusi sbalil ta jtabetik mi laj yichʼ lokʼesel ta tsobobbail li jtoybae?
Kʼanbilik xchiʼuk chichʼik akʼbel ta ilel xkʼuxul oʼontonal li buchʼutik lokʼemik ta tsobobbaile.
Kʼelavil kʼuxi sut talel yan velta ta stojolal Jeova jun vinik. Kʼelbo avil li sloʼil xkuxlejale, «Skʼan xisut ta stojolal Jeova».
«Jelbat˗o xkuxlejalik yuʼun li Vivliae» (Li Jkʼel-osil ta toyole, avril˗junio ta 2012)