Li vokoliletik chakʼ li paskʼopetike
Kʼalal oy bu chlik kʼop o ch-echʼ junuk paskʼope, toj echʼ noʼox chopol. Li ta spʼejel balumile yiloj tajek svokolik li krixchanoetike xchiʼuk li soltaroetike.
SOLTAROETIK
«Skotol ora chopol kʼusitik chkʼot ta pasel, yuʼun chkiltik kʼu yelan chichʼik milel li krixchanoetike o ti tsots yayijem chkomike. Ta xiʼel noʼox kuxulutik» (Gari, Gran Bretaña).
«Lajem ta bala jpat xchiʼuk jsat xchiʼuk kiloj kʼu yelan tsmilik epal krixchanoetik manchuk mi kʼoxik to o mi ep xa sjabilalik. Kʼalal chijbat ta paskʼope, tsta yorail ti muʼyuk xa chopol chkiltik ti oy buchʼutik chil svokolik o ti xichʼik milele» (Wilmar, Colombia).
«Mi jaʼuk xchʼay ta joltik kʼalal oy buchʼu te jkʼelojtik chichʼ milele. Te-o ta joltik ti kʼu yelan x-avete, ti kʼu yelan laj yil svokole, mu xchʼay-o ta joltik li kʼusi kʼot ta pasele» (Zafirah, Estados Unidos).
KRIXCHANOETIK
«La jnop ti mu xa junuk koʼonton yan veltae. Chijxiʼ mi xkichʼtik milel, pe li kʼusi mas chijxiʼoe jaʼ ti xichʼ milel li kutsʼ kalaltike o li kamigotaktike» (Oleksandra, Ucrania).
«Sob tajek chilik sventa xbat jchol jba ti bu xuʼ jta jveʼelkutike. Chibat ta chib ora ta sob, vaʼun jaʼ to chisut talel kʼalal poʼot xa ox oʼlol akʼobale. Chakʼ tajek xiʼel kʼalal te chololutike, yuʼun xuʼ xijtʼab ta bala» (Daler, Tayikistán).
«Kʼalal echʼ li paskʼope, chamik li jtot jmeʼe. Jaʼ yuʼun, jtuk xa likom xchiʼuk muʼyuk xa buchʼu spatbun koʼonton» (Marie, Ruanda).
Akʼo mi tsots laj yil svokolik ta paskʼop li buchʼutik laj yal sloʼilike, jun xa yoʼontonik li avie. Pe maʼuk noʼox, yuʼun snaʼojik lek ti poʼot xa xlaj skʼoplal li paskʼopetike. Li revista liʼe chalbe skʼoplal tekstoetik ta Vivlia ti chal kʼuxi chlaj skʼoplal li paskʼopetike.