Li Jesuse, ¿kʼu yelan laj yilbe li sbi Jeovae?

1, 2. 1) ¿Kʼusi la spas Jesus kʼalal jun xa ox akʼobal skʼan xchame? 2) ¿Kʼusitik sjakʼobil ta jkʼelbetik batel skʼoplal li ta xchanobil liʼe?

LI TA yakʼobalil jueves ti jaʼo lik li 14 yuʼun Nisan ta sjabilal 33, li Jesuse jaʼo te tsobol xchiʼuk yajtakboltak ta jun kuarto ta xchaʼkojal na. Li vaʼ akʼobale, jutuk xa ox skʼan xichʼ valopatinel li Jesuse, ti xichʼ chapanele, ti xichʼ tikʼbel smule, ti xichʼ utilanele xchiʼuk ti xichʼ milele. Kʼalal laj xa ox yoʼontonik ta veʼel li vaʼ akʼobale, oy kʼusitik toj kʼupil sba laj yalbe komel li yajtakboltake. Vaʼun, kʼalal jutuk xa ox skʼan xlokʼ batel skotolike, li Jesuse la spas jun orasion ta sjunul yoʼonton. Li jtakbol Juane te la stsʼiba komel ta kapitulo 17 li ta S-evanjelioe.

² Li ta xchanobil liʼe, ta jkʼeltik batel kʼusi xuʼ jchantik li ta orasion la spas Jesuse: ¿kʼusitik ti la svul-o yoʼonton Jesus li vaʼ orae? ¿Kʼusi ti mas tsots skʼoplal laj yil ta xkuxlejal ti kʼu sjalil ay ta balumile?

«VOʼON LAJ KAKʼBE SNAʼIK LI ABIE»

3. ¿Kʼusi laj yal Jesus ta sventa li sbi Jeovae, xchiʼuk kʼusi skʼan xal taje? (Juan 17:​6, 26).

³ Li Jesuse xi laj yalbe ta orasion li Jeovae: «Voʼon laj kakʼbe snaʼik li abie». Li Jesuse toj tsots skʼoplal chilbe li sbi stote, yuʼun chib to velta jech laj yal (kʼelo Juan 17:​6, 26). ¿Mi jaʼ noʼox van laj yalbe yajchankʼoptak ti Jeova sbi li Diose? Mu jechuk maʼ taje. Yuʼun li yajchankʼoptake snaʼojik xa onoʼox lek taje. ¿Kʼu yuʼun? Jaʼ ta skoj ti jaʼik judaetik xchiʼuk ti te chvinaj ta epal mil ta velta li ta Tsʼibetik ta Ebreo Kʼop li sbi Diose. Jaʼ yuʼun, kʼalal laj yakʼ ta ojtikinel li sbi Diose, li Jesuse jaʼ laj yalbe skʼoplal ti kʼu yelan li Jeovae. Taje te smakojbe skʼoplal li kʼusi oy ta yoʼonton tspas ta balumil xchiʼuk ta stojolal li krixchanoetike, li kʼusitik spasoj xa talele xchiʼuk li stalelaltake. Jaʼ noʼox stuk Jesus xojtikin lek li Jeovae, jech oxal jaʼ noʼox stuk xuʼ xakʼ lek ta ojtikinel ti kʼu yelan stalelaltak li Jeovae.

4, 5. 1) ¿Kʼuxi ti xuʼ tsots skʼoplal xkʼot sbi li jun krixchanoe? Albo junuk skʼelobil. 2) ¿Kʼu yuʼun ti toj tsots skʼoplal laj yilbeik sbi Jeova li jtakboletike?

⁴ Jnoptik noʼox ti oy jun mol ta tsobobbail ti David sbie xchiʼuk ti snaʼ spas operasione. Yikʼaluk van jal xa xavojtikin. Pe jnoptik noʼox ti oy kʼusi tsots la anuptan ti persa skʼan xavichʼ operasione. Vaʼun, ta anil chikʼoxuk batel ta jun ospital ti jaʼ te ch-abtej li ermano taje xchiʼuk jaʼ chlik skʼelot sventa lekuk xapoxtaje. ¿Mi mu jechuk ti mas to chlik akʼan li ermano taje? Yikʼaluk van kʼalal chavaʼibe sbi jujukoje, jaʼ chvul ta ajol li kʼusi la spas ta atojolale. Maʼuk xa noʼox jun mol ta tsobobbail chavil li Davide, yuʼun chtal ta ajol xtok ti jaʼ la skoltaot sventa mu xachame, jaʼ xkaltik, mas xa toj tsots skʼoplal chavilbe sbi li ermano taje.

⁵ Jaʼtik jech kʼot ta stojolalik li yajchankʼoptak Jesuse. Akʼo mi snaʼojbeik xa onoʼox li sbi Jeovae, pe mas to laj yojtikinik. Jaʼ yuʼun, li sbi Jeovae mas xa toj tsots skʼoplal laj yilik. ¿Kʼuxi ti laj yojtikinike? Jaʼ ta skoj ti kʼu yelan la xchol mantal li Jesuse. Yuʼun li kʼusitik la spas xchiʼuk li kʼusitik laj yale, lek tajek laj yakʼ ta ilel ti kʼu yelan stalelal li Stote. Jaʼ yuʼun, kʼalal laj yilik kʼu yelan chchanubtasvan li Jesus xchiʼuk ti kʼu yelan tstsak ta venta li krixchanoetike, li jtakboletike mas to lik yojtikinik li Jeovae (Juan 14:9; 17:3).

«LI ABI TI LAJ AVAKʼBUN KICHʼE»

6. ¿Kʼusi la skʼan laj yal Jesus ti laj yichʼbe sbi li Jeovae? (Juan 17:​11, 12).

⁶ Li Jesuse xi la spas orasion ta stojolal li yajchankʼoptake: «Kʼelo me ta skoj li abi ti laj avakʼbun kichʼe» (kʼelo Juan 17:​11, 12). ¿Mi jaʼ van skʼan xal ti Jeova xa chichʼ albel li Jesus eke? Moʼoj. Yuʼun kʼalal la spas orasion li Jesuse, xi laj yal ta stojolal li sbi Jeovae: «Ta skoj li abie». Jaʼ yuʼun, li Jesuse maʼuk ti Jeova xa lik sbiine. Pe ¿kʼusi la skʼan laj yal ti laj yichʼbe sbi li Jeovae? June, jaʼ ti jaʼ kʼotem ta yajkʼopojel Jeova li Jesuse. Kʼalal tal ta balumil xchiʼuk kʼalal la spas skʼelobiltak juʼelale, jaʼ ta sbi Jeova la spas skotol (Juan 5:43; 10:25). Yan xtoke, jaʼ ti xi onoʼox smelolal sbi li Jesuse: «Jaʼ jkoltavanej li Jeovae». Kʼuchaʼal chkakʼtik ventae, li sbi Jesuse te onoʼox nitil skʼoplal xchiʼuk li sbi Jeovae.

7. Albo junuk skʼelobil ti kʼu yuʼun xuʼ xkʼopoj ta sbi Jeova li Jesuse.

⁷ Kalbetik junuk skʼelobil sventa xkaʼibetik lek smelolale. Li jun ajvalile xuʼ oy buchʼu svaʼan sventa xkʼot ta yajkʼopojel ta yan lum xchiʼuk ti xakʼbe sderecho sventa xkʼopoj ta sbie. Kʼalal mi och ta yabtele, li kʼusi xa chale xkoʼolaj ti jaʼ xa chal li ajvalile. Jaʼtik jech ek, li Jeovae la svaʼan ta yajkʼopojel li Jesuse xchiʼuk akʼbat sderecho sventa xkʼopoj ta sbi (Mat. 21:9; Luk. 13:35).

8. ¿Kʼusi smelolal ti te oy «ta stojolal» Jesus li sbi Jeova kʼalal skʼan toʼox xtal ta balumile? (Eksodo 23:​20, 21).

⁸ Li Vivliae chal ti jaʼ Kʼop li Jesuse, yuʼun li Jeova la stunes ta yajkʼopojel kʼalal oy kʼusi chalbe xchiʼuk kʼalal chakʼbe mantal li krixchanoetik xchiʼuk li anjeletike (Juan 1:​1-3). Yikʼaluk van jaʼ skʼoplal Jesus li anjel la stak batel Jeova sventa sbeiltas xchiʼuk xchabi li j-israeletik kʼalal xanavik batel ta takixokol balumile. ¿Kʼu yuʼun ti skʼan xchʼunbeik smantal li anjel taje? Yuʼun xi laj yal li Jeovae: «Te oy jbi ta stojolal» (kʼelo Eksodo 23:​20, 21).a ¿Kʼusi smelolal ti te oy «ta stojolal» Jesus li sbi Jeovae? Jaʼ ta skoj ti jaʼ kʼotem ta yajkʼopojele xchiʼuk jaʼ li buchʼu mas sbainoj ta spakbel skʼoplal xchiʼuk ta xchʼultajesbel li sbi Jeovae.

«TOT, AKʼO YICHʼ TOYBEL SKʼOPLAL LI ABIE»

9. ¿Kʼuxi jnaʼojtik ti toj tsots skʼoplal laj yilbe sbi Jeova li Jesuse?

⁹ Jech kʼuchaʼal la jchantik xa talele, kʼalal muʼyuk toʼox talem ta balumil li Jesuse, toj tsots xa onoʼox skʼoplal laj yilbe li sbi Jeovae. Jaʼ jech laj yakʼ ta ilel xtok kʼalal liʼ xa ox oy ta balumile. Yuʼun skotol li kʼusitik la spase, laj yakʼ ta ilel ti jech-o toj tsots skʼoplal chilbe li sbi Jeovae. Kʼalal jutuk xa ox skʼan stsuts yabtel liʼ ta balumile, xi laj yalbe li Jeovae: «Tot, akʼo yichʼ toybel skʼoplal li abie». Ta anil noʼox xi tsots takʼav talel ta vinajel li Stote: «La jtoybe skʼoplal xchiʼuk ta jtoybe skʼoplal yan velta» (Juan 12:28).

10, 11. 1) ¿Kʼuxi la skʼupil kʼoptabe sbi Jeova li Jesuse? (Kʼelo xtok li lokʼole). 2) ¿Kʼu yuʼun skʼan xichʼ chʼultajesbel xchiʼuk sakubtasbel li sbi Jeovae?

¹⁰ Li Jesus xtoke la skʼupil kʼoptabe li sbi Stote. ¿Kʼuxi la spas? Jaʼo kʼalal laj yalbe yantik ti toj kʼupilik sba stalelal li Jeovae xchiʼuk ti toj labalik sba li kʼusitik spasoje. Pe oy to kʼusitik yan la spas xtok. Li stuke snaʼoj ti skʼan chʼultajesbel xchiʼuk ti xichʼuk sakubtasbelb skʼoplal li sbi Jeovae. Jech oxal, xi yelan la xchanubtas yajchankʼoptak ta spasel orasion sventa xakʼ ta ilel ti toj tsots skʼoplale: «Jtotik ta vinajel, akʼo yichʼ chʼultajesel li abie» (Mat. 6:9).

¹¹ ¿Kʼu yuʼun ti skʼan chʼultajesbel xchiʼuk ti xichʼuk sakubtasbel li sbi Jeovae? Yuʼun li Satanase la stikʼbe smul Jeova li ta nichimaltik Edene. Laj yal ti jaʼ la jun jutkʼope xchiʼuk ti oy la kʼusi muʼyuk chakʼbe skʼupin li Adan xchiʼuk Evae (Jen. 3:​1-5). Li Diablo xtoke laj yakʼ ta aʼiel ti muʼyuk la stukʼil o ti maʼuk la jech li kʼusitik tspas Jeovae. Li kʼusitik laj yale la sokbe-o skʼoplal li sbi Jeovae o ti chopol xa kom skʼoplal yuʼune. Maʼuk noʼox taje, yuʼun li ta skʼakʼalil Jobe, li Satanas xtoke laj yal ti maʼuk la ta sjunul yoʼonton chtunik ta stojolal Jeova li krixchanoetike. Yuʼun jaʼ noʼox la jech tspasik ta skoj ti oy kʼusi ch-akʼbatike. Jech xtok, laj yal ti mu junuk krixchano jech-o chakʼ persa chtun ta stojolal Jeova kʼalal chil svokole (Job 1:​9-11; 2:4). Skʼan xjelav kʼuk sjalil sventa xvinaj ti buchʼu melel snaʼ xkʼopoje: mi jaʼ li Jeovae o mi jaʼ li Satanase.

«CHKAKʼ JKUXLEJAL»

12. ¿Kʼusi lokʼ ta yoʼonton spasel Jesus ta skoj ti skʼanojbe li sbi Jeovae?

¹² Li Jesuse skʼanoj tajek li Stote, jaʼ yuʼun la xchʼultajesbe xchiʼuk la sakubtasbe sbi ti bu kʼalal xuʼ yuʼune. Jech oxal, xi laj yale: «Chkakʼ jkuxlejal» (Juan 10:​17, 18). Ta melel, li Jesuse lokʼ ta yoʼonton cham ta skoj li sbi Jeovae.c Li Adan xchiʼuk Eva ti jaʼik li baʼyel tukʼil krixchanoetike, la svalopatinik komel li Jeovae xchiʼuk jaʼ laj yakʼ sbaik ta stojolal li Satanase. Akʼo mi jech la spasik, li Jesuse lokʼ ta yoʼonton tal ta balumil xchiʼuk ti xakʼ ta ilel ti skʼanoj tajek li Jeovae, yuʼun la xchʼunbe smantal ti kʼu sjalil kuxi ta balumile (Ebr. 4:15; 5:​7-10). Jech-o tukʼ laj yakʼ sba jaʼ to ti kʼuxi laj yichʼ milel li ta jtel teʼ sventa vokolile (Ebr. 12:2). Jaʼ jech laj yakʼ ta ilel ti skʼanoj li Jeovae xchiʼuk ti skʼanojbe li sbie.

13. ¿Kʼu yuʼun jaʼ noʼox Jesus xuʼ xakʼ lek ta ilel ti jaʼ tsjut kʼop li Satanase? (Kʼelo xtok li lokʼole).

¹³ Ta skotol li kʼusitik la spas Jesus ti kʼu sjalil ay ta balumile, laj yakʼ ta ilel ti jaʼ tsjut kʼop li Satanase, ti maʼuk li Jeovae (Juan 8:44). Li buchʼu noʼox xojtikin lek Jeova ta sjunul li vinajel balumile, jaʼ li Jesuse. Ti oyuk kʼusi laj yal jutebuk Satanas ti jaʼ melele, laj onoʼox yakʼ venta jechuk li Jesuse. Pe li stuke jpʼel ta yoʼonton la spakbe-o skʼoplal li sbi Jeovae, jaʼ xkaltik, ti lekuk xkom skʼoplale. Akʼo mi laj xa ox yichʼ tenel komel yilel yuʼun li Stote, pe jech-o oy ta yoʼonton chcham ta stojolal, jaʼ mu skʼan ti svalopatin komel li Stote (Mat. 27:46).d

«TSUTS XA KUʼUN LI ABTELAL LAJ AVAKʼBUN AKʼO JPASE»

14. ¿Kʼusi bendision la sta Jesus ta skoj ti tukʼ laj yakʼ sbae?

¹⁴ Li Jesuse xi laj yalbe ta orasion Jeova kʼalal jun xa ox akʼobal skʼan xchame: «Tsuts xa kuʼun li abtelal laj avakʼbun akʼo jpase». Spatoj lek yoʼonton ti ch-akʼbat bendision ta skoj ti tukʼ chakʼ sbae (Juan 17:​4, 5). Jech onoʼox kʼot ta pasel. Yuʼun li Jeovae muʼyuk te laj yikta-o komel ta mukinal (Ech. 2:​23, 24). La xchaʼkuxes xchiʼuk laj yakʼbe tsots yabtel te ta vinajel (Filip. 2:​8, 9). Kʼalal echʼ xa ox epal jabile, li Jesuse lik ajvalilajuk li ta Ajvalilal yuʼun Diose. ¿Kʼusi tspas li Ajvalilal taje? Li Jesuse la xchapbutik smelolal kʼalal xi la xchanubtasutik ta spasel orasione: «Akʼo taluk li Ajvalilal avuʼune. Akʼo kʼotuk ta pasel avuʼun li kʼusi tskʼan avoʼonton ta sba balumil jech kʼuchaʼal ta vinajele» (Mat. 6:10).

15. ¿Kʼusitik to yan tspas li Jesuse?

¹⁵ Li Jesuse jutuk xa skʼan xakʼbe slajeb li yajkontratak Diose xchiʼuk ti slajes ta Armajedon skotol li chopol krixchanoetike (Apok. 16:​14, 16; 19:​11-16). Laje, tsjip ochel ta «xab» li Satanase. Taje jaʼ noʼox jun lokʼolkʼop, yuʼun li kʼusi skʼan xale jaʼ ti chichʼ chukele xchiʼuk ti mu xa stakʼ kʼusi spase (Apok. 20:​1-3). Laj une, chlik li Ajvalilal ta Jmil Jabile. Li vaʼ kʼakʼale, li Jesuse chakʼ talel jun oʼontonal ta balumil xchiʼuk chkoltavan sventa xtukʼib li krixchanoetike, ta xchaʼkuxes li buchʼutik chamemike xchiʼuk tspas ta paraiso spʼejel li balumile. ¡Jaʼ me jech chkʼot ta pasel li kʼusi oy ta yoʼonton Jeova liʼ ta balumile! (Apok. 21:​1-4).

16. ¿Kʼu xa ox yelan li kuxlejal kʼalal mi tsuts li Ajvalilal ta Jmil Jabil yuʼun Kristoe?

¹⁶ Mi tsuts xa ox li Ajvalilal ta Jmil Jabile, chlaj skʼoplal ta j-echʼel li mulile. Li krixchanoetike muʼyuk xa chtun yuʼunik li 144 mil sventa xkʼot ta yajpaleike xchiʼuk mu xa persauk xichʼ vaʼanel ta mero bankilal pale li Jesus sventa lekuk xil sbaik xchiʼuk li Jeovae. Jech xtok, «li slajeb jkontrainvanej ti [ . . . ] jaʼ li lajelale» chichʼ lajesel ta j-echʼel. Li buchʼutik chamemike chaʼkuxiemik xa ox. Skotol li buchʼutik kuxajtik ta balumile jaʼik xa ox me tukʼil krixchanoetik (1 Kor. 15:​25, 26).

17, 18. 1) ¿Kʼusi chkʼot ta pasel mi tsuts li Ajvalilal ta Jmil Jabile? 2) ¿Kʼusi tspas Jesus mi tsuts li Ajvalilal yuʼune? (1 Korintios 15:​24, 28; kʼelo xtok li lokʼole).

¹⁷ Oy kʼusi toj tsots skʼoplal chkʼot ta pasel mi tsuts li Ajvalilal ta Jmil Jabile: yuʼun chʼul xa chkom li sbi Jeovae xchiʼuk chʼabal xa buchʼu chchopol kʼopta. Li ta nichimaltik Edene, li Satanase laj yal ti jaʼ la jun jutkʼop li Jeovae xchiʼuk ti jaʼ la jun chopol ajvalil ti muʼyuk skʼanoj li krixchanoetike. Kʼalal jech laj yal taje, li yajtuneltak Jeovae jech-o xchʼultajesojbeik talel sbi. Kʼalal mi tsuts li Jmil Jabile, sakubtasbil xa ox me chkom skʼoplal. Jaʼ me jech chakʼbutik ta ilel ti skʼanojutik tajek li Jtotik ta vinajele.

¹⁸ Vaʼun, skotol li krixchanoetike tsnaʼik ti naka jutbil kʼop li kʼusi laj yal Satanas ta stojolal li Jeovae. ¿Kʼusi van tspas Jesus mi tsuts ti kʼu sjalil ch-ajvalilaje? ¿Mi jaʼ van jech chchanbe li Satanase xchiʼuk ti tskontrain li Jeovae? ¡Mu jechuk tspas maʼ taje! (Kʼelo 1 Korintios 15:​24, 28). Li Jesuse tsutesbe Stot li Ajvalilal yuʼune xchiʼuk chakʼ sba ta ventainel. Jaʼ jech tspas ta skoj ti skʼanoj tajek li Jeovae.

19. ¿Kʼu yelan laj yilbe sbi Jeova li Jesuse?

¹⁹ Jech kʼuchaʼal la jchantik tale, li Jesuse laj yichʼbe sbi li Stote xchiʼuk kʼot ta yajkʼopojel. Li Jeovae ta sjunul yoʼonton jech la spas ta stojolal li Xnichʼone. Li Jesuse lek tajek tsʼakal spasoj talel li kʼusi akʼbil sbaine. Vaʼun chaʼa, ¿kʼu yelan laj yilbe sbi Jeova li Jesuse? Toj tsots skʼoplal laj yil. Yuʼun lokʼ ta yoʼonton chcham ta skoj li biil taje. Jech xtok, mi tsuts li Ajvalilal ta Jmil Jabile, ta sjunul yoʼonton chakʼbe sutel skotol li kʼusi akʼbil yuʼun Jeovae. ¿Kʼuxi xuʼ jchanbetik li kʼusi la spase? Taje te chkaʼibetik smelolal li ta yan xchanobile.