¿Mi xuʼ van oy kʼusi spasbutik li Diabloe?
Ti kʼu yelan tstakʼ li Vivliae
Li Satanas xchiʼuk li spukujtake ep kʼusitik xuʼ tspasbe li krixchanoetike, xi chal li Vivliae: «Li krixchanoetike oyik ta sjuʼel li Satanase» (1 Juan 5:19). Te chal xtok ti kʼu yelanil ta xilbajin li krixchanoetike. Jkʼeltik junantik.
Chloʼlavan. Li Vivliae chalbutik ti skʼan mu stsalutik «li kʼusitik manya tspas Diabloe» (Efesios 6:11). Jtos ti kʼu yelan tsloʼlautik li Satanase jaʼ ti tstunes krixchanoetik ti jaʼ xa yajtunel Dios yilele, pe ta melel jaʼ chtunik ta stojolal (2 Korintios 11:13-15).
Espiritismo. Li Diabloe tstunes majia, tʼunol, jkʼelkʼanaletik xchiʼuk tstunes espiritismo sventa tsloʼla li krixchanoetike (Deuteronomio 18:10-12). Li buchʼutik tstunesik drogae xuʼ xtunesbat snopbenik yuʼun pukuj (Lukas 11:24-26).
Jecheʼ relijion. Li relijionetike muʼyuk chakʼik ta chanel li kʼusi melele, ta skoj taje muʼyuk chchʼunbeik smantal Dios li krixchanoetike (1 Korintios 10:20). Li Vivliae chal ti jecheʼ «li chanubtaseletik ti jaʼ yuʼun pukujetike» (1 Timoteo 4:1).
Uʼuninbil yuʼun pukuj. Li Vivliae chal ti oy krixchanoetik ti uʼuninbilik yuʼun li pukujetike. Bakʼintike tstupʼbeik sat, tspasik ta umaʼ o ti syayijes sba stukik yuʼunik li krixchanoetike (Mateo 12:22; Markos 5:2-5).
Kʼuxi xuʼ jchabi jbatik ta stojolal li Diabloe
Taje maʼuk skʼan xal ti skʼan xijxiʼ ta stojolal li Satanas xchiʼuk li spukujtake, yuʼun li Vivliae chalbutik kʼuxi xuʼ jchabi jbatik ta stojolal. Oy jaytos liʼe:
Ta skoj ti xkojtikinbetik lek smanya li Diabloe, muʼyuk chijtsʼuj li ta spetsʼtake (2 Korintios 2:11).
Jaʼ mi la jchan Jvivliatik xchiʼuk mi laj kakʼ ta jkuxlejaltik li kʼusi chale. Mi la jchʼuntik li beiltaseletik ta Vivliae, chabibilutik li ta sjuʼel pukujetike (Efesios 6:11-18).
Jiptik lokʼel skotol li kʼusi te stsakojbe sba skʼoplal xchiʼuk li pukujetike (Echos 19:19). Taje te me tsakal skʼoplal skotol li kʼusitik ta sventa espiritismoe, li livroetike, li videoetike, li sonetike xchiʼuk li vunetik o lokʼoletike.