¿K’u yelan stalelal li jun yajtsʼaklom Kristoe? | ¿Kʼusi chal li Vivliae?

Li ta spʼejel balumile, ep buchʼutik chalik ti jaʼik yajtsʼaklom Kristo o jchʼunolajeletike. Pe oy kʼusitik muʼyuk lek tspasik. Junantike jaʼ noʼox tspasik li kʼusi tskʼan stukike, chloʼlavanik xchiʼuk muʼyuk slekil yoʼontonik. Yantik xtoke tsloʼla snup xchiʼilik. Ta skoj taje, oy buchʼutik xi tsjakʼbe sbaike: «¿Kʼu yelan stalelal li jun melel yajtsʼaklom Kristoe?».

¿K’u yelan stalelal li jun melel yajtsʼaklom Kristoe?

K’un no’ox ta alel ti jaʼutik yajtsʼaklom Kristoe, pe mu baluk noʼox ti naka chkaltike. Li Vivliae chal ti chchʼun kʼusi laj yal Jesus li jun melel yajtsʼaklom Kristoe (Echos 11:26). Xi onoʼox laj yal li Jesuse: «Voʼoxuk me kajchankʼopoxuk ta melel mi te oyoxuk˗o ta stojolal li jkʼope» (Juan 8:31). Li jun melel yajtsʼaklom Kristoe chakʼ persa xchʼunel li kʼusitik laj yal Jesuse xchiʼuk ti xakʼ ta xkuxlejale, akʼo mi mu jechuk tajek chbat ta pasel yuʼun bakʼintik. Jkʼeltik batel junchibuk li kʼusi laj yal Jesuse.

Li melel yajtsʼaklomtak Kristoe skʼanojik li yantike

Li kʼusi laj yal Jesuse: «Chkakʼboxuk jun achʼ mantal: kʼano me abaik ta jujuntal; jech kʼuchaʼal jkʼanojoxuke jechuk xakʼan abaik ta jujuntal ek li voʼoxuke. Mi chakʼan abaik ta jujuntale, jaʼ jech tsnaʼ skotolik ti voʼoxuk kajchankʼopoxuke» (Juan 13:34, 35).

Li kʼusi la spas Jesuse: Li Jesuse la skʼan skotol li krixchanoetike mu ventauk mi oy stakʼinik o mi povreik o mu ventauk bu likemik tal. La xpoxta li buchʼutik ipike xchiʼuk la smakʼlin li buchʼutik chviʼnajike. Pe maʼuk noʼox, yuʼun laj yakʼ xkuxlejal xtok sventa spoj li krixchanoetike (Mateo 14:14-21; 20:28).

Li kʼusi tspasik li melel yajtsʼaklomtak Kristoe: Skʼanojik li yantike, jaʼ yuʼun chakʼ ta ilel slekil yoʼontonik, mu snaʼ xtʼujvanik xchiʼuk ch˗akʼvanik ta perton. Jech xtok, oy kʼusitik tspasik sventa skoltaik li yantike (1 Juan 3:16).

Li melel yajtsʼaklomtak Kristoe muʼyuk chloʼlavanik

Li kʼusi laj yal Jesuse: «Voʼon li melelune» (Juan 14:6).

Li kʼusi la spas Jesuse: Li Jesuse muʼyuk xloʼlavan xchiʼuk muʼyuk la sjut kʼop. Muʼyuk la sloʼla yantik sventa jaʼuk spasik li kʼusi tskʼane. Li Jesuse laj yichʼ ojtikinel ti melel snaʼ xkʼopoje, akʼo mi la sta˗o svokol bakʼintik ta skoj taje (Mateo 22:16; 26:63-67).

Li kʼusi tspasik li melel yajtsʼaklomtak Kristoe: Muʼyuk tsjutik kʼop xchiʼuk muʼyuk ch˗elkʼajik. Tstoj spatanik, lek baxbolik ta abtel xchiʼuk tsʼakal lek ora ch˗abtejik (Romanos 13:5-7; Efesios 4:28). Muʼyuk tsloʼlaik yantik sventa xelkʼanbeik stakʼinik o li kʼusitik oy yuʼunike, muʼyuk tspasik kopia ta eksamen, muʼyuk tsjutik kʼop kʼalal tsaʼ yabtelike xchiʼuk muʼyuk chloʼlavanik kʼalal tstikʼ svunik sventa skʼanik koltael o mi oy kʼusi yan tskʼanike (Ebreos 13:18).

Li melel yajtsʼaklomtak Kristoe lek yoʼontonik

Li kʼusi laj yal Jesuse: «Laʼik ta jtojolal akotolik, voʼoxuk ti tsots tajek cha˗abtejike xchiʼuk ti ol avikatsike, voʼon ta jsikubtas avoʼontonik. Jaʼ kuchik li kʼatlom teʼ kuʼune xchiʼuk chanbeikun jtalelal, yuʼun manxoun xchiʼuk bikʼit kakʼoj jba, vaʼun chata siketel avoʼontonik. Yuʼun li kʼatlom teʼ kuʼune kʼun ta kuchel xchiʼuk muʼyuk bu ol li kikatse» (Mateo 11:28-30).

Li kʼusi la spas Jesuse: Li Jesuse lek yoʼonton echʼ xchiʼuk lek laj yaʼi sba yuʼun li yantike. Lek laj yaʼi xchiʼinel li ololetike, la spatbe yoʼonton li buchʼutik chibajemike xchiʼuk la stsak ta venta skotol li krixchanoetike (Markos 10:13-15; Lukas 9:11).

Li kʼusi tspasik li melel yajtsʼaklomtak Kristoe: Ta slekil yoʼonton tskʼoponik li yantike xchiʼuk muʼyuk kʼusi chopol tspasbeik (Efesios 4:29, 31, 32). Oy ta yoʼontonik li yantike xchiʼuk tskʼelik kʼuxi xuʼ skoltaik (Galatas 6:10).

Li melel yajtsʼaklomtak Kristoe muʼyuk tsloʼla snup xchiʼilik

Li kʼusi laj yal Jesuse: «Ti kʼusi spasoj ta jun li Diose muʼyuk buchʼu xuʼ xchʼak» (Markos 10:9).

Li kʼusi la spas Jesuse: Akʼo mi muʼyuk xnupun li Jesuse, laj yalbe li nupultsʼakaletik ti mu sloʼla li snup xchiʼilike (Mateo 19:9). Jech xtok, laj yal li kʼusitik skʼan skʼel˗o sbaik sventa mu xtuchʼ li snupunelike (Mateo 5:28).

Li kʼusi tspasik li melel yajtsʼaklomtak Kristoe: Muʼyuk tspasik li kʼusitik xuʼ sok˗o li snupunelike (Ebreos 13:4). Li malalil xchiʼuk ajnilale skʼanoj sbaik xchiʼuk chichʼ sbaik ta mukʼ (Efesios 5:28, 33).