Mateo 11:28-30 | «Laʼic ta jtojol acotolic, […] vu’un ta xcac’ acux avo’ntonic»

«Laʼik ta jtojolal akotolik, voʼoxuk ti tsots tajek cha˗abtejike xchiʼuk ti ol avikatsike, voʼon ta jsikubtas avoʼontonik. Jaʼ kuchik li kʼatlom teʼ kuʼune xchiʼuk chanbeikun jtalelal, yuʼun manxoun xchiʼuk bikʼit kakʼoj jba, vaʼun chata siketel avoʼontonik. Yuʼun li kʼatlom teʼ kuʼune kʼun ta kuchel xchiʼuk muʼyuk bu ol li kikatse» (Mateo 11:28-30, Xchʼul Kʼop Dios sventa Achʼ Balumil).

«‹Laʼic ta jtojol acotolic, vo’oxuc ti lubenoxuc yu’un li tsatsal abtele, xchi’uc li alal icatsile, vu’un ta xcac’ acux avo’ntonic. Jaʼ cuchic li icatsil cu’une, ja’ chanic c’u x’elan co’nton yu’un toj lec co’nton, biq’uit cac’oj jba. Me jech chapasique, jech cux xi avo’ntonic. Yuʼun li abtel cu’une, mu’yuc tsots ta pasel, li icatsil cu’une, mu’yuc ol ta cuchel›, xi li Jesuse» (Mateo 11:28-30, Xch’ul C’op Jtotic Dios, ta sk’op Chenalhó).

Li kʼusi skʼan xal Mateo 11:28-30

Li Jesuse ta slekil yoʼonton laj yalbe li buchʼutik chchikintabat ti akʼo nopajikuk ta stojolale. Jamal laj yalbe ti mi jech la spasike, tstaik siketel oʼontonal xchiʼuk mas jun yoʼontonik.

«Laʼik ta jtojolal akotolik, voʼoxuk ti tsots tajek cha˗abtejike xchiʼuk ti ol avikatsike». Li krixchanoetik ti ta slekil yoʼonton la xchiʼin ta loʼil li Jesuse, solel ol tajek chaʼiik li yikatsik ta skoj li mantaletik yakʼojik li jnitvanejetik ta relijion xchiʼuk li kʼusitik nopem xaʼiik tspasike (Mateo 23:4; Markos 7:7). Jutuk mu skotoluk li krixchanoetike mu xa snaʼ kʼusi tspasik xchiʼuk lubem noʼox chaʼi sbaik ta skoj ti tsots tajek cha˗abtejik sventa staik li kʼusitik chtun yuʼunike.

«Voʼon ta jsikubtas avoʼontonik». Li Jesuse jamal laj yalbe mi la xchʼamik li takel ta ikʼele, ch˗akʼbat li siketel yoʼontonike o ti chkuxike. ¿Kʼuxi? Jaʼ ti chkoltaatik ta yaʼibel smelolal kʼusi oy ta yoʼonton Dios ta melel ti akʼo spasike (Mateo 7:24, 25). Taje jaʼ chkoltaatik sventa xkolik lokʼel li ta jecheʼ chanubtaseletik xchiʼuk li kʼusi nopem xaʼi tspasik relijionetik ti chlubtsanatik tajeke (Juan 8:31, 32). Melel onoʼox ti mu kʼunuk ta pasel ti xchanik xchiʼuk ti spasik batel li kʼusi tskʼan Diose, pe mi la spasike, ch˗akʼbat siketel yoʼontonik.

«Jaʼ kuchik li kʼatlom teʼ kuʼune xchiʼuk chanbeikun jtalelal». Li ta skʼakʼalil Vivliae, li j˗abteletike nopem xaʼiik tstunesik kʼatlom teʼ, jaʼ xkaltik, jtel teʼ ti tskajan ta snekebik sventa xkuchik li kʼusitik olike. Ta mas tsʼakale, li chaʼpʼel kʼop «kʼatlom teʼ» xie, jaʼ xa lik stunesik sventa xalbeik skʼoplal ti oy buchʼu pasbil ta mantal o ti oy buchʼu chbeiltasat yuʼune (Levitiko 26:13; Isaias 14:25; Jeremias 28:⁠4). Kʼalal «chanbeikun jtalelal» xie, stakʼ xi xichʼ jelubtasele «kʼotanik ta kajchankʼop». Jaʼ yuʼun, li Jesuse la stijbe yoʼonton li buchʼutik chchikintabat ti akʼo tsʼakliatuke, ti akʼo chanbatuk stalelale xchiʼuk ti xkʼotik ta yajchankʼoptake (Juan 13:13-15; 1 Pedro 2:21).

«Chata siketel avoʼontonik». Li Jesuse muʼyuk laj yalbe ti chchʼay ta ora li svokolike. Pe laj yalbe ti kʼuxi tsta li spatobil yoʼontonike (Mateo 6:25-32; 10:29-31). Li buchʼutik kʼotik ta yajchankʼop Jesus xchiʼuk ti la xchʼamik li chanubtasele, laj yakʼik venta ti maʼuk ikatsil ti chtunik ta stojolal Diose, yuʼun jaʼ ch˗akʼbat˗o smuyubajelik ta melel (1 Juan 5:3).

«Yuʼun li kʼatlom teʼ kuʼune kʼun ta kuchel xchiʼuk muʼyuk bu ol li kikatse». Li Jesuse mi jsetʼuk xkoʼolaj xchiʼuk li jnitvanejetik ta relijion vaʼ orae. Li Jesuse bikʼit yakʼoj sba xchiʼuk mu snaʼ saʼkʼop (Juan 7:47-49). Jech xtok, muʼyuk ti jpʼel xa xale, yuʼun lek yoʼonton xchiʼuk stakʼ noʼox kʼoponel. Jech xtok, muʼyuk ti solel tukʼ xa kʼusi tskʼanbe li yajtsʼaklomtake, yuʼun snaʼoj onoʼox ti oy kʼusi mu spas yuʼunike (Mateo 7:12; Markos 6:34; Lukas 9:11). La xchanubtasan kʼusi sbalil tstabeik li xkʼuxul yoʼonton Dios xchiʼuk ti tsta siketel yoʼontonik mi sak noʼox li sjol yoʼontonike (Mateo 5:23, 24; 6:14). Ta skoj li skʼupil talelaltak Jesuse chnopajik tal li krixchanoetik ta stojolale. Jech xtok, jaʼ chtijbat yoʼontonik sventa xkuchik li kʼatlom teʼ yuʼun ti kʼun ta kuchele xchiʼuk ti xkʼotik ta yajchankʼoptake.

Stsʼak loʼil ta Mateo 11:28-30

Kʼalal jaʼo yakal chchol mantal ta Galilea ta sjabilal 31 li Jesuse, jaʼ te laj yal li kʼusi chal Mateo 11:28 kʼalal ta 30. Li jtakbol Mateoe jaʼ noʼox stuk ti la stsʼiba ta Evanjelio li kʼusi laj yal Jesus taje. Ta skoj ti jaʼ juda vinik li Mateoe xchiʼuk ti jaʼ toʼox jun jtsobpatane, snaʼoj lek ti toj ep chil svokol li krixchanoetik ta skoj li kʼusi tspasik li jnitvanejetik ta relijion xchiʼuk li patanetik ti persa skʼan jtojbeik li jromaetike. Jaʼ yuʼun, xkuxet to yoʼonton laj yaʼi sba kʼalal laj yil ti toj lek yoʼonton Jesus akʼo mi tsots akʼbil yabtel yuʼun Stot ti jaʼ li Jeovaea (Mateo 11:25-27).

Li ta Evanjelio yuʼun Mateoe te chalbe skʼupil talelaltak Jesus ti jaʼ chkʼot ta Mesias ti albil onoʼox skʼoplale xchiʼuk ti jaʼ chkʼot ta Ajvalil li ta Ajvalilal yuʼun Diose (Mateo 1:20-23; Isaias 11:1-5).

Sventa xavaʼibe smelolal kʼusi chal li slivroal Mateoe, kʼelo li video liʼe.