¿Kʼusi xuʼ jkʼanbetik ta orasion li Diose?

Li kʼusi chal Vivliae

Xuʼ jkʼanbetik kʼusiuk noʼox, jaʼ noʼox venta mi jaʼ jech kʼuchaʼal chal li Vivliae. Yuʼun xi chale: «Kʼusiuk noʼox ti ta jkʼanbetike chaʼibutik mi jech ta jkʼanbetik jech kʼuchaʼal tskʼan yoʼontone» (1 Juan 5:14). Jech xtok, xuʼ me xkalbetik li kʼusi ta jvul˗o koʼontontike. Li Vivlia xi chalbutike: «Albo skotol li kʼusi oy ta avoʼontonike» (Salmo 62:8).

Liʼe jaʼ junantik li kʼusi xuʼ jkʼantik ta orasione

• Xchʼunel koʼontontik (Lukas 17:5).

• Li xchʼul espiritu Diose, jaʼ xkaltik, li yip ch˗abtej sventa skoltautik ta spasel li kʼusi tukʼe (Lukas 11:13).

• Ti skoltautik ta stsalel li vokoliletike xchiʼuk li akʼel ta prevae (Filipenses 4:13).

• Ti junuk noʼox koʼontontike xchiʼuk ti xchabi jnopbentike (Filipenses 4:6, 7).

• Ti xakʼ jpʼijiltik sventa lekuk kʼusi xkʼot ta nopel kuʼuntike (Santiago 1:5).

• Ti skoltautik yoʼ jtatik li kʼusi chtun kuʼuntik jujun kʼakʼale (Mateo 6:11).

• Ti jkʼanbetik pertone (Mateo 6:12).