Toj ep abalilik li ta tsobobbaile

Xuʼ van jaʼ jech chavaʼi aba kʼuchaʼal li ermana taje. Ta skoj ti oy xa avuni jabilale, mu xa van epuk kʼusi spas avuʼun jech kʼuchaʼal toʼoxe. Akʼo mi jal xa tukʼ tunemot talel ta stojolal Jeova, xuʼ van chachibaj-o kʼalal chavil ti mu xa spas avuʼun li kʼusitik toʼox chapas ta akerem atsebale. ¿Kʼusi xuʼ skoltaot sventa mu jechuk xavaʼi abae?

¿KʼUSI OY TA YOʼONTON JEOVA TI XAPASE?

Xiuk xanopbe skʼoplale: «¿Kʼusi oy ta yoʼonton Jeova ti akʼo jpase?». Xi chal Deuteronomio 6:5: «Skʼan xakʼan ta sjunul avoʼonton li Jeova Dios avuʼune, ta sjunul akuxlejal xchiʼuk ta sjunul avipal». Taje tspat tajek koʼontontik. ¿Kʼu yuʼun?

Yuʼun li teksto liʼe chakʼ ta ilel ti jaʼ noʼox tskʼanbot Jeova ti xatun ta stojolal ti bu kʼalal xuʼ avuʼune. Kʼalal te ta ajol taje, jaʼ tskoltaot sventa mu xakoʼoltas aba xchiʼuk li yantike xchiʼuk ti mu xakoʼoltas li kʼusitik spas toʼox avuʼun ta akerem atsebale.

Nopbo skʼoplal liʼe: kʼalal kerem tsebot toʼoxe, ¿kʼusi la apas ta stojolal li Jeovae? Akʼo mi oy kʼusitik la anuptan, jech-o latun talel ta stojolal ti bu kʼalal xuʼ avuʼune. Avi ti oy xa ajabilale, ¿kʼusi yakal chapas ta stojolal li Jeovae? Akʼo mi jelem xa li akuxlejale, jech-o chatun ta stojolal ti bu kʼalal xuʼ avuʼune. Kʼuchaʼal chavakʼ ventae, li kʼusi toʼox chapas ta stojolal Jeovae jaʼ jech-o chapas li avie: chatun ta stojolal ti bu kʼalal xuʼ avuʼune.

XKOLTAJ TO ME AVUʼUN LI YANTIKE

Nopbo avaʼi skʼoplal liʼe: akʼo mi oy xa ajabilal, maʼuk skʼan xal ti mu xa kʼusi spas avuʼune, yuʼun xuʼ to xakolta li yantike. Ta skoj li ajabilale, oy to kʼusitik xuʼ xapas ti mu toʼox spas avuʼun kʼalal akerem atsebal toʼoxe. Kalbetik skʼoplal jtosuk.

Albo yantik li kʼusi aviloj ta akuxlejale. Kʼelavil kʼusi laj yal junantik yajtuneltak Dios ta voʼne:

Xi laj yal li ajvalil Davide: «Keremun toʼox, pe li avi une limalub xa, pe muʼyuk bu kiloj-o ti iktabil komel li buchʼu tukʼe mi jaʼuk ti xvokoletik xa ta skʼanel veʼlil li xnichʼnabe» (Sal. 37:25).

Xi laj yal li Josuee: «Avi une, poʼot xa xicham. Anaʼojik lek ta sjunul avoʼontonik xchiʼuk ta sjunul akuxlejalik ti mu jpʼeluk chʼay ta be skotol li kʼusitik lekik laj yalboxuk li Jeova Dios avuʼunike. Kʼot ta pasel skotol ta atojolalik. Mi jpʼeluk chʼay ta be» (Jos. 23:14).

Li David xchiʼuk Josuee sta-o lek ti jech laj yalike, yuʼun jal xa tajek ti tukʼ tunemik talel ta stojolal Jeovae xchiʼuk ep xa kʼusi yiloj ta xkuxlejalik. Jaʼ yuʼun, melel skotol li kʼusi laj yalike, yuʼun jech laj yil ta sat stukik. Jaʼ jech li voʼot eke: skotol li kʼusi aviloj talel ta akuxlejale ep tajek sbalil.

Mi jal xa tajek yakal chatun ta stojolal Jeovae, albo yantik kʼusi bendisionetik akʼupinoj talel. ¿Mi xvul ta ajol junuk velta kʼuxi laj yakʼbe bendision steklumal li Jeovae? Mu teuk xanakʼ ta avoʼonton, albo li yantike. Kʼalal chavalbe ermanoetik li kʼusitik aviloj tal ta akuxlejale, xuʼ xtijbat-o yoʼontonik xchiʼuk xamuyubaj noʼox ek (Rom. 1:​11, 12).

Yan kʼuxi xuʼ xatijbe yoʼonton li ermanoetike jaʼo kʼalal chavakʼ persa chabat ta tsobajel ta salone. Kʼalal jech chapase, maʼuk noʼox tstabeik sbalil li ermanoetike, yuʼun lek tajek chavaʼi aba ek. Xi chal li Connie ti laj kalbetik skʼoplal ta slikebe: «Kʼalal chibat ta tsobajeletike, jaʼ tskoltaun sventa mu xichibaj. Muʼyuk srasonal sventa xkat koʼonton, yuʼun li ermanoetik ta salone chakʼik ta ilel ti skʼanojikun tajeke. Sventa xkakʼbe yilik ti jkʼanojan eke, ta xkakʼbe yuni motonik. Jech xtok, chkakʼ persa ti koʼoluk kʼusi jpaskutik ta mantale».

LI JEOVAE EP SBALIL CHIL TI TUKʼ CHATUN TA STOJOLALE

Li Vivliae chalbe skʼoplal epal krixchanoetik ti kʼanbilik-o yuʼun Jeova akʼo mi oy xa kʼusitik mu spas yuʼunik. Kalbetik skʼoplal junuk, jaʼ li Simeon ti jaʼ j-israel vinike. Kʼalal vokʼ li Jesuse, yij xa ox tajek li Simeone. Jujukoj kʼalal chbat ta temploe, xuʼ van te chil keremetik ti oy kʼusitik sbainojik ti tsots skʼoplale. Li stuke xuʼ van la snop ti muʼyuk xa tsakbil ta venta yuʼun Jeova ta skoj ti ep xa sjabilale. Pe mu jechuk un, yuʼun li Jeovae laj yal «ti jaʼ jun tukʼil vinik» xchiʼuk ti yichʼoj ta mukʼ Diose. Jech xtok, laj yakʼbe jun bendision, yuʼun laj yil kʼalal neneʼ toʼox li Jesuse. Maʼuk noʼox, yuʼun tunesat yuʼun Jeova sventa xal jun albil kʼop: ti jaʼ chkʼot ta Mesias li Jesuse (Luk. 2:​25-35). ¿Kʼusi chakʼ kiltik li loʼil liʼe? Maʼuk la stsak ta venta Jeova ti oy xa sjabilal li Simeone xchiʼuk ti oy xa kʼusi mu spas yuʼune, yuʼun jaʼ la skʼelbe ti tsots lek xchʼunel yoʼontone. Jech xtok, te oy ta stojolal li chʼul espiritue.

Li voʼot eke xuʼ jpʼel ta avoʼonton ti ep sbalil chil Jeova ti tukʼ chatun ta stojolal akʼo mi oy xa kʼusitik mu spas avuʼun. Li stuke xmuyubaj tajek ti oy kʼusitik chapas ta stojolale, jaʼ yuʼun ta sjunul yoʼonton chchʼam li kʼusi spas avuʼune, maʼuk li kʼusi mu spas avuʼune (2 Kor. 8:12).

Jaʼ yuʼun chaʼa, jaʼuk noʼox xapas li kʼusi spas avuʼune. Jech kʼuchaʼal liʼe, ep ta tos ti kʼu yelan ta jcholtik mantale, jaʼ yuʼun xuʼ xakʼel bu jtosukal ti spas to avuʼune akʼo mi jujulikel xa noʼox. Yan kʼusi xuʼ xapase, jaʼ ti xakʼopon batel ta telefono li ermanoetike o ti xatsʼibabe batel jlikuk karta sventa xapatbe yoʼontonike. Li kʼusitik chapas ta stojolal li ermanoetike ep me tajek tstabeik sbalil, mas to kʼalal voʼot jech chapas ti jal xa tajek tunemot talel ta stojolal Jeovae.

Akʼo mi oy xa kʼusitik ti mu spas avuʼune, pe ep to me kʼusi xuʼ xapas ta stojolal Jeova. Li ta rekuadro «Jun ants ti tsmil xa ox sbae», te chatabe sloʼil jun ermana ti oy xa sjabilal ti te nakal ta África orientale.

Teuk ta ajol ti xuʼ xtijbat-o yoʼonton yantik li xchʼunel avoʼontone xchiʼuk ti tukʼ-o avakʼoj aba tale. Toj lek ta chanel atalelal ti tsʼikem talel avuʼune. Teuk ta ajol li kʼusi chal Ebreos 6:10: «Tukʼ li Diose, jaʼ yuʼun mu xchʼay ta sjol li avabtelike xchiʼuk li kʼanelal laj avakʼik ta ilel ta sventa li sbie xchiʼuk ti chatunik ta stojolal li buchʼutik chʼulike xchiʼuk ti jech-o chatunik batel ta stojolalike».

JECHUK-O XAKOLTA LI YANTIKE

Oy buchʼutik xchanojbeik skʼoplal ti kʼalal tskoltaik yantik li buchʼutik oy xa sjabilalike muʼyuk mas ch-ipajik, mas lek ch-abtej snopbenik xchiʼuk mas jal chkuxiik.

Akʼo mi chakolta li yantike, maʼuk me te chlaj-o skʼoplal li avokoltake. Yuʼun jaʼ noʼox li Ajvalilal yuʼun Dios xuʼ slajesbe skʼoplal li mulile ti jaʼ ta skoj ti chijmalub xchiʼuk chijchame (Rom. 5:12).

Akʼo mi jech, ti kʼu yelan chatun ta stojolal Jeovae, ti te tsakal skʼoplal ti chachol mantale, ta me skoltaot sventa masuk to xachʼun li kʼusi chtal ta jelavele xchiʼuk xuʼ van skoltaot sventa mu masuk xa-ipaj. Kuni ermano xchiʼuk kuni ermana, teuk me ta ajol ti ep tajek sbalil chil Jeova skotol li kʼusi chapas ta stojolale. Jech xtok, li ermanoetik ta tsobobbaile ep sbalil chilik ti tsots xchʼunel avoʼontone.