Vokolil: ¿Mi jaʼ la spas Diablo li Diose?

Ti kʼu yelan tstakʼ li Vivliae

Li Vivliae chal ti maʼuk la spas Diablo li Jeovae, yuʼun jaʼ toʼox jun tukʼil anjel ti pas ta Diablo ta tsʼakale. Xi chichʼ albel skʼoplal li Diose: «Tukʼ li yabteltake, yuʼun tukʼ skotol li kʼusitik tspase. Jaʼ jun Dios ti tukʼ yoʼontone, mu spas li kʼusi muʼyuk tukʼe; melel kʼusi chal xchiʼuk tukʼ yoʼonton» (Deuteronomio 32:3-5). Jaʼ yuʼun, xuʼ xkaltik ti jaʼ toʼox jun tukʼil anjel li Satanase xchiʼuk ti jaʼ toʼox Xnichʼon Diose.

Jech xtok, li kʼusi laj yal Jesus ta Juan 8:44 chakʼ ta ilel ti «muʼyuk onoʼox bu tukʼ laj yakʼ sba ta stojolal» kʼusi melel li Diabloe. Taje chakʼ ta ilel xtok ti jaʼ toʼox jun tukʼil anjel li Diabloe xchiʼuk ti muʼyuk xchopolile.

Kʼalal la spas anjeletik li Diose, laj yakʼ ti xuʼuk snop stukik li kʼusi lek xchiʼuk li kʼusi chopole, jech laj yichʼ pasel li Diablo eke. Jaʼ yuʼun, kʼalal la snop ti muʼyuk xa chchʼunbe smantal li Diose xchiʼuk ti la sloʼla li baʼyel nupultsʼakale, jaʼ jech pas ta Satanas ti jaʼ skʼan xal «Jkontrainvanej» (Jenesis 3:1-5; Apokalipsis 12:9).