Xuʼ xatabe sbalil ti laj yakʼ xkuxlejal li Jesuse

Jun velta ta jabil, li stestigotak Jeova ta spʼejel balumil xchiʼuk li ta smiyonal noʼox krixchanoetik staojik ta ikʼele tstsob sbaik sventa spasik li Snaʼobil Slajel Jesuse, jech kʼuchaʼal laj yal komele (Lukas 22:19). Li tsobajel liʼe tskoltautik sventa epuk sbalil xkiltik ti laj yakʼ xkuxlejal Jesus ta jtojolaltike. Jech xtok, chakʼ ta ilel ti ta jtabetik sbalil avi xchiʼuk ta jelavel ti laj yakʼ xkuxlejal ta jtojolaltike (Juan 3:16).

Mi labat li ta Snaʼobil Slajel Jesus o mi muʼyuk li ta jabil liʼe, ¿kʼuxi xuʼ xatabe sbalil ti laj yakʼ xkuxlejal ta jtojolaltike? Li Jesuse laj yal ti skʼan chaʼtos kʼusi jpastike:

1. 1. Ojtikino Dios xchiʼuk li Jesuse. Xi laj yalbe Stot ta vinajel li Jesuse: «Jaʼ skʼoplal kuxlejal sbatel osil liʼe: ti ta xojtikinikote, li jun noʼox melel Diosote xchiʼuk ti chojtikinik ek li buchʼu la atak tale, li Jesukristoe» (Juan 17:3).

2. 2. Akʼo ta akuxlejal li kʼusi chachane. Li Jesuse laj yal ti tsots skʼoplal skʼan xkakʼ ta jkuxlejaltik li kʼusi laj yakʼ ta chanele. Jech kʼuchaʼal liʼe: kʼalal tstsutses xa ox li Mantaletik ta Vits laj yale, laj yalbe skotolik ti skʼan xaʼiik li kʼusi chale xchiʼuk ti spasike (Lukas 6:46-48). Xi laj yal ta yan velta xtoke: «Ta skoj ti anaʼojik xa li kʼusitik taje, xamuyubajik noʼox me mi jech chapasike» (Juan 13:17).

¿Mi chakʼan chavojtikin mas li Dios xchiʼuk Jesuse? ¿Mi chakʼan chanaʼ kʼuxi xuʼ xavakʼ ta akuxlejal li kʼusi chachane? Oy jaytosuk ti kʼusi xuʼ skoltaote.

Chanubtasel ta Vivlia

Li chanubtasel ta Vivlia ti ta matanal chkakʼkutike skoltaoj epal krixchanoetik sventa xchanbeik skʼoplal li Vivliae xchiʼuk ti xakʼ ta xkuxlejalike.

• Sventa xatabe mas yaʼyejale, ochan li ta pajina Chʼamo li chanubtasel chakʼ stestigotak Jeovae.

• Sventa xatabe mas yaʼyejal kʼu yelan li chanubtasel chakʼ li stestigotak Jeovae, kʼelo li video Lek ti chlik achan li Vivliae.

Tsobajeletik yuʼun stestigotak Jeova

Li stestigotak Jeovae chib velta ta xemana tstsob sbaik li ta Salonetik sventa Tsobobbail yuʼunike. Li ta tsobajel liʼe chichʼ albel skʼoplal li Vivliae xchiʼuk ti kʼuxi xuʼ xkakʼ ta jkuxlejaltik li kʼusi chale.

Buchʼuuk noʼox xuʼ xbat li ta tsobajeletike, mu persauk ti jaʼ stestigo Jeovae. Ti bu nakalote xuʼ van stsob sbaik ta Salon o ta videoconferencia chjelav.

• Sventa xanaʼ kʼusi chichʼ pasel li ta tsobajeletike, kʼelo li video ¿Kʼu yelan li jtsobajelkutike?

• Sventa xasaʼ bu nopol xkom ti bu ta jtsob jbakutik ti bu nakalote, ochan li ta pajina Li tsobajeletik yuʼun stestigotak Jeovae.

Mantaletik xchiʼuk videoetik ta Internet

Ep mantaletik xchiʼuk videoetik li ta pajina liʼe xuʼ skoltaot sventa xanabe skʼoplal li kʼusi laj yakʼ ta chanel Jesuse xchiʼuk kʼusi sbalil xuʼ jtabetik ti laj yakʼ xkuxlejale.

Jech kʼuchaʼal liʼe, sventa xanabe skʼoplal kʼu yelan tspoj ta smiyonal krixchanoetik ti cham li Jesuse, kʼelo li mantaletik «¿Kʼu yelan tspojutik li Jesuse?» xchiʼuk «¿Kʼu yuʼun laj yil svokol xchiʼuk cham li Jesuse?» o kʼelo li video ¿Kʼu yuʼun cham li Jesuse?