Xiʼemutik ta skoj ti buyuk xa noʼox chmilvanik ta balae | ¿Kʼusi chal li Vivliae?

Li ta julio ta 2022, ep buchʼutik cham ta bala ta spʼejel balumil:

• «Kʼalal la smilik li bankilal politiko ta Japóne, [jaʼ li Shinzo Abe ti jaʼ toʼox baʼyel ministroe] xiʼik˗o ta jyalel li krixchanoetike. Yuʼun li ta Japóne muʼyuk mas jech kʼotem ta pasel xchiʼuk oy lek tsots smantalil yuʼunik ta sventa li stunesel tukʼe» (10 yuʼun julio ta 2022, The Japan Times).

• «Li krixchanoetik ta Dinamarcae xiʼik tajek kʼalal jun vinik la smil oxvoʼ krixchanoetik ta jun mukʼta tienda ta Copenhague» (4 yuʼun julio ta 2022, Reuters).

• Li ta Sudáfricae cham 15 ta voʼ krixchanoetik ta skoj ti och milvanikuk ta bala jayvoʼ viniketik ta jun kantina ta Soweto» (10 yuʼun julio ta 2022, The Guardian).

• «Kʼalal la spas skʼinik li ta 4 yuʼun julio ta Estados Unidose, chamik mas ta 220 krixchanoetik ta skoj ti lajik ta balae» (5 yuʼun julio ta 2022, CBS News).

¿Mi chlaj skʼoplal li milbaile? ¿Kʼusi chal li Vivliae?

Chlaj skʼoplal li milbaile

Li Vivliae chal ti kuxulutik ta «slajebal xa kʼakʼale», jaʼ yuʼun li krixchanoetike toj simaronik xchiʼuk muʼyuk smelol li kʼusi tspasike (2 Timoteo 3:1, 3). Ta skoj ti toj echʼ xa noʼox chopol kʼusitik tspas li krixchanoetike, chiʼik˗o tajek li jnaklejetike (Lukas 21:11). Pe li Vivliae chal ti chlaj skʼoplal li milbaile, vaʼun li krixchanoetike «chnakiik ti bu jun yoʼontonike, mu kʼusi snaʼik ti bu chnakiike xchiʼuk muʼyuk kʼusi chiʼik˗o ti bu chkux yoʼontonike» (Isaias 32:18). Vaʼun chaʼa, ¿kʼuxi chlaj skʼoplal li milbaile?

Li Diose tslajesbe skʼoplal li chopol krixchanoetike xchiʼuk li kʼusitik chmilvanik˗oe.

• «Li buchʼutik toj chopolike ta xichʼik kʼokel lokʼel li ta balumile» (Proverbios 2:22).

• «[Li Diose] tslajesbe skʼoplal li paskʼopetik ta spʼejel balumile. Tskʼas li arkoe xchiʼuk tslilin li lansae; ta xchikʼbe ta kʼokʼ li skareta soltaroetike» (Salmo 46:9).

Li Diose chchanubtas krixchanoetik yoʼ jun yoʼonton xkuxiik, vaʼun chlaj skʼoplal li milbaile.

• «Muʼyuk chakʼik vokolil xchiʼuk mi jaʼuk kʼusi chopol tspasik ta sjunul li chʼul vits kuʼune; yuʼun li balumile jpʼel skʼoplal chnoj ta krixchanoetik ti xojtikinik li Jeovae, jech kʼuchaʼal nojem ta voʼ li nabe» (Isaias 11:9).

• «Li avie, li Diose yakal chchanubtas krixchanoetik ti mu saʼik kʼope, ti mu xmilvanike, ti spasik ta «slokobil balumil li s˗espadaike» xchiʼuk ti spasik «ta jos li slansaike» (Mikeas 4:3).

Mi chakʼan chanabe mas skʼoplal ti chal Vivlia ti chlaj skʼoplal li kʼusi xibal sbae, kʼelo li mantal ti xi sbie: «¿Es posible librarse del miedo?».

Sventa xanaʼ kʼuxi chlaj skʼoplal ta j˗echʼel li milbaile, kʼelo li mantal ti xi sbie: «¡Por fin paz en la Tierra!».