LI KʼUSITIK TSJAKʼ KEREM TSEBETIKE
¿Kʼusi xuʼ jpas sventa xlekub ti kʼu yelan ta jchiʼin ta loʼil li yantike?
Li ta mantal liʼe, ta jkʼeltik batel li oxtos liʼe:
¿Kʼu yuʼun skʼan te akʼeloj li buchʼu chachiʼin ta loʼile?
Junantik krixchanoetike toj vokol chaʼiik ti te skʼelojbeik sat li buchʼu chchiʼinik ta loʼile. Jaʼ yuʼun, mas kʼun chaʼiik ti ta mensaje noʼox chchiʼinik ta loʼile.
«Vokol tajek chkaʼi ti te jkʼelojbe sat li buchʼu ta jchiʼin ta loʼile. Yuʼun mu xa stakʼ jtupʼ li kʼusi laj kal jech kʼuchaʼal chichʼ pasel li ta mensajeetike» (Anna).
«Kʼalal ta jtak mensajee, xkoʼolaj kʼuchaʼal ta jun programa ti pasbil gravare. Pe kʼalal oy buchʼu ta jchiʼin ta loʼile, xkoʼolaj kʼuchaʼal jun programa ti ta en vivoe. Jaʼ yuʼun, te xinopnun˗o ti muʼyukuk kʼusi chopol xbat ta alel kuʼune» (Jean).
Persa onoʼox skʼan xachan ti kʼu yelan skʼan xachiʼin ta loʼil li yantike. Yuʼun jaʼ tskoltaot sventa xata avamigotak, sventa xata avabtel xchiʼuk tskoltaot xtok mi kʼot yorail ti oy buchʼu chanovioin o chanoviaine.
Skʼan mu xaxiʼo kʼalal oy buchʼu chachiʼin ta loʼile. Tspas avuʼun akʼo mi mu masuk xanaʼ xaloʼilaj.
«Skʼan teuk ta joltik ti oy onoʼox kʼusitik mu jechuk chbat ta alel kuʼuntike xchiʼuk ti xuʼ xijkʼexav˗oe, pe taje stalel onoʼox» (Nil).
¿Kʼuxi xuʼ xasaʼ aloʼil?
Oyuk kʼusitik xajakʼ. Nopbo skʼoplal li kʼusitik tskʼupinik sloʼiltael li yantike, vaʼun jaʼ xuʼ xalikes˗o aloʼil. Jech kʼuchaʼal liʼe:
«¿Mi avaʼi xa li musika liʼe?».
«¿Kʼusi cha˗abtej˗o?».
«¿Mi avil li partido echʼe?».
Mi oy to kʼusi mas chakʼan chavalbe skʼoplale, nopbo skʼoplal li kʼusitik koʼol chakʼupinike o li kʼusi koʼol chapasike. Jech kʼuchaʼal liʼe: xuʼ van koʼol li a˗eskuelaike o koʼol ti bu cha˗abtejike. ¿Kʼu chaʼal mu xajakʼbe ta sventa li kʼusi yakal chapasike?
«Nopo li kʼusi chakʼan chanaʼ ta stojolal li buchʼu yakal chachiʼin ta loʼile, vaʼune jakʼbo» (Maritza).
Pʼijan me: Mu me toj epuk kʼusitik xajakʼ ti xuʼ van xkʼexav˗o avuʼun li jun krixchanoe. Yuʼun mi xi chajakʼbee: «¿Kʼusi ti mas chaxiʼoe?», «¿Kʼu yuʼun jtostos˗o li sbon akʼuʼ chalape?», xuʼ me chopol xaʼi sba avuʼun li jun krixchanoe. Yuʼun mi jech la ajakʼbe ta sventa li skʼuʼe, xuʼ van tsnop ti yakal chalabane.
Mi oy kʼusi la ajakʼbe li jun krixchanoe, skʼan me xaval li kʼusi chanop eke. Vaʼun, te chakʼ venta ti maʼuk noʼox naka sjakʼobil chapase. Teuk ta ajol: li kʼusi oy ta avoʼontone jaʼ ti xaloʼilajike, maʼuk ti nakauk noʼox chajakʼe.
Xuʼ me xa kolaj ta jun polisia mi toj ep kʼusitik cha jakʼe.
Beiltasel ta Vivlia: «Li kʼusitik tsnop ta yoʼonton li jun vinike xkoʼolaj kʼuchaʼal natil voʼ, pe li buchʼu oy spʼijile snaʼ slokʼesel tal» (Proverbios 20:5).
Tsʼet chikintao lek. Sventa xachiʼin ta loʼil li yantike, toj tsots skʼoplal ti xatsʼet chikinta lek li kʼusi chalike, mu persauk ti toj echʼem xanaʼ xaloʼilaje.
«Li kʼusi oy ta koʼontone jaʼ ti xkojtikin mas li buchʼu ta jchiʼin ta loʼile. Vaʼun, ta jvules ta jol li kʼusi laj yalbun sventa jnaʼuk kʼusi xuʼ jakʼbe mi laj kil ta yan veltae» (Tamara).
Pʼijan me: Mu me xavul tajek avoʼonton ta sventa ti kʼusi chaval ta tsʼakale, yuʼun mi chatsʼetan lek achikine, xuʼ chanaʼ li kʼusi chaval ta tsʼakale.
Beiltasel ta Vivlia: «Skʼan me akotolikuk oyuk ta avoʼontonik xchikintael, nopik me lek kʼalal chakʼopojike» (Santiago 1:19).
Oyuk me ta avoʼonton ta melel li buchʼu chachiʼin ta loʼile. Mi jech chapase, muʼyuk me chaxiʼ kʼalal chaloʼilajike.
«Kʼalal chakʼ venta ti oy ta avoʼonton ta melel li buchʼu chachiʼin ta loʼile, xuʼ me mas jun avoʼontonik chaloʼilajik akʼo mi mu xa xanaʼ kʼusi chaval bakʼintik» (Marie).
Pʼijan me: Mu me toj epuk kʼusi xajakʼ xtok un. Mi xi avalbee: «Toj alakʼ sba chkil li axonobe, ¿kʼuxi atoj?», xuʼ van xkʼexav avuʼun.
Beiltasel ta Vivlia: «Oyuk-o me ta avoʼontonik li yantike, maʼuk noʼox me xanop akʼoplal atukik» (Filipenses 2:4).
¿Kʼuxi xuʼ xatsutses li aloʼile? Jun kerem ti Jordan sbie xi chale: «Oyuk kʼusi lek xaval. Xuʼ van xi xavalbee: ‹Toj lek laj kaʼi ti la jchiʼinot ta loʼile›, o xuʼ van xie: ‹Veno, tey xkil jbatik ta yan velta, kʼelo me aba›. Mi jech laj avale, xuʼ me mas kʼun chavaʼi ta xchiʼinel ta loʼil ta yan velta».