«Tʼujik buchʼu chakʼan chatunik ta stojolal»

1. ¿Kʼusi skʼan jpastik sventa xijmuyubaj ta melele, xchiʼuk kʼu yuʼun? (Isaias 48:​17, 18).

LI Jtotik ta vinajele skʼanojutik tajek xchiʼuk tskʼan ti akʼo jkʼupin jkuxlejaltik li avie xchiʼuk li ta jelavele (Ekl. 3:​12, 13). Kʼalal la spasutike, laj yakʼ ti oyuk kʼusi xijtojob spasele. Akʼo mi jech, muʼyuk laj yakʼ ti akʼo jventain jba jtuktike xchiʼuk ti jnop jtuktik li kʼusi lek xchiʼuk li kʼusi chopole (Ekl. 8:9; Jer. 10:23). Li Jeovae snaʼoj ti jaʼ noʼox chakʼ jmuyubajeltik ta melel mi chijtun ta stojolale xchiʼuk mi ta jchʼunbetik smantale (kʼelo Isaias 48:​17, 18).

2. ¿Kʼusi tskʼan akʼo jchʼuntik li Satanase, xchiʼuk kʼuxi yakʼoj ta ilel Jeova ti mu meleluke?

² Li Satanase tskʼan ti akʼo jchʼuntik ti xuʼ xijmuyubaj mi muʼyuk chijtun ta stojolal Jeovae xchiʼuk ti xuʼ jventain jba jtuktike (Jen. 3:​4, 5). Sventa xakʼ ta ilel Jeova ti mu meleluk li kʼusi laj yale, yakʼoj to permiso ti akʼo sventain sba stuk li krixchanoetik kʼuk sjaliluke. Jamal lek xvinaj ti muʼyuk lek kʼusi kʼotem ta pasel ti sventainoj sba stuk li krixchanoetike. Pe li ta Vivliae, te chalbe skʼoplal vinik antsetik ti xmuyubajik noʼox tunik ta stojolal Jeovae. Li buchʼu mas xmuyubaj ti jech la spase jaʼ li Jesukristoe. ¿Kʼusi ta jchantik batel li ta xchanobil liʼe? Baʼyel, ta jkʼeltik batel junantik srasonaltak ti kʼu yuʼun la stʼuj chtun ta stojolal Jeovae. Ta tsʼakale, ta jkʼeltik batel ti kʼu yuʼun sta-o ti jaʼ noʼox xkichʼtik ta mukʼ li Jtotik ta vinajele. Ta slajebale, ta jvules ta joltik kʼusitik la stij koʼontontik sventa xijtun ta stojolal li Jeovae.

¿KʼU YUʼUN LA STʼUJ CHTUN TA STOJOLAL JEOVA LI JESUSE?

3. ¿Kʼusi laj yal Satanas ti chakʼbe li Jesuse, xchiʼuk kʼusi kʼot ta nopel yuʼun kʼalal jech albate?

³ Kʼalal ay ta balumil li Jesuse, persa la stʼuj buchʼu tskʼan chtun ta stojolal. Kʼalal mu toʼox jaluk yichʼoj voʼe, li Satanase laj yalbe ti ta xakʼbe skotol li mukʼtik lumetik ta balumile, jaʼ noʼox venta mi ichʼe ta mukʼ jkojuke. Pe li Jesuse xi la stakʼbee: «¡Batan, Satanas! Yuʼun xi tsʼibabile: ‹Jaʼ noʼox skʼan xavichʼ ta mukʼ li Jeova Dios avuʼune xchiʼuk jaʼ noʼox stuk skʼan xapasbe xchʼul abtel›» (Mat. 4:​8-10). ¿Kʼu yuʼun jech la stakʼ li Jesuse? Kalbetik batel junantik srasonal.

4, 5. ¿Kʼusi srasonal oy yuʼun Jesus ti la stʼuj chtun ta stojolal Jeovae?

⁴ Li srasonal ti mas tsots kʼoplal yuʼun Jesus ti la stʼuj chtun ta stojolal Stote, jaʼ ta skoj ti skʼanoj tajek ta sjunul yoʼontone (Juan 14:31). Jech xtok, li Jesuse tun ta stojolal Jeova, yuʼun snaʼoj ti jaʼ li kʼusi mas lek xuʼ spase (Juan 8:​28, 29; Apok. 4:11). Snaʼoj ti jaʼ li buchʼu laj yakʼbutik li jkuxlejaltike, ti toj lek yoʼontone xchiʼuk ti xuʼ jpat koʼontontik ta stojolale (Sal. 33:4; 36:9; Sant. 1:17). Li Jeovae muʼyuk onoʼox sjutojbe kʼop li Jesuse xchiʼuk jaʼ akʼbil yuʼun Stot skotol li kʼusitik oy yuʼune (Juan 1:14). Pe jaʼuk li Satanase jaʼ noʼox yakʼojbe svokol li krixchanoetike, yuʼun chijcham jkotoltik, jaʼ jun jutkʼop xchiʼuk jaʼ noʼox tspas li kʼusi tskʼan yoʼontone (Juan 8:44). Li Jesuse xojtikin lek li Jeovae xchiʼuk li Satanase, jaʼ yuʼun muʼyuk bu la sta ta nopel jsetʼuk ti jech tspas kʼuchaʼal li Satanase xchiʼuk ti stoy sba ta stojolal li Jeovae (Filip. 2:​5-8).

⁵ Yan srasonal ti tun ta stojolal Jeova li Jesuse jaʼ ti te ta sjol ti lek kʼusitik chkʼot ta pasel yuʼun mi tukʼ tun ta stojolal Jeovae (Ebr. 12:2). Te ta sjol ti kʼalal tukʼ-o chakʼ sbae, jaʼ jech ta xchʼultajesbe sbi li Stote xchiʼuk jaʼ jech tslajesbe skʼoplal li kʼusitik chopol spasoj li Satanase.

¿KʼU YUʼUN STA-O XKICHʼTIK TA MUKʼ LI JEOVAE?

6, 7. 1) ¿Kʼu yuʼun oy epal krixchanoetik muʼyuk chtunik ta stojolal li Jeovae? 2) ¿Kʼu yuʼun sta-o ti xkichʼtik ta mukʼ li Jeovae?

⁶ Li avi kʼakʼale, epal krixchanoetik muʼyuk chtunik ta stojolal Jeova ta skoj ti mu xojtikinike. Yuʼun mu xojtikinbeik ti toj kʼupil sba li stalelaltake xchiʼuk li kʼusitik spasoj ta stojolalike. Taje jaʼ toʼox jech li krixchanoetik ti la xcholbe mantal Pablo li ta jteklum Atenase, yuʼun li stukik eke mu toʼox xojtikinik li Diose (Ech. 17:​19, 20, 30, 34).

⁷ Li Pabloe laj yalbe li krixchanoetik ta Atenas ti Diose «chakʼbe xkuxlejal xchiʼuk jaʼ chakʼbe yichʼ ikʼ skotol li krixchanoetike xchiʼuk li yan kʼusitike». Jech xtok, xi to laj yalanbee: «Jaʼ kuxulutik yuʼun, chijbakʼ xchiʼuk ti oyutike». Laj to yalbe smelolal xtok ti ta jun noʼox vinik la spas krixchanoetik ta skotol lumetike. Ta skoj ti jaʼ Jpasvanej kuʼuntike, jaʼ noʼox sta-o ti xkichʼtik ta mukʼe (Ech. 17:​25, 26, 28).

8. ¿Kʼusi ti muʼyuk tsujutik spasel li Jeovae?

⁸ Ta skoj ti jaʼ Jpasvanej xchiʼuk ti jaʼ Mukʼul jpasmantal ta vinajel balumil li Jeovae, xuʼ suj jechuk li krixchanoetik sventa xtunik ta stojolale, pe li stuke mu jechuk tspas. Li kʼusi noʼox oy ta yoʼontone, jaʼ ti xkʼot ta yamigotak ta sbatel osil li epal krixchanoetike (1 Tim. 2:​3, 4). Jaʼ yuʼun, ep yakʼojbutik sprevailtak sventa xakʼ ta ilel ti oy ta melele xchiʼuk ti skʼanojutik tajeke. Ta skoj taje, li Jeovae chchanubtasutik sventa xuʼ xkakʼbetik yil li krixchanoetik li kʼusitik lek tspas ta jelavele xchiʼuk ti kʼu yelan tspase (Mat. 10:​11-13; 28:19, 20). Jech xtok, xchapanoj tsobobbailetik xchiʼuk svaʼanoj jkʼelvanejetik ta jujun tsobobbail sventa xchabivanik ta slekil yoʼontonik (Ech. 20:28).

9. ¿Kʼuxi yakʼoj ta ilel Jeova ti kʼanvaneme?

⁹ Li Jeovae toj echʼ xa noʼox snaʼ xkʼanvan, yuʼun oy kʼusitik lek chakʼbe li krixchanoetik ti mu xchʼunik ti oy jun Dios ta melele. Ti kʼu xa sjalil likem talel li kuxlejale, ta smiyonal noʼox krixchanoetik jaʼ jech kuxulik jech kʼuchaʼal tskʼan stukike. Pe ta skoj ti toj lek yoʼonton li Jeovae, yakʼojbe skotol li kʼusitik chtun yuʼunik sventa xuʼ xkuxiike xchiʼuk ti skʼupin li xkuxlejalike (Mat. 5:​44, 45; Ech. 14:​16, 17). Koliyal li Jeovae xuʼ x-ayan yutsʼ yalalik, sta yamigotakik xchiʼuk ti skʼupin li yabtel yok skʼobike (Sal. 127:3; Ekl. 2:24). Jamal xvinaj ti skʼanoj skotol krixchanoetik li Jtotik ta vinajele (Eks. 34:6). Jkʼeltik batel junantik srasonaltak ti kʼu yuʼun la jnoptik chijtun ta stojolal li Jeovae xchiʼuk ti kʼuxi chakʼbutik sbendisione.

¿KʼU YUʼUN LA JNOPTIK CHIJTUN TA STOJOLAL JEOVA?

10. 1) ¿Kʼusi la stij avoʼonton ti chatun ta stojolal Jeovae? (Mateo 22:37). 2) ¿Kʼusi sbalil ataojbe ti oy smalael yuʼun li Jeovae? (Salmo 103:​13, 14).

¹⁰ Jech kʼuchaʼal li Jesuse, li srasonal mas tsots skʼoplal ti kʼu yuʼun chijtun ta stojolal Diose jaʼ ti jkʼanojtik ta sjunul koʼontontike (kʼelo Mateo 22:37). Mas to chijnopaj ta stojolal Jeova kʼalal chkojtikinbetik li stalelaltak ti toj kʼupilik sbae. Li stuke toj echʼ xa noʼox smalael yuʼun ta jtojolaltik. Kʼalal mu xchʼunik mantal li j-israeletike, xi xvokolet laj yalanbee: «Avokolikuk, sutanik tal, iktaik li achopol beike» (Jer. 18:11). Li Jeovae te ta sjol ti lum achʼelutik noʼoxe (kʼelo Salmo 103:​13, 14). Kʼalal chanopbe skʼoplal li stalelaltak Jeova xchiʼuk ti oy smalael yuʼune, ¿mi mu jechuk ti tstij avoʼonton sventa xatun ta stojolal ta sbatel osile?

11. ¿Kʼusitik srasonal oy kuʼuntik ti la jnoptik chijtun ta stojolal li Jtotik ta vinajele?

¹¹ Li yan srasonal oy kuʼuntik ti chijtun ta stojolal Jeovae jaʼ ti jnaʼojtik ti jaʼ li kʼusi mas lek xuʼ jpastike (Mat. 4:10). Jech xtok, te ta joltik ti lek kʼusi chkʼot ta pasel kʼalal tukʼ chkakʼ jbatik ta stojolal li Diose, yuʼun ta jkolta jbatik sventa xichʼ chʼultajesbel li sbie, chkakʼtik ta ilel ti jaʼ jun jutkʼop li Satanase xchiʼuk ta jmuyubtabetik yoʼonton li Jtotik ta vinajele. Mi ta jnoptik chijtun ta stojolal Jeova li avie, xuʼ me xijtun-o ta stojolal ta sbatel osil (Juan 17:3).

12, 13. ¿Kʼusi xuʼ jchantik ta stojolal li Yein xchiʼuk Pame?

¹² Ta jbikʼtaltik noʼox xuʼ xlik jkʼantik ta sjunul koʼontontik li Jeovae xchiʼuk ti masuk to jkʼantik batel kʼalal ch-echʼ li jabiletike. Jkʼeltik kʼusi la spas li Yein xchiʼuk Pam ti xvix smuk noʼox sbaike.a Li Yeine 11 sjabilal kʼalal lik xchan li Vivliae, yan li Pame 10 sjabilal. Akʼo mi muʼyuk xchʼamik chanubtasel ta Vivlia li stot smeʼike, akʼbatik permiso ti xichʼik chanubtasele, jaʼ noʼox venta mi chbatik to ta chʼulna ti bu chkʼot li yutsʼ yalalike. Xi chal li Yeine: «Li kʼusi laj yakʼik jchan ta Vivlia li stestigotak Jeovae jaʼ la skoltaun sventa mu jlajes droga xchiʼuk ti mu ximulivaje, yuʼun li jchiʼiltake tsujikun».

¹³ Kʼalal staoj xa ox svaʼlejik li tsebetike, ochik ta jcholmantal. Ta mas tsʼakale, lik tunikuk ta prekursora. Kʼalal oy xa ox sjabilal li stot smeʼike, la xchabiik xtok. Kʼalal tsnopbe skʼoplal Yein ti kʼu yelan jelavem talel li xkuxlejale, xi chale: «Te laj kakʼ venta ti muʼyuk onoʼox chikta yamigotak li Jeova kʼalal chtun yuʼunik koltaele, yuʼun xi chal li ta 2 Timoteo 2:19: ‹Li Jeovae xojtikin li buchʼutik jaʼ yuʼune›». Ta melel, li Jeovae ta xchabian li buchʼutik chkʼanate xchiʼuk ti chtunik ta stojolale.

14. ¿Kʼuxi xuʼ jpakbetik skʼoplal li sbi Jeovae? (Kʼelo xtok li lokʼoletike).

¹⁴ Oy ta koʼontontik ti jkolta jbatik sventa xichʼ chʼultajesbel sbi li Jeovae. Nopo noʼox avaʼi ti oy junuk avamigo ti toj lek yoʼontone, ti lek snaʼ xakʼ kʼusi oy yuʼun xchiʼuk ti xaʼibe smelolal ti kʼu yelan chavaʼi abae. Jaʼ toe, laj avaʼi ti oy buchʼu chal ti toj chopol li avamigoe xchiʼuk ti jaʼ jun jutkʼope. ¿Kʼusi van chapas? ¿Mi mu tauk xapakbe skʼoplal? Jaʼ jechtik ek. Kʼalaluk chkaʼitik ti oy buchʼutik chalik jutbil kʼopetik ta stojolal li Jeovae, ta jkʼan ta jpakbetik skʼoplal ti bu kʼalal xuʼ kuʼuntike xchiʼuk ti xkaltik ta jamal ti mu meleluk li kʼusi chalike (Sal. 34:1; Is. 43:10). Li kʼusi ta jpastik xchiʼuk li kʼusi chkaltike jaʼ jech chkakʼtik ta ilel ti chijtun ta stojolal Jeova ta sjunul jkuxlejaltike.

15. ¿Kʼusitik bendisional la sta Pablo kʼalal la sjel li kʼusi ox oy ta yoʼonton tsta ta xkuxlejale? (Filipenses 3:​7, 8).

¹⁵ Sventa mas xijtun ta stojolal Jeova xchiʼuk sventa lekuk xilutike, oy ta koʼontontik ta jeltik li kʼusi ta jkʼan ta jpas ta jkuxlejaltike. Li buchʼu jech la spase jaʼ li Pabloe, li stuke xuʼ ox lek ojtikinbil xkʼot ti bu nakale, pe ta sjunul yoʼonton laj yikta li kʼusi xuʼ ox sta sventa stsʼakli li Kristoe xchiʼuk ti xtun ta stojolal li Jeovae (Gal. 1:14). Ta skoj ti jech la spase, jun noʼox yoʼonton xchiʼuk la sta bendision ti xuʼ koʼol x-ajvalilaj xchiʼuk Kristo te ta vinajele. Li Pabloe muʼyuk la xchaʼnaʼ ti la snop chtun ta stojolal li Jeovae. Li voʼotik eke muʼyuk ta jchaʼnaʼtik li kʼusi la jel ta jkuxlejaltike (kʼelo Filipenses 3:​7, 8).

16. ¿Kʼusi chakʼ jchantik li kʼusi la spas Juliae? (Kʼelo xtok li lokʼoletike).

¹⁶ Mi jaʼ chkakʼ ta koʼontontik chijtun ta stojolal Jeovae, ta me jtatik bendision li avie xchiʼuk li ta jelavele. Kalbetik skʼoplal li kʼusi la spas li ermana Juliae. Kʼalal bikʼit toʼoxe, tskʼupin tajek chkʼejin li ta s-iglesiae. Ta skoj ti xtojob lek ta kʼejimol li Juliae, labal sba ilat yuʼun jun jkʼejimol ta opera ti xtojob lek eke. Vaʼun, albat ti mas to chchanubtase. Mu ta sjaliluke, laj yichʼ lek ojtikinel li Juliae xchiʼuk lik kʼejinuk li ta teatroetik ti lek ojtikinbile. Kʼalal jaʼo te oy ta jun eskuela sventa musika ti lek ojtikinbile, oy jun xchiʼil ta chanun ti albat ta sventa Diose xchiʼuk albat ti jaʼ Jeova sbi li Diose. Ta mas tsʼakal jutuke, li Juliae chaʼkoj ta xemana lik xchan li Vivliae. Jech xtok, kʼot ta nopel yuʼun ti chtun ta stojolal li Jeovae xchiʼuk ti xikta li kʼejimole. Mu kʼunuk laj yaʼi ti jech la spase. Xi chal kaʼitike: «Oy epal krixchanoetik laj yalbeikun ti mu la xitojob snopel ti laj kikta kʼejimol ta skoj noʼox ti ta jkʼan chitun ta stojolal Jeovae». ¿Kʼu yelan chaʼi sba Julia avi ti mas xa ta 30 jabil jech kʼot ta nopel yuʼune? Xi chale: «Ximuyubaj tajek xchiʼuk jnaʼoj ti ta jelavele ta xakʼbun Jeova li kʼusi oy ta koʼonton spasele» (Sal. 145:16).

JECHUK-O XATUN TA STOJOLAL JEOVA

17. ¿Kʼusi skʼan teuk ta sjolik li buchʼutik chtunik ta stojolal Diose? Xchiʼuk ¿kʼusi van skʼan snopbeik skʼoplal li buchʼutik muʼyuk to chtunik ta stojolal Diose?

¹⁷ Li avie, jutuk xa tajek skʼan xichʼ lajesel li kʼusitik oy liʼ ta sba balumile. Li jtakbol Pabloe xi la stsʼibae: «Yuʼun ‹jutuk xa yorail› vaʼun ‹chvul onoʼox li buchʼu chtale, muʼyuk bu chjalij›» (Ebr. 10:37). ¿Kʼusi skʼan xal taje? Ti ta onoʼox xil svokol li yajtuneltak Diose, pe ti muʼyuk xa bu chjalije. Pe li buchʼutik muʼyuk to chtunik ta stojolal Jeovae, jutuk xa tajek yorail yuʼunik sventa snopik mi chtunik ta stojolal (1 Kor. 7:29).

18. ¿Kʼusi tskʼanbutik akʼo jpastik li Jeova xchiʼuk Jesuse?

¹⁸ Li Jesuse la stijbe yoʼonton li krixchanoetik sventa xkʼotik ta yajchankʼoptak xchiʼuk ti jechuk-o stsʼakliate (Mat. 16:24). Jaʼ yuʼun, mi oy xa jayibuk jabil chijtun ta stojolal Jeovae mu me xijlubtsaj. Skʼan onoʼox xkakʼ kipaltik sventa jechuk-o xijtun ta stojolal Jeova akʼo mi mu kʼunuk chkaʼitik. Pe ¿mi mu jechuk ti xuʼ xa noʼox xijmuyubaj avi xchiʼuk ti jkʼupintik li bendisionetik ti chijtun ta stojolal Jeovae? (Sal. 35:27).

19. ¿Kʼusi chakʼ jchantik li kʼusi la snuptan Yine?

¹⁹ Junantike tsnopik ti muʼyuk tskʼupin xkuxlejalik kʼalal tsnop chtunik ta stojolal li Jeovae. Mi kerem tsebot toe, ¿mi chanop ti oy kʼusitik muʼyuk chakʼupin spasel ta skoj ti chatun ta stojolal Diose? Jun kerem ti Yin sbie xi chale: «La jnop toʼox ti mu kʼusi x-akʼbat spasik li stestigotak Jeovae, yuʼun li yan kerem tsebetik ti koʼol jabilalkutike tskʼupin li xkuxlejalike, chbatik ta kʼinetik, chlokʼ xchʼay yoʼontonik xchiʼuk tsebetik o chtajinik ta videojuegoetik ti naka majbail chvinaje. Yan li voʼone, jaʼ noʼox chibat ta tsobajel xchiʼuk chilokʼ ta cholmantal». ¿Kʼusi kʼot ta stojolal Yin ti jech la sta ta nopele? Xi chale: «Oy kʼusitik lik jpas ta mukul. La jkʼupin kʼuk sjalil. Pe ti melel xkaltike, muʼyuk ximuyubaj. Jaʼ yuʼun, lik jnopbe skʼoplal li kʼusitik toʼox la jchan ta Vivlia ti muʼyuk xa ox ta jtsak ta ventae xchiʼuk la jnopbe skʼoplal kʼusi sbalil ta jtabe mi lik kakʼ ta jkuxlejale. Vaʼun, kʼot ta nopel kuʼun ti chlik tunkun ta stojolal Jeova ta sjunul koʼontone. Kʼalal jech lik jpase, te laj kakʼ venta ti lik stakʼbun j-orasion li Jeovae».

20. ¿Kʼusi skʼan jpʼeluk ta koʼontontik spasel?

²⁰ Jun jtsʼibajom yuʼun salmoe la skʼupil kʼopta Jeova ta jun kʼejoj, xi laj yalbee: «Xmuyubaj noʼox li buchʼu atʼujoje xchiʼuk ti chanopajes tal ta atojolal sventa te chnaki li ta avamakʼe» (Sal. 65:4). Jaʼ yuʼun, xiuk xkaltik ta sjunul koʼontontik jech kʼuchaʼal laj yal li Josuee: «Li voʼon xchiʼuk kutsʼ kalale jaʼ chitunkutik ta stojolal li Jeovae» (Jos. 24:15).