Ep chlajik ta milel ta bala ta eskuela | ¿Kʼusi chal li Vivliae?

Li ta 24 yuʼun mayo ta 2022, oy kʼusi xibal sba kʼot ta pasel li ta bikʼit jteklum Uvalde (Texas, Estados Unidos). Li periodiko The New York Times chal ti «oy jun vinik yichʼoj batel spistola li ta eskuela primaria Robb, vaʼun la smil 19 ta voʼ ololetik xchiʼuk chaʼvoʼ maestra».

Chopol ta aʼiel, pe nopajtik noʼox jech chkʼot ta pasel. Li periodiko USA Today laj yal ti te noʼox ta Estados Unidose, «laj yakʼik 249 ta velta bala ta eskuelaetik li echʼ jabile. Taje muʼyuk toʼox jech ilbil˗o, jaʼ toʼox ta 1970 ti jech kʼot ta pasele».

¿Kʼu chaʼal ti jech chkʼot ta pasel taje? ¿Kʼuxi xuʼ xkuch kuʼuntik xkʼuxul kʼalal jech ta jnuptantike? ¿Mi oy van srasonal ti xuʼ jchʼuntik ti chlaj skʼoplal li milbaile? Li Vivliae te chalbutik.

¿Kʼu yuʼun yantik sok li balumile?

•  Li Vivliae chal ti ta ‹slajebal xa kʼakʼal kuxulutike›. Jaʼ yuʼun, «muʼyuk xa kʼanbail kʼuchaʼal stalel onoʼox jeche», «simaronik» li krixchanoetike, chʼabal xkʼuxul yoʼontonik xchiʼuk chopol kʼusi tspasik. Pe li Vivliae chal xtok ti «yantik sok batel» li krixchanoetik taje (2 Timoteo 3:1-5, 13). Mi chakʼan to chanabe mas yaʼyejale, kʼelo li mantal «¿Mi yaloj xa onoʼox Vivlia kʼu yelan stalelal krixchanoetik li avie?».

Epal krixchanoetike xi tsjakʼbe sbaike: «¿Kʼu yuʼun muʼyuk tspajtsan Dios li kʼusitik toj chopol chkʼot ta pasele, jech kʼuchaʼal li milbail ta bala ta eskuelaetike?». Sventa xanaʼ kʼusi chal li Vivliae, kʼelo li mantal «¿Kʼu yuʼun oy kʼusi chopol tsnuptan li lekil krixchanoetike?».

¿Kʼuxi xuʼ xkuch kuʼuntik xkʼuxul kʼalal jech ta jnuptantike?

•  «Li kʼusitik laj yichʼ tsʼibael ta voʼnee laj yichʼ tsʼibael sventa jchanubtaseltik, sventa oyuk spatobil koʼontontik [...] xchiʼuk ti tspat koʼontontik li Tsʼibetike» (Romanos 15:4).

Li beiltaseletik ta Vivliae xuʼ skoltaot sventa xkuch avuʼun li vokolil ta skoj ti noj ta choplejal li balumile. Mi chakʼan to chanabe mas yaʼyejale, kʼelo li revista ¡Despertad! ti xi sbie «¿Acabará algún día la violencia?».

Li ololetike oy chilik o chaʼiik ta notisia li kʼusitik toj chopol chkʼotanuk ta pasele, vaʼun ta xiʼik˗o. Totil meʼiletik, mi chakʼan chanaʼ kʼuxi xuʼ xakolta avalab anichʼnab sventa mu xiʼik˗o tajek li kʼusitik ch˗echʼ ta notisiae, kʼelo li mantal «El efecto de las noticias en los niños».

¿Mi chlaj van skʼoplal jun kʼakʼal li milbaile?

•  «Chpojatik kʼalal chichʼik ilbajinele xchiʼuk kʼalal tstsakatik ta kʼope» (Salmo 72:14).

•  «Tspasik ta slokobil balumil li s˗espadaike xchiʼuk tspasik ta jos li slansaike. Muʼyuk xa tstsak sbaik ta kʼop li mukʼtik lumetike xchiʼuk mi jaʼuk xa chchanik paskʼop» (Mikeas 4:3).

Li Diose oy kʼusi tspas ti mu spas yuʼunik jech li krixchanoetike. Li Ajvalilal yuʼun Dios te ta vinajele tslajesbe skʼoplal li abtejebaletik sventa milbaile xchiʼuk tslajesbe skʼoplal li choplejale. Mi chakʼan to chanabe skʼoplal kʼusi tspas li Ajvalilal yuʼun Diose, kʼelo li mantal «Li Ajvalilal yuʼun Diose chakʼ talel jun oʼontonal».