Xuʼ jun koʼontontik akʼo mi oy paskʼopetik
Li Gari ti tun toʼox ta soltaroale xi chale: «Kʼalal muʼyuk toʼox ta jchan Vivliae, mu toʼox xkaʼibe smelolal ti kʼu yuʼun muʼyuk tukʼ kʼusi tspasike, ti oy kʼopetike xchiʼuk ti oy kʼusi chopol tspasik li krixchanoetike. Pe li avie, jun xa koʼonton xchiʼuk jnaʼoj ti oy xa kʼusi xchapanoj Dios sventa oyuk jun oʼontonal li ta balumile».
Li Garie maʼuk noʼox stuk ti jech chaʼi sbae. Jkʼeltik kʼuxi skoltaoj yantik li kʼusi chal Vivliae.
LI KʼUSI CHAL VIVLIAE: «Kajval Jeova, yuʼun toj lek avoʼonton xchiʼuk chapalot sventa xachʼay mulil» (Salmo 86:5).
¿KʼUXI TSKOLTAUTIK? «Li teksto liʼe tspatbun tajek koʼonton, yuʼun chakʼbun kil ti toj ep xkʼuxul yoʼonton li Jeovae. Jnaʼoj ti ta onoʼox xakʼun ta perton ta skoj li kʼusitik chopol la jpas kʼalal li-ay ta paskʼope» (Wilmar, Colombia).
LI KʼUSI CHAL VIVLIAE: «Ta jpas achʼ vinajel xchiʼuk jun achʼ balumil; muʼyuk xa chichʼ tael ta naʼel li kʼusitik kʼotemik ta pasel ta voʼnee xchiʼuk muʼyuk te chkom-o ta oʼontonal» (Isaias 65:17).
¿KʼUXI TSKOLTAUTIK? «Xiʼem likom ta skoj li kʼusitik toj chopol laj kil kʼalal li-ay ta paskʼope xchiʼuk ta jvul-o tajek koʼonton. Pe li teksto liʼe tspatbun tajek koʼonton, yuʼun li Jeovae tslajesbe skʼoplal ta j-echʼel li kʼusitik chopol chtal ta jol ti chopol chkaʼi jba yuʼune. Chlaj skʼoplal li jvokole. ¡Toj kʼupil sba li kʼusi tspas Jeova ta jtojolale!» (Zafirah, Estados Unidos).
LI KʼUSI CHAL VIVLIAE: «Kʼalal jaʼo ch-ajvalilaje, xnichinajik noʼox li buchʼutik tukʼike, ta x-epaj li jun oʼontonale, jaʼ to mi laj li lunae» (Salmo 72:7).
¿KʼUXI TSKOLTAUTIK? «Nopolik noʼox ta jnopbe skʼoplal li kʼusi chal li teksto liʼe. Jutuk xa skʼan xlaj skʼoplal li paskʼop xchiʼuk li vokoliletik chakʼe. Vaʼun, muʼyuk xa ta jvul-o koʼontontik mi oy kʼusi chopol xuʼ snuptan li kutsʼ kalaltik xchiʼuk li kamigotaktike» (Oleksandra, Ucrania).
LI KʼUSI CHAL VIVLIAE: «Ta xkuxiik li buchʼutik chamem avuʼune. […] ¡Julavanik xchiʼuk avananik ta muyubajel, voʼoxuk ti te oyoxuk ta pukuke!» (Isaias 26:19).
¿KʼUXI TSKOLTAUTIK? «La smilik jutuk mu skotoluk li kutsʼ kalal kʼalal tskʼan ox tsmilik skotol li jtutsietike. Pe li kʼusi chal li teksto liʼe chakʼbun kil ti ta onoʼox jkʼelik yan veltae. Oy xa tajek ta koʼonton ta jkʼel ti kʼu yelan xmuyubaj noʼox chloʼilajike» (Marie, Ruanda).
LI KʼUSI CHAL VIVLIAE: «Mu xa jaluk skʼan, vaʼun chchʼay skʼoplal li buchʼutik toj chopolike […]. Yan li manxoetike jaʼ chuʼuninik li balumile xchiʼuk tskʼupinik tajek li jun oʼontonal ti muʼyuk spajebe» (Salmo 37:10, 11).
¿KʼUXI TSKOLTAUTIK? «Akʼo mi chʼabal xa paskʼop li ta jlumale, oy-o chopol krixchanoetik xchiʼuk oy kʼusitik tspasik ti muʼyuk tukʼe. Li teksto liʼe skoltaojun tajek. Li Jeovae yiloj skotol xchiʼuk xaʼibe smelolal ti kʼu yelan chkaʼi jbae. Jech xtok, yaloj ta jamal ti poʼot xa slajesbe skʼoplal ta j-echʼel li kʼusitik chopole» (Daler, Tayikistán).
Li krixchanoetik ti laj yal sloʼilik li ta revista liʼe te skʼoplalik li ta smiyonal xa noʼox stestigotak Jeova ti jun xa yoʼontonik ta skoj ti koltaatemik yuʼun li Vivliae. Kʼalal muʼyuk toʼox chchanik Vivliae, yikʼaluk van spʼajojik toʼox li buchʼutik yan-o slumalik, skʼopik o ta skoj ti oy kʼusi chopol chilike. Pe laj xa slokʼes ta yoʼontonik li pʼajbaile (Efesios 4:31, 32). Li stestigounkutik Jeovae muʼyuk ta jtikʼ jbakutik ta politika xchiʼuk muʼyuk ta jtikʼ jbakutik kʼalal oy buchʼutik tsaʼik kʼope (Juan 18:36).
Li stestigounkutik Jeovae koʼol ta jkolta jbakutik, yuʼun kutsʼ kalal chkilkutik li kermanokutik xchiʼuk kermanakutik ta spʼejel balumile (Juan 13:35). Jaʼ jech laj yakʼ venta Oleksandra ti laj xa kalbetik skʼoplale, yuʼun jatav lokʼel xchiʼuk xvix ta slumalik ta skoj ti oy paskʼope. Xi chale: «Kʼalal likʼotkutik li ta yan lume, te xa smalaojunkutik li stestigotak Jeova li ta lum taje. Toj ep la skoltaunkutik, jaʼ yuʼun mu xa toj vokoluk laj kaʼikutik ti xinopkutik tee».
Oy ta koʼontonkutik ti xachiʼinunkutik li ta jtsobajelkutike. Te chachan kʼuxi xuʼ junuk avoʼonton avie xchiʼuk kʼuxi chakʼ talel jun oʼontonal ta spʼejel balumil li Diose. Xuʼ xa-och ta jw.org sventa xasaʼ junuk tsobajel ti te ch-echʼ ti bu nopol nakalote o xuʼ te xakʼan junuk chanubtasel ta Vivlia ti muʼyuk tojbile. Jaʼ chchanubtasot jun stestigo Jeova ti jaʼ tstunes li vun Kʼupino akuxlejale.