¿Kʼusi chal Vivlia ta sventa li buchʼutik jmoj nakalik ti muʼyuk nupunemike?

Li kʼusi chal Vivliae

Li Vivliae chchanubtasvan ti mu skʼan Dios ti xijpʼaj ta «mulivajele» (1 Tesalonisenses 4:3). «Li [mulivajel]» xi li ta Vivliae, tey smakojbe skʼoplal ti sloʼla snup xchiʼilike, ti chmulivajik ti xchiʼil noʼox sbaik ta vinikal o ta antsile xchiʼuk ti xchiʼin sbaik ta vayel jun vinik xchiʼuk jun ants ti muʼyuk nupunemike.

• ¿Kʼu yuʼun tsots skʼoplal chil Dios ti xnupunik li jun vinik xchiʼuk jun antse?

• ¿Mi lek ti baʼyel jmoj xnakiik sventa xakʼik venta mi jaʼ snup xchʼulel sbaike?

• ¿Kʼusi xuʼ spasik li jun nupultsʼakal sventa xmuyubajikuk li ta snupunelike?

¿Kʼu yuʼun tsots skʼoplal chil Dios ti xnupunik li jun vinik xchiʼuk jun antse?

• Li Diose jaʼ la slikes li nupunele. Jaʼ jech la spas kʼalal laj yakʼ li baʼyel nupultsʼakale (Jenesis 2:22-24). Li kʼusi oy ta yoʼontone jaʼ ti xnupunik li jun vinik xchiʼuk jun ants xchiʼuk ti tukʼuk xakʼ sbaike, maʼuk noʼox ti junchib kʼakʼal chikʼ sbaike.

• Li Diose snaʼoj li kʼusi lek sventa voʼotike. Jaʼ la slikes li nupunel sventa jmojuk oyik li jun vinik xchiʼuk jun antse. Ti jech la spas Dios ti akʼo xnupunike jaʼ sventa stabeik sbalil xchiʼuk ti chabibiluk skotol li utsʼ alalile. Nopo ta sventa liʼe: Kʼalal chatsʼak junuk mesa o siyae, skʼan xachanbe lek svunal, jaʼ noʼox jech ek mi skʼan xmuyubaj li jun utsʼ alalile skʼan xchʼun li kʼusi chal Diose. Lek me chbat jkuxlejaltik mi ta jchʼuntike (Isaias 48:17,18).

  

• Kʼalal xchiʼin sbaik ta vayel ti muʼyuk to nupunemike. Xuʼ xil tsots svokolik, xuʼ xchiʼin komel yol li antse, tstsakatik ta chamel xchiʼuk ti chopol chaʼi sbaike o ti mu xa junuk yoʼontonike.

• Li Diose laj yakʼbe jun matanal li krixchanoetike ti xuʼ xil yalab xnichʼnabik kʼalal xchiʼin sbaik ta vayele. Li matanal taje toj ep sbalil. Li Diose chʼul chil li kuxlejale, jaʼ yuʼun oy ta yoʼonton ti xkichʼtik ta mukʼ li matanal taje xchiʼuk ti jaʼuk noʼox jech spasik li buchʼu xchiʼil sbaik ta nupunele. Mi jech ta jpastik taje, xkichʼtik ta mukʼ li nupunele (Ebreos 13:4).

¿Mi lek ti baʼyel jmoj xnakiik sventa xakʼik venta mi jaʼ snup xchʼulel sbaike?

Sventa xmuyubaj li jun nupultsʼakale mu persauk baʼyel jmoj xnakiik xchiʼuk ti sten sbaik ti kʼusi ora tskʼan yoʼontonike. Kʼalal chnupunike mas to tstsatsub li snupunelike xchiʼuk jmoj chchapan li skʼopike.a Kʼalal chnupunike, jaʼ chkoltaatik sventa jmojuk˗o oyik (Mateo 19:6).

¿Kʼusi xuʼ spasik li jun nupultsʼakal sventa xmuyubajikuk li ta snupunelike?

Chʼabal junuk nupultsʼakal ti tukʼ xa tajeke. Pe xuʼ xmuyubajik mi jaʼ laj yakʼ ta xkuxlejalik li tojobtaseletik ta Vivliae. Jkʼeltik junchibuk:

• Jaʼuk mas xavakʼ ta avoʼonton li kʼusi tskʼan yoʼonton anup achiʼile maʼuk li kʼusi skʼan avoʼonton atuke (1 Korintios 7:3-5; Filipenses 2:3, 4).

• Akʼo persa ti xakʼan abaik ta jujuntale xchiʼuk ti mas to chavichʼ abaik ta mukʼ jujun kʼakʼale (Efesios 5:25, 33).

• Baʼyuk chanopik li kʼusi chavalike (Proverbios 12:18).

• Oyuk smalael avuʼunik xchiʼuk ta anil noʼox xavakʼbe abaik perton (Kolosenses 3:13, 14).