¿Kʼu yelan skʼan xkilbetik li sbi Jeovae?

1, 2. ¿Kʼuxi jnaʼojtik ti jaʼ mas toj tsots skʼoplal laj yil Jesus li sbi Jeovae?

TOJ echʼ xa noʼox tsots skʼoplal laj yil Jesus li sbi Jeovae. Chʼabal buchʼu yan jech xkoʼolaj ti kʼu yelan tspakbe skʼoplal li sbi Stote. Jech kʼuchaʼal la jchantik li echʼ xchanobile, lokʼ ta yoʼonton cham sventa sakubtasbe skʼoplal li sbi Jeovae (Mar. 14:36; Ebr. 10:​7-9). Kʼalal mi tsuts li Ajvalilal ta Jmil Jabile, ta sjunul yoʼonton chakʼbe sutel li yabtel akʼbil sventa xchʼultajesbe li sbi Jeovae (1 Kor. 15:​26-28). Skotol li kʼusitik spasoj xa li Jesuse xchiʼuk li kʼusi tspas ta jelavel ta skoj li sbi Jeovae, jaʼ jech jamal chakʼ ta ilel ti skʼanoj tajek li Stote.

² Ta sbi Stot tal ta balumil li Jesuse (Juan 5:43; 12:13). Laj yakʼbe yojtikin yajchankʼoptak li sbi Stote (Juan 17:​6, 26). Chanubtasvan xchiʼuk la spas skʼelobil juʼelal ta sbi Jeova (Juan 10:25). Jech xtok, la spas orasion ta stojolal li yajchankʼoptake, xi la skʼanbe li Jeovae: «Kʼelo me ta skoj li abie» (Juan 17:11). Jaʼ yuʼun chaʼa, mi toj echʼ xa noʼox tsots skʼoplal laj yilbe sbi Jeova li Jesuse, ¿kʼuxi xa noʼox ti oy buchʼu chal ti jaʼ yajtsʼaklom Kristo mi mu xojtikinbe xchiʼuk mi muʼyuk tstunesbe li sbi Jeovae?

3. ¿Kʼusi ta jkʼeltik batel li ta xchanobil liʼe?

³ Li melel yajtsʼaklomtak Kristoe chakʼ yipalik sventa stsʼaklibeik batel li yav yok Jesuse. Jech oxal, li voʼotik eke toj tsots skʼoplal chkilbetik li sbi Stote (1 Ped. 2:21). Li ta xchanobil liʼe, ta jkʼeltik batel ti yichʼojbeik sbi Jeova li buchʼutik tspukik batel «li lekil aʼyejetik ta sventa li Ajvalilale» (Mat. 24:14). Jech xtok, ta jkʼeltik batel ti kʼu yelan skʼan xkilbetik li sbi Jeova ta jujuntalutike.

«JUN JTEKLUM TA SVENTA LI SBIE»

4. 1) ¿Kʼusi laj yalbe yajchankʼoptak Jesus kʼalal jutuk xa ox skʼan sut batel ta vinajele? 2) ¿Kʼusi sjakʼobil ta jkʼelbetik batel skʼoplal?

⁴ Kʼalal jutuk xa ox skʼan sut batel ta vinajel li Jesuse, xi laj yalanbe komel li yajchankʼoptake: «Chavichʼ atsatsalik kʼalal mi vul ta atojolalik li chʼul espiritue, vaʼun chavalik batel jkʼoplal ta Jerusalen, ta sjunul Judea, ta Samaria xchiʼuk kʼalal to ta namal balumil» (Ech. 1:8). Jaʼ yuʼun, li lekil aʼyejetike maʼuk noʼox te chichʼ pukbel skʼoplal li ta Israele, yuʼun ta mas tsʼakale li krixchanoetik ta skotol jteklumetike xuʼ xkʼotik ta yajchankʼoptak Jesus ek (Mat. 28:​19, 20). Pe kakʼtik avil venta ti xi laj yal Jesuse: «Chavalik batel jkʼoplal». Taje xkoʼolaj ti xi laj yale: «Chakʼotik ta jtestigo». ¿Mi jaʼ van skʼan xal ti jaʼ noʼox chkʼotik ta stestigotak Jesus li achʼ jchʼunolajeletike? ¿O mi skʼan van xojtikinbeik sbi Jeova xchiʼuk ti spukbeik batel skʼoplal eke? Te ta jtabetik stakʼobil li ta Echos kapitulo 15.

5. ¿Kʼuxi laj yakʼik ta ilel li jtakboletik xchiʼuk li moletik ta Jerusalen ti skʼan xojtikinbeik sbi Jeova skotol li krixchanoetike? (Kʼelo xtok li lokʼole).

⁵ Li ta sjabilal 49, li jtakboletik xchiʼuk li moletik ta Jerusalene la stsob sbaik sventa xalbeik skʼoplal ti kʼusi skʼan spasik li krixchanoetik ti maʼuk judaetik sventa xkʼotik ta yajtsʼaklom Kristoe. Kʼalal tstsuts xa ox li stsobajelike, li Santiago ti jaʼ xchaʼitsʼin Jesuse, xi laj yale: «Lek tsʼakal laj yal Simeon [Pedro] ti kʼu yelan laj yakʼ sat Dios ta sba velta ta stojolal jyanlumetik sventa te tslokʼes talel jun jteklum ta sventa li sbie». ¿Buchʼu ta sbi taje? Xi la sta ta alel li kʼusi laj yal j-alkʼop Amose: «Sventa akʼo saʼik ta sjunul yoʼontonik Jeova ti kʼu to yepal komemike xchiʼuk skotol li jyanlumetike, krixchanoetik ti biiltasbilik ta jbie, xi li Jeovae» (Ech. 15:​14-18). Jaʼ yuʼun un chaʼa, li achʼ jchʼunolajeletike maʼuk noʼox oy kʼusi chchanik ta stojolal Jeova, yuʼun ta xichʼbeik li sbi xtoke, jaʼ xkaltik, ti chichʼik ojtikinel li ta biil taje xchiʼuk ti chakʼik batel ta ojtikinele.

6, 7. ¿Kʼu yuʼun tal ta balumil li Jesuse, xchiʼuk kʼusi li srasonal mas tsots skʼoplal ti tal ta balumile?

⁶ Teuk ta joltik ti xi smelolal li sbi Jesuse: «Jaʼ jkoltavanej li Jeovae». Jaʼ onoʼox jech la spas, yuʼun li Jeovae la stunes Jesus sventa spoj skotol li krixchanoetik ti oy xchʼunel yoʼontonike. Li Jesuse tal ta balumil sventa xakʼ xkuxlejal ta stojolal li krixchanoetike (Mat. 20:28). Kʼalal laj yakʼ xkuxlejal sventa spojutike, jkotoltik xuʼ xa jtatik perton ta skoj li jmultike xchiʼuk ti jtatik li kuxlejal sbatel osile (Juan 3:16).

⁷ Pe ¿kʼu yuʼun ti chtun kuʼuntik pojel jkotoltike? Jaʼ ta skoj li kʼusi kʼot ta pasel li ta nichimaltik Edene. Jech kʼuchaʼal la jchantik li echʼ xchanobile, li baʼyel jtot jmeʼtik Adan xchiʼuk Evae, la stoy sbaik ta stojolal Jeova xchiʼuk chʼay yuʼunik li kuxlejal ta sbatel osile (Jen. 3:​6, 24). Pe maʼuk noʼox tsots skʼoplal ti xichʼ pojel li krixchanoetike, yuʼun oy to kʼusi mas tsots skʼoplal skʼan xichʼ chapanel: jaʼ ti laj yichʼ chopol kʼoptabel li sbi Jeovae (Jen. 3:​4, 5). Jaʼ yuʼun chaʼa, ti chichʼik pojel li snitilulaltak Adan xchiʼuk Evae oy kʼusi te nitil skʼoplal ti mas to tsots skʼoplale: jaʼ ti xichʼ chʼultajesbel li sbi Jeovae. Ta skoj ti kʼot ta yajkʼopojel xchiʼuk ti laj yichʼbe sbi Stot li Jesuse, jaʼ noʼox stuk ti toj lek ti kʼu yelan la xchʼultajesbe li sbie.

8. ¿Kʼusi skʼan xaʼibeik smelolal xchiʼuk xchʼunik skotol li buchʼu chkʼotik ta yajchankʼoptak Jesuse?

⁸ Mu ventauk mi jaʼik judaetik o mi maʼuk, skʼan xaʼibeik lek smelolal xchiʼuk xchʼunik ti jaʼ noʼox xuʼ sta skolebalik ta stojolal li Stot Jesuse ti jaʼ li Jeovae (Juan 17:3). Jech xtok, ta xichʼik ojtikinel li ta sbi Diose, jech kʼuchaʼal kʼot ta stojolal li Jesuse. Jech xtok, skʼan xaʼibeik lek smelolal ti toj tsots skʼoplal ti xichʼ chʼultajesbel li sbi Jeovae, yuʼun jaʼ noʼox xuʼ jech sta skolebalik (Ech. 2:​21, 22). Jaʼ yuʼun, skotol li yajchankʼoptak Jesus ti tukʼ yakʼoj sbaike skʼan xojtikinik lek li Jeova xchiʼuk li Jesuse. Jech oxal, li Jesuse xi yelan la stsutses s-orasion li ta Juan kapitulo 17: «Voʼon laj kakʼbe snaʼik li abie xchiʼuk ta xkakʼbe-o batel snaʼik sventa teuk oy ta stojolalik li kʼanelal avuʼun jech kʼuchaʼal akʼanojune, vaʼun te jchiʼukik ek» (Juan 17:26).

«VOʼOXUK JTESTIGOOXUK»

9. ¿Kʼu yelan skʼan xkilbetik li sbi Jeovae?

⁹ Jech kʼuchaʼal laj xa kiltik tale, li melel yajtsʼaklomtak Kristoe toj tsots skʼoplal skʼan xilik ti xchʼultajesbeik li sbi Jeovae (Mat. 6:​9, 10). Li voʼotik eke skʼan ti jaʼuk noʼox mas tsots skʼoplal xkilbetik li sbi Jeovae xchiʼuk skʼan jechuk xkakʼtik ta ilel kʼalaluk oy kʼusitik ta jpastike. ¿Kʼuxi xuʼ jkolta jbatik ta xchʼultajesbel sbi Jeova xchiʼuk xkakʼtik ta ilel ti mu meleluk li kʼusitik laj yal Satanas ta stojolale?

10. ¿Kʼusi chalbe skʼoplal li ta Isaias kapitulo 42 kʼalal ta 44? (Isaias 43:9; 44:​7-9; kʼelo xtok li lokʼole).

¹⁰ Li ta kapitulo 42 kʼalal ta 44 ta slivroal Isaiase, te chalbe skʼoplal kʼuxi xuʼ jkolta jbatik ta xchʼultajesbel li sbi Jeovae. Li ta kapituloetik taje, te chalbe skʼoplal jun loʼil ta sventa jun chapanel yoʼ xichʼ akʼel ta ilel buchʼu jaʼ li melel Diose. Li Jeovae laj yalbe ti buchʼutik tspʼis sbaik ta diosetike akʼo yakʼik ta ilel mi jaʼik melel diosetik. Jech xtok, tskʼan ti akʼo svaʼan stestigoik sventa xakʼik ta ilel mi melel li kʼusi chalike. Pe muʼyuk buchʼu pas yuʼun (kʼelo Isaias 43:9; 44:​7-9).

11. Jech kʼuchaʼal chal Isaias 43:10 kʼalal ta 12, ¿kʼusi chalbe yajtuneltak li Jeovae?

¹¹ (Kʼelo Isaias 43:​10-12). Li Jeovae xi chalbe li yajtuneltake: «Voʼoxuk jtestigooxuk, [ . . . ] voʼon [ti] Diosune». Jech xtok, tskʼan ti xichʼ takʼbel kʼalal xi tsjakʼe: «¿Mi oy van yan Dios jech kʼuchaʼal voʼone?» (Is. 44:8). Li voʼotike jtaojtik jun mukʼta matanal: jaʼ ti xuʼ jtakʼbetik li kʼusi tsjakʼe. Li ta jkʼopojeltik xchiʼuk li kʼusitik ta jpastike jaʼ jech chkakʼtik ta ojtikinel ti jaʼ noʼox stuk melel Dios li Jeovae xchiʼuk ti jaʼ noʼox stuk toj mukʼ skʼoplal li sbie. Jech xtok, ti kʼu yelan jkuxlejaltike jaʼ jech chkakʼtik ta ilel ti jkʼanoj ta sjunul koʼontontik li Jeovae xchiʼuk ti tukʼ chkakʼ jbatik akʼo mi tsots chakʼutik ta preva li Satanase. Jaʼ me jech xuʼ jkolta jbatik ta xchʼultajesbel sbi li Diose.

12. ¿Kʼuxi kʼot ta pasel li albil kʼop chal ta Isaias 40:3 xchiʼuk 5?

¹² Li Isaias eke laj yal ti oy buchʼu chchapan o ti chchʼubabe batel «li sbe Jeovae» (Is. 40:3; tsʼib ta yok vun). ¿Kʼuxi kʼot ta pasel li albil kʼop taje? Li Juan J-akʼ-ichʼvoʼe jaʼ li buchʼu la xchapanbe batel li sbe Jesuse, ti take talel ta sbi Jeova xchiʼuk ti kʼopoj ta sbie (Mat. 3:3; Mar. 1:​2-4; Luk. 3:​3-6). Li Isaiase xi to laj yal yan albil kʼope: «Chichʼ akʼel ta ilel smukʼulal li Jeovae» (Is. 40:5). ¿Kʼuxi kʼot ta pasel taje? Kʼalal ay ta balumil li Jesuse, lek tajek laj yakʼ ta ojtikinel li Stote, ti xkoʼolaj ti jaʼ xa ay ta balumil stuk li Jeovae (Juan 12:45).

13. ¿Kʼuxi xuʼ jchanbetik li kʼusi la spas Jesuse?

¹³ Kʼalal ta jkolta jbatik ta xchʼultajesbel o ta sakubtasbel li sbi Jeovae, jaʼ me jech yakal ta jchanbetik li Jesukristoe. Jech kʼuchaʼal li Jesuse, li voʼotike jaʼutik stestigo Jeova. Kichʼojbetik li sbi Jeovae xchiʼuk chkalbetik yantik li kʼusitik labalik sba spasoje. Pe sventa spas lek kuʼuntik li kʼusi jbainojtike, skʼan xkalbetik batel yantik xtok skotol li kʼusitik spasoj Jesus xchiʼuk li kʼusitik tspas ta jelavel sventa xchʼultajesbe li sbi Jeovae (Ech. 1:8). Li Jesuse jaʼ li stestigo Jeova ti mas tsots skʼoplale. Li voʼotike ta jchanbetik batel li kʼusi tspase (Apok. 1:5). Pe ¿kʼu yelan skʼan xkilbetik sbi Jeova ta jujuntal?

¿KʼU YELAN SKʼAN XKILBETIK LI SBI JEOVAE?

14. Jech kʼuchaʼal chal ta Salmo 105:​3, ¿kʼu yelan chkaʼi jbatik ta skoj li sbi Jeovae?

¹⁴ Mukʼuk jkʼoplal xkaʼi jbatik ta skoj li sbi Jeovae (kʼelo Salmo 105:3). Li Jeovae lek tajek chaʼi ti jmukʼibtasbetik skʼoplal li sbie xchiʼuk ti mukʼuk jkʼoplal xkaʼi jbatik yuʼune (Jer. 9:​23, 24; 1 Kor. 1:31; 2 Kor. 10:17). Ti mukʼ jkʼoplal chkaʼi jbatik ta skoj li Jeovae jaʼ skʼan xal ti xijmuyubaj ti jaʼ kʼotem ta Jdiostike. Jaʼ jun mukʼta matanal chkaʼitik ti xuʼ xkichʼbetik ta mukʼ li sbie xchiʼuk ti ta jkolta jbatik ta sakubtasbel skʼoplale. Mu me jsetʼuk xijkʼexav ti chkaltik batel ti jaʼutik stestigo Jeovae, jech kʼuchaʼal ta kabteltik, ta chanob vun, ti bu nakalutike o ti buyuk noʼox oyutike. Li Diabloe jaʼ tskʼan ti mu xa xkakʼbetik batel ta ojtikinel li sbi Jeovae (Jer. 11:21; Apok. 12:17). Yuʼun li Satanas xchiʼuk li jloʼlavanej j-alkʼopetik yuʼune, tskʼanik ti xchʼay ta sjolik sbi Jeova li krixchanoetike (Jer. 23:​26, 27). Pe li voʼotike jkʼanojbetik tajek li sbie, ta jkʼantik chkichʼtik ta mukʼ «skotol kʼakʼal» (Sal. 5:11; 89:16).

15. ¿Kʼusi skʼan xal ti ta jkʼantik vokol ta sbi Jeovae?

¹⁵ Jechuk-o jkʼantik vokol ta sbi Jeova (Joel 2:32; Rom. 10:​13, 14). Ti ta jkʼantik vokol ta sbi Jeovae maʼuk noʼox skʼan xal ti xkojtikintik xchiʼuk ti ta jtunesbetik li sbi Diose. Yuʼun te smakojbe skʼoplal ti xkojtikintik lek kʼu yelan li Diose, ti jpat koʼontontik ta stojolale, ti jkʼanbetik koltaele xchiʼuk ti jkʼanbetik beiltasele (Sal. 20:7; 99:6; 116:4; 145:18). Te me smakojbe skʼoplal xtok ti xkalbetik yantik ta sventa li sbie xchiʼuk li stalelaltake. Jech xtok, jtijbetik yoʼontonik sventa sutes yoʼontonik xchiʼuk ti jkoltatik sventa sjel stalelalik yoʼ lekuk x-ilatik yuʼun li Jeovae (Is. 12:4; Ech. 2:​21, 38).

16. ¿Kʼuxi xuʼ xkakʼtik ta ilel ti jaʼ jun jutkʼop li Satanase?

¹⁶ Jpʼeluk ta koʼontontik xkil jvokoltik ta sbi Jeova (Sant. 5:​10, 11). Kʼalal tukʼ chkakʼ jbatik ta stojolal Jeova akʼo mi chkil jvokoltike, chkakʼtik ta ilel ti jaʼ jun jutkʼop li Satanase. Li ta skʼakʼalil Jobe, li Satanase laj stikʼbe smul li yajtuneltak Jeovae. Xi laj yale: «Kʼalal oy buchʼu chcham xae, xuʼ xakʼ skotol kʼusi oy yuʼun sventa kuxul xkom» (Job 2:4). Taje xkoʼolaj laj yal ti jaʼ noʼox chtunik ta stojolal Jeova li krixchanoetik kʼalal lek noʼox li xkuxlejalike, pe ti tstenik komel kʼalal oy kʼusi chopol tsnuptanike. Ta skoj ti tukʼ laj yakʼ sba li Jobe, laj yakʼ ta ilel ti mu meleluk li kʼusi laj yal Satanase. Li voʼotik eke jtaojtik jun mukʼta ta matanal, ti mu ventauk kʼusi prevail xakʼbutik li Satanase muʼyuk ta jtentik komel li Jeovae. Jpʼel ta koʼontontik ti jech-o chchabiutik ta skoj li sbie (Juan 17:11).

17. Jech kʼuchaʼal chal ta 1 Pedro 2:​12, ¿kʼuxi yan xuʼ jtoybetik skʼoplal li sbi Jeovae?

¹⁷ Kakʼtik ta ilel ti chkichʼbetik ta mukʼ li sbi Jeovae (Prov. 30:9; Jer. 7:​8-11). Ta skoj ti kichʼojbetik li sbi Jeova xchiʼuk ti jaʼutik yajkʼopojele, xuʼ me jlekubtasbetik skʼoplal ta skoj li kʼusi ta jpastike o xuʼ me jsokesbetik-o skʼoplal (kʼelo 1 Pedro 2:12). Jaʼ yuʼun, ta jkʼan chkakʼ kipaltik sventa jkʼupil kʼoptatik Jeova ta jkʼopojeltik xchiʼuk li ta kʼusitik ta jpastike. Kʼalal jech ta jpastike, jaʼ jech ta jkolta jbatik ta yichʼel ta mukʼ li sbie akʼo mi maʼuk tukʼil krixchanoutik.

18. ¿Kʼuxi xuʼ yan xkakʼtik ta ilel ti toj tsots skʼoplal chkilbetik li sbi Jeovae? (Kʼelo xtok li tsʼib ta yok vune).

¹⁸ Jaʼ mas tsots skʼoplal chkilbetik li sbi Jeovae maʼuk ti lekuk jkʼoplaltike (Sal. 138:2). ¿Kʼu yuʼun ti jech chkaltike? Yuʼun ta skoj ti jkʼanojtik li Jeovae, jaʼ ta jpastik li kʼusitik lek chile. Ta skoj ti jech ta jpastike, oy bateltik ti chlabanvanik li krixchanoetike xchiʼuk chchopolkʼoptavanik.a Li Jesuse muʼyuk chopol laj yaʼi ti xichʼ milel kʼuchaʼal jun chopol vinike, yuʼun jaʼ oy ta yoʼonton ti xichʼ ichʼbel ta mukʼ li sbi Jeovae. Jech kʼuchaʼal chal ta Ebreos 12:2 kʼalal ta 4, «kuch yuʼun kʼexlaltasel», jaʼ xkaltik, maʼuk la svul-o yoʼonton li kʼusi xuʼ xalik ta stojolale, yuʼun jaʼ oy ta yoʼonton spasel li kʼusi tskʼan Diose (Mat. 26:39).

19. ¿Kʼu yelan chavaʼi aba ta skoj li sbi Jeovae, xchiʼuk kʼu yuʼun?

¹⁹ Mukʼ jkʼoplal chkaʼi jbatik ta skoj li sbi Jeovae xchiʼuk jaʼ jun mukʼta matanal chkiltik ti ojtikinbilutik kʼuchaʼal stestigotak Jeovae. Jaʼ yuʼun, muʼyuk chopol chkaʼitik kʼalal chlabanvanik o chchopol kʼoptavanik li yantike. Yuʼun jaʼ mas tsots skʼoplal chkilbetik li sbi Jeovae, maʼuk li voʼotike. Jaʼ yuʼun, jpʼel ta koʼontontik ta jkʼupil kʼoptabetik-o sbi Jeova mu ventauk kʼusitik tspas Satanas sventa smakutik ta bee. Kʼalal jech ta jpastike, jaʼ jech chkakʼtik ta ilel ti toj echʼ xa noʼox tsots skʼoplal chkilbetik li sbi Jeovae, jech kʼuchaʼal la spas Jesuse.