Epuk sbalil xkiltik ti oy viniketik ti akʼbilik kʼuchaʼal matanale

1. ¿Kʼusitik junantik matanal yakʼojbutik li Jesuse?

MI JUNUK krixchano ti toj echʼ noʼox slekil yoʼonton jech kʼuchaʼal li Jesuse. Kʼalal ay ta balumile, la stunes sjuʼel sventa spas skʼelobiltak juʼel, jaʼ jech la skolta epal krixchanoetik (Luk. 9:​12-17). Li mukʼta matanal laj yakʼbutike jaʼo kʼalal laj yakʼ xkuxlejal ta jtojolaltike (Juan 15:13). Li Jesuse jech-o laj yakʼ ta ilel slekil yoʼonton kʼalal chaʼkuxiem xa oxe, yuʼun jamal onoʼox yaloj ti ta skʼanbe Jeova sventa stunes xchʼul espiritu yoʼ xchanubtasutik xchiʼuk ti spat koʼontontike (Juan 14:​16, 17, tsʼib ta yok vun; 16:13). Jech xtok, li Jesuse te chchanubtasutik ta tsobajeletik sventa jnaʼtik kʼuxi xuʼ jpastik ta jchankʼop li krixchanoetike (Mat. 28:​18-20).

2. ¿Buchʼutik li viniketik ti kʼotemik kʼuchaʼal matanale? (Efesios 4:​7, 8).

² Taje maʼuk noʼox li matanaletik yakʼojbutik li Jesuse. Li jtakbol Pabloe xi laj yal ta stojolal Jesus kʼalal muy batel ta vinajele: «Laj yakʼ viniketik jech kʼuchaʼal matanal» (kʼelo Efesios 4:​7, 8). Laj yalbe skʼoplal xtok ti jaʼ sventa skoltaik tsobobbail ti laj yichʼ vaʼanel li viniketik taje (Efes. 1:​22, 23; 4:​11-13). Li avi kʼakʼale, li buchʼutik kʼotemik kʼuchaʼal jun matanale jaʼ li siervo ministerialetike, li moletik ta tsobobbaile xchiʼuk li jkʼelvanejetik ta sirkuitoe.a Melel onoʼox, li viniketik taje maʼuk tukʼil krixchanoetik xchiʼuk oy onoʼox kʼusi ti muʼyuk lek chbat ta pasel yuʼunike (Sant. 3:2). Pe jaʼik jun mukʼta matanal yakʼojbutik li Jesuse, yuʼun jaʼ tstunesan sventa skoltautik.

3. Albo junuk skʼelobil kʼuxi xuʼ jkoltatik ta abtel li viniketik yakʼoj Jesus kʼuchaʼal matanale.

³ Li Jesuse laj yakʼ «kʼuchaʼal matanal» li viniketik taje sventa stsatsubtasik li tsobobbailetike (Efes. 4:12). Sventa spas yuʼunik li yabtelike, xuʼ me jkolta jbatik ek. Jnopbetik skʼoplal liʼe: li buchʼutik ch-abtejik ta svaʼanel jun Salon sventa Tsobobbaile jeltos kʼusitik tspasik, li yantike te ch-abtejik, jaʼuk li yantike tskolta sbaik ta yakʼel veʼlil, oy kʼusitik chkuchik bal o yan kʼusitik tspasik. Jaʼtik jech ek, jkotoltik xuʼ jkoltatik li siervo ministerialetik, li moletik ta tsobobbail xchiʼuk li jkʼelvanejetik ta sirkuitoe. Taje xuʼ jech jkolta jbatik ta jkʼopojeltik xchiʼuk li ta kʼusitik ta jpastike. Kalbetik skʼoplal kʼusi sbalil ta jtabetik li yabtel tspas li viniketik taje xchiʼuk kalbetik skʼoplal kʼuxi xuʼ jtojbetik ta vokol Jesus xchiʼuk li viniketik ti akʼbilik kʼuchaʼal matanale.

LI SIERVO MINISTERIALETIKE «TSKOLTAIK YANTIK»

4. ¿Kʼusitik junantik abtelaletik la spasik li siervo ministerialetik ta baʼyel sigloe?

⁴ Li ta baʼyel sigloe, oy junantik ermanoetik ti laj yichʼik biiltasel kʼuchaʼal siervo ministerialetike (1 Tim. 3:8). Taje jaʼik van li buchʼutik «tskoltaik yantik» ti laj yalbe skʼoplal Pablo li ta 1 Korintios 12:28. Kʼuchaʼal chkakʼtik ventae la skolta sbaik sventa xuʼ lekuk spas bal yabtel li moletik ta tsobobbail jech kʼuchaʼal ti xchanubtasvanik xchiʼuk ti skʼelik lek ti lekuk noʼox oy li ermanoetike. Yikʼaluk van la skolta sbaik ta slokʼtael li Chʼul Tsʼibetike o xbat smanik talel li kʼusitik chtun sventa xuʼ slokʼtaike.

5. ¿Kʼusitik tspasik li siervo ministerialetik avie?

⁵ Kalbetik skʼoplal kʼusitik tspasik li siervo ministerialetik avi kʼakʼale (1 Ped. 4:10). Junantike tskolta sbaik ta skʼelel li takʼin ta tsobobbaile, li territorioetike, ti stakik ta kʼanel li vunetike xchiʼuk ti spukbeik li ermanoetike, tskʼelik li audio xchiʼuk videoe, chtunik ta akomodadoretik o tskolta sbaik ta skʼelel mi oy kʼusitik sokanuk li ta Salon sventa Tsobobbaile. Skotol taje jaʼ sventa lekuk oy li tsobobbaile (1 Kor. 14:40). Jech xtok, junantik siervo ministerialetike ch-akʼbat sparteik li ta Jkuxlejaltik xchiʼuk Kabteltik sventa Diose o tsjelubtasik mantaletik. Junantik xtoke chichʼik biiltasel ta yajkoltaobba li jkʼelvanej ta grupo sventa cholmantale. Bateltik xtoke, chichʼik van albel yuʼun junuk mol ta tsobobbail ti akʼo xbat chiʼinvanuk ta svulaʼanel junuk ermanoe.

6. ¿Kʼu yuʼun toj ep sbalil chkiltik li abtelal tspasik li siervo ministerialetike?

⁶ Toj ep sbalil kʼusi tspas li siervo ministerialetike. Jkʼeltik kʼusitik yalojik junantik ermanoetik. Xi laj yal jun ermana ta Bolivia ti Beberlyb sbie: «Ep tajek sbalil chkil kʼusi tspas li siervo ministerialetike, yuʼun xuʼ jkʼupin li tsobajeletike, xuʼ xikʼejin, xkakʼ jloʼil, jchikinta li mantaletike, ti jkʼupin skʼelel li videoetik xchiʼuk li lokʼoletike. Jaʼ sbainojik xtok sventa mu kʼusi snuptanik li ermanoetik ti te oyik ta salone xchiʼuk ti lekuk x-echʼ yuʼunik tsobajel li buchʼutik ch-ochik talel ta videollamadae. Kʼalal chlaj li tsobajele, tskolta sbaik ta skʼelel o ta smesel li salone xchiʼuk ta skʼelel li takʼine. Jech xtok, tskʼelik lek ti oyuk kuʼuntik li vunetike. Ta jtojbeik tajek ta vokol ti jech tspasike». Li Lesli ti te nakal ta Colombia xchiʼuk ti jaʼ yajnil jun mol ta tsobobbaile, xi chale: «Li siervo ministerialetike ep tajek skoltaojik li jchiʼile. Ti muʼyukuk jech tskolta sbaike, mas to ep yabtel jechuke. Ep tajek sbalil chkil ti toj baxbolik xchiʼuk ti toj lek snaʼ xkoltavanike». Jkotoltik ep sbalil chkiltik li kʼusitik tspasike (1 Tim. 3:13).

7. ¿Kʼuxi xuʼ xkakʼtik ta ilel ti ta jtojtik ta vokol li abtelal tspasik li siervo ministerialetike? (Kʼelo xtok li lokʼole).

⁷ Xuʼ van ta jkʼan ta jtojbetik ta vokol li kʼusi tspasik li siervo ministerialetike, pe li Vivliae chalbutik ti akʼo xkakʼtik ta ilel ti ta jtojtik ta vokole (Kol. 3:15). Jkʼeltik kʼuxi laj yakʼ ta ilel jun mol ta tsobobbail ta Finlandia ti David sbie, xi chale: «Ta jtsʼibabe batel junuk tarjeta o ta jtakbe batel junuk teksto ta mensaje ti la spat koʼonton li kʼusi la spas ta jtojolale o ta jtojbe ta vokol jtosuk yabtel ti ep sbalil chkile». Li Pascal xchiʼuk Jael ti te nakalik ta Nueva Caledoniae tspasik orasion ta stojolal li siervo ministerialetike, xi chalike: «Achʼtik toe, lik jtojbekutik ta vokol Jeova ti oy siervo ministerialetik ta jtsobobbailkutike xchiʼuk ta jkʼanbekutik ti akʼo skoltaane». Li Jeovae chaʼi li orasionetik taje xchiʼuk tstabeik sbalil sjunul li tsobobbaile (2 Kor. 1:11).

«TSOTS CH-ABTEJ» LI MOLETIK TA TSOBOBBAILE

8. ¿Kʼu yuʼun laj yal Pablo ti tsots abtejik li moletik ta baʼyel sigloe? (1 Tesalonisenses 5:​12, 13).

⁸ Li moletik ta baʼyel sigloe toj tsots abtejik (kʼelo 1 Tesalonisenses 5:​12, 13; 1 Tim. 5:17). Li stukike la sbeiltasik li tsobobbaile, jaʼ la sbainik xchapanel li tsobajele xchiʼuk oy kʼusitik tsots skʼoplal la snopbeik skʼoplal. Jech xtok, ta slekil yoʼonton tstojobtasik li ermanoetik xchiʼuk li ermanaetike. Ti jech tspasike jaʼ sventa lekuk noʼox oy li tsobobbaile (1 Tes. 2:​11, 12; 2 Tim. 4:2). Pe maʼuk noʼox taje, yuʼun skʼan smakʼlin sbaik ta mantal xchiʼuk ti skʼel yutsʼ yalalike (1 Tim. 3:​2, 4; Tito 1:​6-9).

9. ¿Kʼusitik sbainojik spasel junantik moletik ta tsobobbail li avi kʼakʼale?

⁹ Li avi kʼakʼale, li moletik ta tsobobbaile ep kʼusitik sbainojik spasel. June jaʼ ti chcholik lekil aʼyeje (2 Tim. 4:5). Lek ta chanbel ti kʼu yelan chcholik mantale, chchapanik li cholmantal ta territorioetike, chchanubtasvanik kʼuxi xuʼ jcholtik mantal xchiʼuk kʼuxi xuʼ xkakʼtik chanubtasel. Jech xtok, jaʼik jchapanvanejetik ti chakʼ ta ilel xkʼuxul yoʼontonik xchiʼuk ti muʼyuk chtʼujvanike. Kʼalal oy buchʼu tsots tspas smule, chakʼik persa skoltael sventa lekuk xil sbaik yan velta xchiʼuk Jeova. Pe yakʼoj ta yoʼontonik xtok sventa lekuk-o sak li tsobobbaile (1 Kor. 5:​12, 13; Gal. 6:1). Pe li kʼusi mas yakʼoj ta yoʼontonike, jaʼ ti xchabibeik xchijtak li Jeovae (1 Ped. 5:​1-3). Tsjelubtasik mantaletik, chakʼik persa yojtikinel li ermanoetike xchiʼuk chbat svulaʼanik sventa spatbeik yoʼonton. Jech xtok, junantik moletike chkoltavanik ta svaʼanel xchiʼuk skʼelel li Salonetik sventa Tsobobbaile, chchapanik li asamblea rejionale, chkoltavanik ta Komite ti Tsbeiltasvan batel ta Ospitaletike, ta Grupo ti Tsvulaʼanik ta Ospital li Ermanoetik ti Ipike xchiʼuk oy kʼusitik yan sbainojik. ¡Ep tajek kʼusitik tspasik ta jtojolaltik!

10. ¿Kʼu yuʼun jkʼanojtik li moletik ta tsobobbaile?

¹⁰ Li Jeovae laj yal ti lek chchabibat xchijtak yuʼun li moletike xchiʼuk ti muʼyuk xa ta xiʼik mi jaʼuk ta xnikik ta xiʼele (Jer. 23:4). Taje jaʼ jech kʼot ta stojolal Yoana ti te nakal ta Finlandia kʼalal tsots ipaj li smeʼe, xi chale: «Vokol chkaʼi sventa xkalbe yantik ti kʼu yelan chkaʼi jbae. Pe kʼot jun mol ta tsobobbail ti ta slekil yoʼonton la xchikintabun akʼo mi mu xkojtikin lek. Koʼol la jpaskutik orasion xchiʼuk laj yalbun ta jamal ti skʼanojun li Jeovae. Mu xvul lek ta jol li kʼusi laj yalbune, jaʼ noʼox xvul ta jol ti jun koʼonton laj kaʼi jba yuʼune. Chkale, jaʼ Jeova la stak talel kʼalal laj yil ti chtun kuʼun koltaele». Li voʼot une, ¿kʼuxi skoltaojoxuk li moletik ta atsobobbaile?

11. ¿Kʼuxi xuʼ xkakʼbetik ta ilel moletik ta tsobobbail ti ta jtojbetik ta vokol li yabtel tspasike? (Kʼelo xtok li lokʼole).

¹¹ Li Jeovae oy ta yoʼonton ti xkakʼbetik ta ilel moletik ta tsobobbail ti jkʼanojtik «ta skoj ti tsots ch-abtejike» (1 Tes. 5:​12, 13). Xi chal Henrietta ti te nakal ta Finlandiae: «Li moletik ta tsobobbaile ta slekil yoʼonton tskoltaik li yantike, pe maʼuk skʼan xal ti chʼabal yabtelike, ti muʼyuk chlubike o ti muʼyuk kʼusi tsnuptanike, jaʼ yuʼun bateltike chinopaj batel ta stojolal junuk mol ta tsobobbail, vaʼun xi chkalbee: ‹Ta jkʼan chkalbot ti toj lek chapas avabtel li ta tsobobbaile›». Xi chal jun ermana ti te nakal ta Turquía ti Sera sbie: «Li moletik eke skʼan onoʼox patbel yoʼontonik sventa jechuk-o spas li yabtelike, jaʼ yuʼun ta jtsʼibabeik batel tarjeta, chkikʼik ta veʼel xchiʼuk ta jchiʼinik ta cholmantal». ¿Mi oy junuk mol ta tsobobbail ti chakʼan chatojbe ta vokol ta skoj ti oy kʼusi lek la spas ta atojolale? Mi jaʼ jeche, kʼelo kʼuxi xuʼ xapas (1 Kor. 16:18).

LI JKʼELVANEJETIK TA SIRKUITOE TSTSATSUBTASIK LI TSOBOBBAILETIKE

12. ¿Kʼusi yan matanal laj yakʼ Jesus sventa lekuk noʼox oy li tsobobbailetike? (1 Tesalonisenses 2:​7, 8).

¹² Oy to yan matanal laj yakʼbe tsobobbailetik li Jesuse. Li ta baʼyel sigloe, li Jesuse la sbeiltas li moletik ta Jerusalen sventa stakik batel Pablo, Bernabe xchiʼuk yan yajtsʼaklomtak Kristo sventa xtunik kʼuchaʼal jkʼelvanejetik (Ech. 11:22). Taje jaʼ sventa stsatsubtasik li tsobobbailetike, jech kʼuchaʼal tspasik li siervo ministerialetik xchiʼuk li moletike (Ech. 15:​40, 41). Li viniketik taje ep tajek kʼusitik la spasik, laj yakʼ ta vokol xkuxlejalik xchiʼuk la stsatsubtasik li yantike (kʼelo 1 Tesalonisenses 2:​7, 8).

13. ¿Kʼusitik abtelal tspasik li jkʼelvanejetik ta sirkuitoe?

¹³ Li jkʼelvanejetik ta sirkuitoe xtal xbatik noʼox. Junantike ta sienal noʼox kilometro chichʼ yuʼunik sventa xkʼotik ta junuk tsobobbail. Skotol xemana tsjelubtasik jayibuk mantaletik, chbat svulaʼanik li ermanoetike, tsjelubtasik li tsobajel xchiʼuk li prekursoretike, li tsobajel xchiʼuk li moletike xchiʼuk jaʼ sbainojik slokʼesel li cholmantale. Jech xtok, jaʼ sbainojik xchapanel li asamblea ta sirkuito, rejional xchiʼuk li mantaletik chjelave. Maʼuk noʼox, jaʼ oy ta sbaik xchapanel li chanob vun sventa prekursoretike, chchapanik li tsobajel xchiʼuk li prekursoretik ti bu kʼalal smakoj li sirkuitoe. Jech xtok, oy kʼusitik tsots skʼoplal skʼan skʼelbeik skʼoplal ti ch-albatik talel yuʼun li Betele, bateltike ta anil noʼox ch-albatik talel.

14. ¿Kʼusi srasonal oy kuʼuntik sventa epuk sbalil xkiltik li yabtel tspasik li jkʼelvanejetik ta sirkuitoe?

¹⁴ ¿Kʼusi sbalil tstabeik li tsobobbailetik ta skoj ti toj lek tspas yabtelik li jkʼelvanejetik ta sirkuitoe? Jun ermano ta Turquía xi chale: «Kʼalal chtal vulaʼanvanuk li jkʼelvanejetik ta sirkuitoe, tstijbeikun koʼonton sventa masuk to jchiʼin li ermanoetike xchiʼuk ti jkoltaike. Ep jkʼelvanejetik ta sirkuito ti xkojtikinane, pe mi junuk velta kiloj ti mu xokobik o ti mu skʼan xchiʼinikun ta loʼile». Li Yoana ti laj kalbetik skʼoplal ta parafo 10 lokʼ xcholik mantal ta naetik xchiʼuk li jkʼelvanej ta sirkuitoe, pe muʼyuk buchʼu te la staik. Xi chale: «Akʼo mi jech, mu xchʼay-o ta jol li vaʼ kʼakʼale, yuʼun jaʼtik toʼox yan-o bu batik ta naklej li chaʼvoʼ jvixobtake. Vaʼun, ta jnaʼik tajek. Li jkʼelvanej ta sirkuitoe ta slekil yoʼonton la spatbun koʼonton xchiʼuk laj yalbun ti mu sbateluk osil ti jech nom oyunkutike. Yuʼun li ta achʼ balumile oy noʼox yorail sventa jmoj oyunkutik». Li jkʼelvanejetik ta sirkuitoe kʼanbilik yuʼun li ermanoetik ta skoj ti toj lek yoʼontonike (Ech. 20:37–21:1).

15. 1) ¿Kʼuxi xuʼ xkakʼ ta jkuxlejaltik li 3 Juan 5 kʼalal ta 8, xchiʼuk kʼuxi xuʼ xkakʼtik ta ilel ti ta jtsaktik ta venta li jkʼelvanejetik ta sirkuitoe? (Kʼelo xtok li lokʼole). 2) ¿Kʼu yuʼun skʼan jtsaktik ta venta yajnilik li ermanoetik ti oy kʼusi sbainojik ta tsobobbaile, xchiʼuk kʼuxi xuʼ xkakʼtik ta ilel? (Kʼelo li rekuadro «Oyuk ta koʼontontik li yajnilike»).

¹⁵ Li jtakbol Juane laj yalbe Gayo ti ta slekiluk yoʼonton xchʼam li ermanoetik ti chkʼot svulaʼanik li tsobobbailetike xchiʼuk xi la skʼanbe ti akʼo spase: «Koltaano me mi batike, jech xapas kʼuchaʼal tskʼan Diose» (kʼelo 3 Juan 5-8). ¿Kʼuxi xuʼ jech jpastik ek? Jaʼo kʼalal chkikʼtik ta veʼel li jkʼelvanej ta sirkuitoe xchiʼuk kʼalal chijlokʼ ta cholmantal kʼalal chvulaʼanvanike. Jkʼeltik kʼusi la spas Lesli ti laj kalbetik skʼoplal li ta parafo 6 sventa xakʼ ta ilel ti tstojbe ta vokol li yabtelike, xi chale: «Ta jkʼanbe Jeova ti akʼo x-akʼbatik li kʼusi chtun yuʼunike. Li voʼon xchiʼuk jchiʼile ta jtsʼibabekutik batel karta sventa jtojbekutik ta vokol ti ep la spatbun koʼontonkutik ti ay vulaʼanvanikuke». Teuk me ta joltik ti oy kʼusitik tsnuptanik jech kʼuchaʼal voʼotike, ta x-ipajik, tsvul yoʼontonik xchiʼuk ta xchibajik. Jaʼ yuʼun, kʼalal oy kʼusi lek chkalbetik o mi oy kʼusi ta jkʼelanbetik jutebuke, xuʼ me jaʼ stakʼobil li yuni orasionike (Prov. 12:25).

CHTUN MAS VINIKETIK SVENTA XKʼOTIK «KʼUCHAʼAL MATANAL»

16. ¿Kʼusi van skʼan snopbeik skʼoplal li ermanoetike? (Proverbios 3:27).

¹⁶ Ta spʼejel balumile chtun mas ermanoetik sventa xkoltavanik li ta tsobobbailetike. Mi avichʼoj xa voʼe, ¿mi oy ta avoʼonton jech spasel? (kʼelo Proverbios 3:27). ¿Mi yakal chavakʼ persa sventa xakʼot ta siervo ministerial? Mi siervo ministerialot xae, ¿mi oy ta avoʼonton chatun ta mol ta tsobobbail?c ¿Mi xuʼ van oy kʼusitik xajel ta akuxlejal sventa xabat li ta Chanob vun sventa j-al lekil aʼyejetik yuʼun Ajvalilal yuʼun Diose? Mi labat li ta chanob vun taje, mas to me oy kʼusi xuʼ xakʼ abain li Jesuse. Mi mu spas avuʼun chavaʼie, albo li Jeovae. Kʼanbo xchʼul espiritu sventa spas avuʼun kʼusiuk noʼox abtelal ti xa-akʼbat abaine (Luk. 11:13; Ech. 20:28).

17. ¿Kʼusi sprevail oy kuʼuntik ti jaʼ yakal tsbeiltasutik Jesus li avie?

¹⁷ Li viniketik ti tsots ch-abtejik ti akʼbilik kʼuchaʼal matanale jaʼ svinajeb ti jaʼ yakal tsbeiltasutik Jesus li avi kʼakʼale (Mat. 28:20). Li Ajvalil kuʼuntike skʼanojutik tajek, chakʼ ta ilel slekil yoʼonton, te sat kʼusi chtun kuʼuntik xchiʼuk tstunes ermanoetik sventa skoltautik. ¿Mi mu jechuk ti oy ta koʼontontik ta jtojbetik ta vokole? Jkʼeltik kʼuxi xuʼ xkakʼbetik ta ilel. Mu xchʼay xkaʼitik ti jtojbetik ta vokol li Jeovae, yuʼun jaʼ te likem talel «skotol li lekil matanal xchiʼuk li tukʼil matanale» (Sant. 1:17).